Dilarə Cəbrayılova: “Sağlamlıq imkanları məhdud 18 yaşınadək uşaqlar üçün sosial müavinətin məbləğinin150 manata qaldırılması həmin şəxslərin sosial vəziyyətinin yaxşılaşmasına səbəb olacaq”
Məlum olduğu kimi, Prezident əhalinin sosial müdafiəsinin gücləndirilməsi sahəsində əlavə tədbirlər haqqında sərəncam imzalayıb. Sərəncamın mahiyyəti əhalinin sosial müdafiəsinin gücləndirilməsi sahəsində tədbirləri davam etdirmək və bu tədbirlərin əhatə dairəsini daha da genişləndirməkdir.
Sərəncamda, həmçinin, sağlamlıq imkanları məhdud 18 yaşınadək uşaqlara sosial müavinətin məbləğinin 150 manata çatdırılması da nəzərdə tutulur.
Qeyd edək ki, sağlamlıq imkanları məhdud 18 yaşınadək uşaqlar üçün sosial müavinətin məbləği 82 manat idi. Məlum sərəncamdan sonra müavinətin məbləği 82 manatdan 150 manata qaldırıldı.
Sağlamlıq imkanları məhdud 18 yaşınadək uşaqlara sosial müavinətin məbləğinin artırılmasının əhəmiyyəti haqqında danışan millət vəkili Dilarə Cəbrayılova “Bakı-Xəbər”ə açıqlamasında qeyd etdi ki, 2019-cu ilin ilk günlərindən etibarən Prezident İlham Əliyev tərəfindən ölkə əhalisinin sosial rifahının yüksəlməsi məqsədilə silsilə sərəncam və fərmanlar imzalanır: “Dövlət başçısı tərəfindən bu il sosial və iqtisadi yönümlü fərmanların verilməsinin şahidi olmuşuq. Bu sərəncam və fərmanların imzalanmasında məqsəd əhalinin sosial durumunun yaxşılaşmasıdır. Məlumdur ki, fevralın 25-də Prezident əhalinin sosial müdafiəsinin gücləndirilməsi istiqamətində daha bir inqilabi addım atdı. Azərbaycanda sosial müavinət və təqaüdlərin əhəmiyyətli şəkildə artırılması dövlətin öz vətəndaşlarına verdiyi dəyəri ifadə etməklə yanaşı, əhalinin rifah halının daha da yaxşılaşdırılması istiqamətində məqsədyönlü tədbirlərin davamlı xarakter daşıdığını göstərir”.
Xanım millət vəkilinin sözlərinə görə, sağlamlıq imkanları məhdud 18 yaşınadək uşaqlar üçün sosial müavinətin məbləğinin 82 manatdan 150 manata qaldırılması müsbət addımdır. Sağlamlıq imkanları məhdud 18 yaşınadək uşaqların müavinəti təxminən 70 manata yaxın artdı: “Müavinətin 150 manata çatdırılması onların sosial və maddi vəziyyətinin yaxşılaşmasına səbəb olacaq. Onu da deyim ki, Prezident çıxışı zamanı bildirib ki, əhalinin sosial vəziyyətinin yaxşılaşması istiqamətində aparılan işlər davam edəcək”.
Günel CƏLİLOVA
