Bakı Mühəndislik Universitetində Xocalı soyqırımına həsr olunmuş anım tədbiri keçirilib.
Tədbirdə universitetin müəllim və tələbə heyəti ilə yanaşı 27 il öncə Xocalı-Əsgəran yolunda anası ilə birgə əsir düşmüş, ermənilər səsini duymasınlar deyə anası tərəfindən boğulmuş 8 aylıq körpə Salatın Əhmədova da iştirak edib. Mərasimdə ilk öncə Xocalı soyqırımı qurbanlarının xatirəsi birdəqiqəlik sükutla yad edilib və ardından dövlət himni səsləndirilib.
Tədbiri giriş sözü ilə açan universitetin rektoru, professor Havar Məmmədov bildirib ki, tarixən davam edən Ermənistanın Azərbaycana olan ərazi iddiaları və təcavüzləri Dağlıq Qarabağ münaqişəsi dövründə ən dəhşətli həddə çatıb və tarixdə misli görünməmiş faciələrdən biri Xocalıda törədilib. Xocalı faciəsi XX əsrin ən dəhşətli faciələri sayılan Xatın, Xirosima faciələri ilə bir sırada durur. Belə ki, bir gecənin içində qədim Xocalı şəhəri yerlə-yeksan edilmişdi. Yollar erməni quldurlarının nəzarətində olduğundan, şəhəri tərk etməyə məcbur olan əhali dağlara, meşələrə qaçmışdı. Hər tərəfdə silahlı ermənilər dinc əhalini güllələmiş, onlara amansız divan tutmuşdular. Soyuq, qarlı fevral gecəsində yüzlərlə soydaşımız soyuqdan donaraq və düşmən gülləsinə tuş gələrək şəhid olmuş, əsir düşmüş, girov götürülmüşdü.
Rektor qeyd edib ki, ümummilli lider Heydər Əliyev 1 mart 1994-cü ildə Xocalı ilə əlaqədar xüsusi fərman verib və həmin fərmanla Azərbaycan Respublikası Milli Məclisinin qərarı ilə 26 fevral – Xocalı soyqırımı və milli matəm günü elan olunub, bu barədə bütün beynəlxalq təşkilatlara məlumat verilib. 25 fevral 1997-ci ildə isə “Xocalı soyqırımı qurbanlarının xatirəsinə sükut dəqiqəsi elan edilməsi haqqında” fərman imzalanıb. Beləliklə, Xocalı faciəsi hüquqi-siyasi qiymətini alıb və dünya ictimaiyyətinin diqqətinə çatdırılıb.
Universitetin İqtisadiyyat və idarəetmə fakültəsinin tələbəsi Səidə Babayeva çıxış edərək Xocalıda insanlığa qarşı törədilmiş vəhşiliklərdən danışıb. Vurğulayıb ki, Azərbaycan xalqı və dövləti Xocalı faciəsini heç vaxt unutmur və unutmayacaq.
Çıxışlardan sonra tədbir iştirakçıları BMU-nun Tələbə Dram Studiyası üzvlərinin Xocalı faciəsinin 27-ci il dönümü münasibətilə hazırladığı “Xocalı –sızlayan yaddaşımız” adlı ədəbi-bədii kompozisiyanı izləyiblər.
Tədbir Xocalı faciəsi zamanı 8 aylıq körpə olan Salatın Əhmədovanın çıxışı ilə sona çatıb. O bildirib ki, faciənin canlı şahidi olsa da, o dəhşətli gecədə baş verənləri anasından dinləyib. S.Əhmədova dəvətə və onun həyatını əks etdirən belə möhtəşəm kompozisiya hazırladıqlarına görə universitet rəhbərliyinə və tələbələrə təşəkkürünü bildirib.
