Cavid İmamoğlu: “Dövlətin bu məsələyə diqqət yetirməsi o deməkdir ki, dövlət tərəfindən həyata keçirilən sosial siyasət məqsədyönlü və faydalıdır”
Əhalinin elə təbəqələri mövcuddur ki, onların dövlət dəstəyinə ciddi ehtiyacı var. Dövlət də mütəmadi olaraq əhalinin bu kəsimindən öz qayğısını əsirgəmir, onların problemlərinin, sosial çətinliklərinin aradan qaldırılması üçün müxtəlif addımlar atır.
Prezident İlham Əliyevin imzaladığı əhalinin sosial müdafiəsinin gücləndirilməsi sahəsində əlavə tədbirlər haqqında sərəncamın 1.9. bəndində dəfn üçün ödənilən sosial müavinətin məbləğinin 300 manata çatdırılması ilə bağlı məsələ də yer alıb.
Sosioloq Cavid İmamoğlu bizimlə söhbətində Prezident tərəfindən imzalanan məlum sərəncamın böyük əhəmiyyətə malik olduğunu bildirdi. O qeyd etdi ki, ölkə başçısının verdiyi sərəncamda dəfn üçün ödənilən sosial müavinətin məbləğinin 300 manata çatdırılması xüsusən də əhalinin aztəminatlı ailələrinə böyük kömək edəcək. Bu, vəfat edən şəxsin ailələrinə imkan verəcək ki, onlar dəfn xərclərini qarşılaya bilsinlər. “Prezidentin sərəncamı ilə müxtəlif kateqoriyalara verilən sosial müavinətlərin artırılması təqdirəlayiq haldır. Bunun xüsusən də aztəminatlı ailələrə faydası böyükdür. Bildiyim qədər, əvvəl dəfn xərcləri üçün ödənilən sosial müavinətin həcmi təxminən 100 manatdan bir qədər çox idi, ancaq indi birbaşa bu məbləğ yüz faiz artırıldı. Hesab edirəm ki, dəfn xərcləri ilə bağlı sosial müavinətlərin artırılaraq 300 manat müəyyən edilməsi vəfat edən şəxslərin ailəsinə böyük dəstəkdir. Onlar bu vəsaitlə rəhmətə gedən şəxsin dəfnini təşkil edə biləcəklər. Dövlətin bu məsələyə diqqət yetirməsi o deməkdir ki, dövlət tərəfindən həyata keçirilən sosial siyasət məqsədyönlü və faydalıdır”.
Müsahibimiz qeyd etdi ki, bu gün dəfn üçün xərclərin çoxluğu insanları ciddi narahat edir. Artıq yas məsclislərinin əvvəlki kimi təmtəraqlı olmadığını xatırladan C.İmamoğlu dövlətin qəbir yerləri üçün də standart qiymətlər müəyyən edəcəyinə ümid edir. “Ümumiyyətlə, əhaliyə hər zaman dövlət dəstək göstərir. Dəfn məsələsində də dövlətin əhaliyə dəstək verməsi insanlar tərəfindən müsbət qarşılanır. Elə insanlar var ki, onlar vəfat edən yaxınını dəfn etmək üçün müəyyən maddi çətinliklə üzləşir. Ancaq indi müəyyən edilən sosial müavinətlərin ödənişi həyata keçirildikdən sonra bu çətinlik də aradan qaldırılacaq. Düşünürəm ki, yasın verilməsi, eləcə də qəbir yerləri ilə bağlı standartlar müəyyən edilməlidir” - deyə C.İmamoğlu bildirdi.
İradə SARIYEVA
