Aytəkin Kamranqızı: “Dünyada çox az sayda dövlət tapıla bilər ki, orada əhalinin sosial problemlərinin həllinə Azərbaycandakı qədər diqqət göstərilsin”
Uzun müddət idi ki, Milli Məclisdə, eləcə də ictimaiyyətdə Azərbaycanda yeni doğulan körpələrə verilən birdəfəlik müavinətlərin artırılması müzakirə predmetinə çevrilmişdi.
Prezident İlham Əliyevin əhalinin sosial müdafiəsinin gücləndirilməsi sahəsində əlavə tədbirlər haqqında sərəncamında uşağın anadan olmasına görə sosial müavinətin məbləğinin 200 manata çatdırılması bu barədə aparılan müzakirələrə son qoyub.
Azərbaycanda “südpulu”nun artırılmasının yeni doğulan körpələrin ailəsinə dəstək olduğunu düşünən sosioloq Aytəkin Kamranqızı “Bakı-Xəbər”ə bildirdi ki, bu sahədə bir neçə dəfə artım baş verib. Onun dediyinə görə, 2018-ci ildə müavinətin məbləği 10 faiz artırılaraq 109 manat olub. İndi isə bu məbləğin 91 manat artırıldığını vurğulayan ekspertin bildirdiyinə görə, Azərbaycanda yeni doğulan uşaqlara dövlət tərəfindən verilən müavinətlərin artımı həqiqətən də təqdirəlayiqdir. “Bilirsiniz ki, xeyli vaxtdır anadan olan uşaqlara görə verilən sosial müavinətin məbləğinin artırılması məsələsi gündəmdə idi. Bununla bağlı, demək olar ki, bir sıra qurumlarda müzakirələr aparılırdı. Ölkə başçısının imzaladığı son sərəncam artıq bu məsələ ilə bağlı müzakirələrə son qoydu. Uşağın doğumuna görə veriləcək sosial müavinətin artırılması əsasən də aztəminatlı ailələrə böyük fayda verəcək. Yeni doğulan uşaqlara görə təyin edilən müavinətin artırılması həqiqətən də ailələrə stimul verəcək. Bu sərəncamla uşağın anadan olmasına görə sosial müavinətin məbləğinin əhəmiyyətli dərəcədə artırılaraq 200 manata çatdırılması müsbət göstəricidir. Dövlətimiz iqtisadi cəhətdən güclüdür və bu da özünü bütün sahələrdə, o cümlədən də əhalinin sosial təminatında özünü açıq şəkildə göstərir” - deyə ekspert bildirdi.
O, həmçinin, vurğuladı ki, sosial təminatı yaxşılaşdırmaq üçün müavinətlərin artırılması son illərin ən yüksək artımı kimi qiymətləndirilməlidir. Sərəncama əsasən, uşağın anadan olmasına görə müavinətin 109 manatdan 200 manata çatdırılması, həmçinin, yeni övlad sahibi olan ailələrin sosial vəziyyətinin yaxşılaşmasına stimul verəcək: “Bu sərəncam sayəsində gənc ailələrin maddi vəziyyəti qismən də olsa müsbətə doğru dəyişəcək. Nəzərə almaq lazımdır ki, əhalinin sosial rifah halının yaxşılaşması məqsədilə son günlər silsilə sərəncamlar verilir. Prezidentin məlum sərəncamları əhalinin maddi vəziyyətinin yaxşılaşması ilə yanaşı, onların mənəvi baxımdan sakitləşməsinə səbəb olacaq”.
Onun sözlərinə görə, dünyada çox az sayda dövlət tapıla bilər ki, orada əhalinin sosial problemlərinin həllinə Azərbaycandakı qədər diqqət göstərilsin.
İradə SARIYEVA
