Məlahət İbrahimqızı: “Valideynlərini itirən və ya valideyn himayəsindən məhrum olan uşaqları himayə edən qəyyumların müavinətinin artması həm onları sevindirdi, həm də həssas təbəqəyə aid olan uşaqları”
Əhalinin sosial müdafiəsinin gücləndirilməsi sahəsində Prezident tərəfindən mütəmadi olaraq sərəncamlar imzalanır. Növbəti və hər kəsi sevindirin sərəncam fevralın 25-dən imzalandı. Sərəncamda əhalinin sosial vəziyyətinin yaxşılaşması ilə bağlı bir sıra məsələlər qeyd olunub. O cümlədən, ailə başçısını itirməyə görə sosial müavinətin məbləğinin 80 manata və valideynlərini itirmiş və valideyn himayəsindən məhrum olmuş uşaqların qəyyumlarına (himayəçilərinə) sosial müavinətin məbləğinin 100 manata çatdırılması nəzərdə tutulur.
Qeyd edək ki, ailə başçısını itirməyə görə ailə üzvlərinin hər biri üçün müavinətin məbləği 68 manatdan 80 manata çatdırılacaq. Valideynlərini itirmiş və valideyn himayəsindən məhrum olmuş uşaqların qəyyumları (himayəçiləri) üçün sosial müavinətin məbləği 61 manatdan 100 manata yüksələcək.
Sosial müavinətlərin artımının əhəmiyyəti haqqında danışan millət vəkili Məlahət İbrahimqızı “Bakı-Xəbər”ə açıqlamasında qeyd etdi ki, Prezident İlham Əliyevin imzaladığı son sərəncamlar cəmiyyətin bütün təbəqələrinə stimul verir: “Prezident əhalinin bütün qruplarına diqqətlə yanaşır. Əhalinin həssas qrupu sayılan aztəminatlı ailə, şəhid ailələri, ailə başçısını itirən, sağlamlıq imkanı məhdud uşaqlar və onlara baxan qəyyumlar, ümumiyyətlə, bütün həssas təbəqənin sosial vəziyyətinin yaxşılaşması ilə bağlı olaraq Prezident tərəfindən sərəncam verildi. Prezidentin bu qayğısını yüksək qiymətləndirmək lazımdır. Nəzərə almaq lazımdır ki, cənab Prezident 2003-cü ildən bu günə kimi əhalinin sosial müdafiəsi istiqamətində mühüm işlər görüb. Görülən işlərin ardı olaraq bu günlərdə əhalinin sosial vəziyyətinin yaxşılaşması ilə bağlı olaraq müavinətlərin həcmi artdı. Dövlət başçısının özü də qeyd edib ki, bu islahatlar davam edəcək. Əhalinin hər bir vətəndaşının rifahının yaxşılaşması ilə əlaqədar ölkənin sosial müdafiə siyasəti daha da təkmilləşəcək”.
Həmsöhbətimizin sözlərinə görə, sərəncama əsasən ailə başçısını itirməyə görə sosial müavinətin həcmi 68 manatdan 80 manata çatdırılacaq. Eyni zamanda, valideynlərini itirmiş və valideyn himayəsindən məhrum olmuş uşaqların qəyyumları (himayəçiləri) üçün müavinətin məbləği 61 manatdan 100 manata qaldırılacaq: “Ailə başçısını itirən şəxsə dövlətin xüsusi qayğı ilə yanaşması sevindiricidir. Bu ailələr dövlətin dəstəyini daim hiss edəcək. Sərəncama əsasən, himayəçilərin müavinəti 61 manatdan 100 manata çatıb. Nəzərə almaq lazımdır ki, valideynlərini itirən və ya valideyn himayəsindən məhrum olan uşaqlar olduqca həssasdırlar. O uşaqlara baxan, onları himayə edən qəyyumlar doğrudan da çətin və məsuliyyətli işlə məşğuldurlar. Prezident bu sərəncamla həm qəyyumları sevindirdi, həm də həssas təbəqəyə aid olan uşaqları”.
Günel CƏLİLOVA
