Əpoş Vəliyev: “Aylıq uşaq pulunun bərpası üçün imzatoplama kampaniyası başlanıb” Vahid Əhmədov: “Uşaq pullarının bərpa olunması məsələsi Milli Məclisdə mütəmadi olaraq qaldırılır” Rəşad Həsənov: “Əhalinin sosial rifah halının yaxşılaşması üçün uşaq pulu yenidən bərpa olunmalıdır”
Azərbaycanda uşaq pullarının yenidən verilməsi gündəmdədir. Uşaq pulunun verilməsi dəfələrlə müzakirə olunub. İctimaiyyət nümayəndələri, millət vəkilləri, valideynlər belə, uşaq pulunun bərpa olunması ilə bağlı təklif irəli sürüblər.
Aylıq uşaq pulunun bərpası üçün imzatoplama kampaniyasına və petisiyaya başlanıb. 500 imza toplandıqdan sonra ölkə başçısına müraciət olunacaq. Belə bir kampaniyanı Azərbaycan Milli Elmlər Akademiyasının (AMEA) Folklor İnstitutunun aparıcı elmi işçisi, filologiya üzrə fəlsəfə doktoru Əpoş Vəliyev aparır.
Kampaniya ilə bağlı “Bakı-Xəbər”ə məlumat verən Ə.Vəliyev bildirdi ki, uşaq pulu yenidən bərpa olunmalıdır: “Zəmanəmizdə uşaq saxlamaq çox çətindir. Uşaq yeməkləri, ləvazimatları, geyimləri çox bahadır və bahalaşmaqda da davam edir. Bütün bunların qarşılığında isə valideynə övladını böyütməsi üçün heç bir dəstək verilmir. Mütəmadi olaraq bölgələrdə oluram. Ailələrin sosial durumu ilə yaxından maraqlanıram. Elə ailələr var ki, onlar övladına geyim almaqda çətinlik çəkir. Bu səbəbdən də uşaq pulunun yenidən bərpa olunmasının tərəfdarıyam.
Aylıq uşaq pulunun bərpası üçün imzatoplama kampaniyası başlanıb. Qeyd edim ki, bu kampaniya bir neə gündür start götürüb. İki gün ərzində aylıq uşaq pulunun bərpası üçün müraciəti 212 şəxs imzalayıb”.
Ə.Vəliyev petisiyanın mətnində əks olunanlarla bağlı məlumat verdi: “Dövlətin ən qiymətli sərvəti uşaqlardır. Ölkəmizdə uşağı sağlam, cəmiyyətə faydalı vətəndaş kimi böyütmək məsuliyyətli, mənəvi qüvvə və böyük xərc tələb edən bir işdir. Artıq uzun illərdir ölkəmizdə aylıq uşaq pulu – dövlət tərəfindən verilən müavinət ləğv edilib. Bu qərar həm uşaqların say artımına, həm də sağlam qidalanmasına mənfi təsir göstərib. Buna səbəb isə, heç şübhəsiz ki, uşaqların qida, ləvazimat və geyimlərinin çox baha olması, uşaqlar üçün tibbi sığortanın yox dərəcəsində olması, bağçalara, məktəblərə qəbul qaydalarının şəffaf olmaması, uşaq poliklinikalarında uşaqların qəbulunun və davamlı müayinəsinin pulsuz aparılmamasıdır.
Biz valideynlər uşaq pulunun bərpasını tələb edirik. Dövlət öz vətəndaşına, gələcəyin əsgərinə sahib çıxmalı, qayğısına qalmalı və onu sağlam qidalandıraraq böyüməsinə yardım etməlidir. Sağlam uşaq gələcəyin güclü ordusu deməkdir. Vətəni qorumaq üçün sağlam və igid Azərbaycan əsgəri yetişdirən valideynlərə yardım edilməlidir”.
Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov bildirdi ki, mütəmadi olaraq bu kimi təkliflər səsləndirilir: “Uşaq pullarının bərpa olunması məsələsi Milli Məclisdə mütəmadi olaraq qaldırılır. Baxıla bilər. Amma hələlik gündəlikdə yoxdur".
İqtisadçı-ekspert Rəşad Həsənov qəzetimizə açıqlamasında qeyd etdi ki, son zamanlar ölkənin sosial-iqtisadi inkişafı ilə bağlı müxtəlif işlər görülür: “Nəzərə almaq lazımdır ki, əhalinin standartları sürətlə dəyişir. Tənzimlənən bazar iqtisadiyyatından çıxan insanların qısamüddətli dövrdə bazar iqtisadiyyatına adaptasiyası asan baş vermir. Belə olan təqdirdə, demoqrafik problemlər yaranır, əhalinin təbii artım sürəti azalır. Hesab edirəm ki, bununla bağlı hökumət daha sağlam mövqe ortaya qoymalıdır. Nəzərə almaq lazımdır ki, əhalinin sosial vəziyyətinin yaxşılaşması ilə bağlı çoxlu sayda proqram həyata keçirilir. O proqramlardan biri də ünvanlı sosial yardımdır. Ancaq bu yetərli deyil. Zənnimcə, uşaq pulunun yenidən verilmə mexanizmi təsdiq olunmalıdır. Hazırkı şəraitdə uşaq pulunun yenidən verilməsi məqsədəuyğundur”.
İqtisadçının sözlərinə görə, son zamanlar ölkə başçısı əhalinin sosial vəziyyətinin yaxşılaşması ilə bağlı layihələr həyata keçirir. Bu dalğanın içərisində uşaq pulunun verilməsi ilə əlaqədar imzatoplama kampaniyasının başlanması əhalinin sosial-iqtisadi vəziyyətinin müsbətə doğru dəyişməsinə səbəb olar.
Günel CƏLİLOVA
