Fatimə Hacıbəyli: “Dövlət tərəfindən çoxuşaqlı anaların bu şəkildə dəstəklənməsi, stimullaşdırılması təqdirəlayiqdir”
Bildiyimiz kimi, Prezident İlham Əliyev əhalinin sosial müdafiəsinin gücləndirilməsi sahəsində əlavə tədbirlər haqqında sərəncam imzalayıb. Bu sənəddə əks olunan vacib məsələlərdən biri də 5-dən artıq övladı olan analarla bağlıdır. Sözügedən sənədin 1.7 maddəsində beşdən çox uşağı olan qadınlara sosial müavinətin məbləğinin hər uşaq üçün 55 manata çatdırılması qeyd edilir.
Ölkə başçısının mövcud sərəncamında əks olunan bu məsələyə münasibət bildirən “Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə dedi ki, çoxuşaqlı ailələrin sosial rifahının yüksəldilməsi daim ölkə başçısının diqqətindədir. Onun sözlərinə görə, ötən illərdə də ölkə başçısının müvafiq sərəncamları ilə bu qəbildən olan qadınlara müavinətlər verilib. 2016-cı ildə Azərbaycanda 5-dən çox uşağı olan 3 mindən artıq qadına müavinət ödənildiyini xatırladan F.Hacıbəylinin bildirdiyinə görə, bu da o qadınların yaşayışına müsbət təsir göstərib. “Bu gün ölkə başçısı çoxuşaqlı ailələrə xüsusi diqqət yetirir. Beşdən çox uşağı olan qadınlara sosial müavinətin məbləğinin hər uşaq üçün 55 manata qaldırılması qadınlarımıza göstərilən böyük dövlət dəstəyinin nəticəsidir. Xüsusən də bölgələrdə yaşayan qadınlar üçün əvəzsiz köməkdir. Nəzərə alaq ki, hazırda 5-dən yuxarı övladı olan analar əsasən bölgələrdə yaşayırlar. Dövlət tərəfindən çoxuşaqlı anaların bu şəkildə dəstəklənməsi, stimullaşdırılması təqdirəlayiqdir. Bu kateqoriyaya aid həmin analar dövlətin verdiyi sosial müavinətlə uşaqlarını böyüdə biləcəklər. Bu həm də gələcəkdə çoxuşaqlı anaların sayının artmasına səbəb olacaq. Dövlətin sosial siyasəti Azərbaycan vətəndaşının sosial rifah halının yüksəlməsinə, insanların güzəranının təmin olunmasına yönəlib. Elə çoxuşaqlı analar var ki, onlar maddi cəhətdən imkansızdırlar. Dövlətimiz belə qadınların problemlərinin həll edilməsi istiqamətində müvafiq işlər görür. Bir ana hər uşaq üçün 55 manat sosial müavinət alacaq və bu da onlara imkan verəcək ki, övladlarını qayğısız böyütsünlər. Çoxuşaqlı qadınlar yaxşı bilirlər ki, onların hər qayğı və problemi dövləti dərindən maraqlandırır”.
F.Hacıbəyli qeyd etdi ki, qonşu ölkələrin heç birində əhalinin müxtəlif təbəqələri üçün sosial müavinətlərin bu şəkildə artırılması prosesi getmir. Ermənistanda bu sahənin iflic vəziyyətdə olduğunu vurğulayan F.Hacıbəyli hesab edir ki, Azərbaycan dövləti əhalinin sosial təminatının yüksəldilməsi istiqamətində reallaşdırdıqları işlərlə bölgədə liderdir. “Bilirsiniz ki, son dövrlər Azərbaycanda çoxuşaqlı ailələrin sayı azalmışdı. Ancaq dövlətin bu cür ailələrə göstərdiyi qayğı sayəsində indi çoxuşaqlı ailələrin sayında az da olsa artım var”- deyə F.Hacıbəyli vurğuladı.
İradə SARIYEVA
