Fatimə Hacıbəyli: “Ziyarətə milyonlarla pul xərcləməkdənsə, həmin vəsaiti elmə, təhsilə yönəltmək olar”
Xəbər verdiyimiz kimi, Azərbaycanda Həcc ziyarətinə sənəd qəbulu başlayıb. Lakin bu il ötən ilə nisbətən qiymətlər bahadır. Belə ki, Həcc ziyarətinin qiyməti 4285 ABŞ dolları (təxminən 7300 manat) təşkil edir. Qeyd edilir ki, ziyarətin ötənilkindən bir qədər baha olması Səudiyyə Ərəbistanında xidmətlərin və otellərin qiymətlərinin bahalaşması ilə əlaqədardır.
Qeyd edək ki, ötən il Azərbaycandan Həcc ziyarətinə getmək üçün 1440 nəfərlik kvota qoyulmuşdu. Həcc ziyarətinin qiyməti isə 4150 dollar təşkil edirdi.
Qeyd etdiyimiz kimi, bu il Həcc ziyarətinin qiyməti 7300 manat təşkil edir. Bu rəqəm az deyil. Məlumdur ki, elə insanlar var ki, onlar dəfələrlə Həcc ziyarətində olub. Olmazmı ki, həmin şəxslər bir neçə dəfə deyil, bir dəfə ziyarətdə olsunlar? Həmin məbləği də öz vətənində ehtiyacı olan ailələlərə versinlər. Şəhid ailəsinə, uşaq və ya qocalar evinə müəyyən yardım edə bilər. Ekspertlər bildirirlər ki, dəfələrlə ziyarətdə olan insanın hansısa kasıba və ya köməyə ehtiyacı olana əl uzatması daha böyük savabdır.
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, bir neçə dəfə Həccə gedən adamlar izafi xərc edirlər: “Digər tərəfdən, Məhəmməd peyğəmbər ömrü boyu Həcc ziyarətində cəmi bir dəfə olub. Bir neçə dəfə ziyarətə getmək insanlara daha çox bəraət qazandırardısa, onların günahlarını yuyardısa, peyğəmbər də dəfələrlə bunu edərdi. Dini nöqteyi-nəzərdən Həccə bir dəfə getmək kifayətdir. Qalanlar hamısı izafi xərclərdir. Nə olsun 5 dəfə Həccə getmisən? Bunu edə bilərsən, amma gəlib başqa elə bir iş görərsən ki, hamısı ortadan çıxar. 5-6 dəfə Həccə getmək üçün, birincisi, pul lazımdır. Yaxşı olar ki, həmin insanlar ziyarətə xərclədiyi pulu kasıba, ehtiyacı olan versinlər. Bu gün ora xərclənən vəsaitə nə qədər ailəyə dəstək olmaq olar. Ziyarətə milyonlarla pul xərclənir. Həmin pulu elmə, təhsilə yönəltmək olar. Sabah savadlı, sağlam fikirlərə hakim gənclərimiz yetişər. İnsan var xəstəlikdən əziyyət çəkir, dərman almağa vəsait tapmır. Bu insanlara diqqət göstərmək olar. Onsuz da ərəblər bizim puldan bəhrələnirlər”.
Həmsöhbətimiz hesab edir ki, ziyarətə gedən insanların sayı azalarsa, qiymət endirilər.
Günel CƏLİLOVA
