Vüqar Bayramov: “… məcburi köçkünlərin sosial təminatı baxımından əhəmiyyətlidir”
Məlum olduğu kimi, Prezident İlham Əliyev məcburi köçkünlər və onlara bərabər tutulan şəxslər üçün vahid aylıq müavinətin artırılması haqqında sərəncam imzalayıb. Sərəncamda qeyd olunur ki, məcburi köçkünlər və onlara bərabər tutulan şəxslərin sosial müdafiəsini gücləndirmək və onlara dövlət qayğısını artırmaq məqsədilə məcburi köçkünlər və onlara bərabər tutulan şəxslər üçün vahid aylıq müavinətin məbləği 2019-cu il aprelin 1-dən 50 faiz artırılsın.
Bəllidir ki, Azərbaycan hökuməti hər zaman məcburi köçkünlərin yanında olub. Onların sosial problemlərinin həll olunması üçün sərəncam və fərmanlar imzalayır. Məcburi köçkünlər üçün nəzərdə tutulan sosial müavinət artırılır, eyni zamanda, onlar üçün xüsusi mənzillər tikilərək istifadəyə verilir. Bununla yanaşı, ödənişli ixtisaslarda təhsil alan məcburi köçkün övladları təhsil haqqından azaddırlar.
Xatırladaq ki, məcburi köçkünlər və onlara bərabər tutulan şəxslər üçün vahid aylıq müavinətin verilməsinə 2017-ci il fevralın 1-dən başlanıb. 2018-ci il martın 1-dən müavinətin məbləği, sıx müvəqqəti məskunlaşma yerlərində qazlaşdırma vəziyyətindən asılı olaraq, adambaşına 22 və 40 manat məbləğində müəyyən olunub. Bu il aprelin 1-dən isə həmin məbləğlər, müvafiq olaraq, 33 və 60 manat təşkil edəcək.
Qaçqın və Məcburi Köçkünlərin İşləri üzrə Dövlət Komitəsinin yaydığı məlumatda qeyd olunur ki, Azərbaycanda vahid aylıq müavinətin artımı 496 557 nəfər məcburi köçkünə şamil olunacaq.
Dövlət başçısının müəyyənləşdirdiyi strategiyaya əsasən, ölkəmizdə sosial müdafiəyə ehtiyacı olan vətəndaşların, o cümlədən məcburi köçkünlərin problemləri davamlı şəkildə həll edilir, onların sosial müdafiəsi gücləndirilir. Hazırda məcburi köçkünlərdən 81 476 nəfəri 22 manat, 415 081 nəfəri 40 manat məbləğində vahid aylıq müavinət alır.
Prezidentin məlum sərəncamını şərh edən millət vəkili Hadi Rəcəbli qeyd etdi ki, məcburi köçkünlərin sosial rifah halının yaxşılaşması məqsədilə imzalanan sərəncama əsasən, Qarabağ uğrunda gedən döyüş zamanı yurd-yuvalarından didərgin düşən insanların vahid aylıq müavinəti məbləğinin 50 faiz artırılması vacib sosial addımdır: “Aprelin 1-dən məcburi köçkünlər və onlara bərabər tutulan şəxslər (fərdi qaydada sayğacların quraşdırılması və texniki istismarı mümkün olmayan, habelə təbii qazla təmin olunmayan sıx müvəqqəti məskunlaşma yerlərində faktiki yaşayan məcburi köçkünlər və onlara bərabər tutulan şəxslər istisna olmaqla) üçün vahid aylıq müavinət 40 manatdan 60 manata, fərdi qaydada sayğacların quraşdırılması və texniki istismarı mümkün olmayan sıx müvəqqəti məskunlaşma yerlərində, fərdi qaydada təbii qazla təmin olunmayan sıx müvəqqəti məskunlaşma yerlərində faktiki yaşayan məcburi köçkünlər və onlara bərabər tutulan şəxslər üçün vahid aylıq müavinətin məbləği isə 22 manatdan 33 manata qaldırılıb”.
Millət vəkilinin sözlərinə görə, bu il 6-7 minə qədər köçkün ailəsi yeni mənzillərlə təmin olunacaq: “Məlumdur ki, artıq bu məsələ ilə bağlı ölkə başçısı müvafiq tapşırıqlar verib. Həm bölgələrdə, həm Bakı və Sumqayıt şəhərlərində bu proqram icra ediləcək”.
Onun sözlərinə görə, məcburi köçkünlər üçün vahid aylıq müavinətin 50 faiz artırılması onların sosial vəziyyətinin yaxşılaşmasına səbəb olacaq.
İqtisadçı-ekspert Vüqar Bayramov məsələ ilə bağlı bunları bildirdi: “Məlumdur ki, 2017-ci ilin yanvar ayının 1-dən etibarən məcburi köçkünlər və onlara bərabər tutulan şəxslərə vahid aylıq müavinət ödənilir. Nəzərə almaq lazımdır ki, bu vəsait əsasən onların kommunal xidmətlərinin xərcinin ödənilməsi məqsədilə dövlət tərəfindən əvəzsiz olaraq verilir. 2017-ci ilin əvvəlində bu rəqəm 36 manat, 2018-ci ildə 40 manat, son dəyişikliklərdən sonra isə 50 faiz artırılaraq 60 manata çatdırılıb. Bu qərardan sonra məcburi köçkün ailələrinin hər bir üzvünə kommunal xərclərin ödənilməsi üçün dövlət tərəfindən 60 manat vəsait ödəniləcək. Ailə üzvlərinin sayına görə kommunal xərclərin ödənilməsi üçün dövlət tərəfindən 60 manat veriləcək”.
V.Bayramov hesab edir ki, birdəfəlik aylıq müavinətin artırılması məcburi köçkünlərin sosial təminatı baxımından əhəmiyyətlidir. Məlum sərəncam həssas qrup hesab edilən məcburi köçkünlərin sosial təminatının daha da yaxşılaşmasına dəstəkdir.
Günel CƏLİLOVA
