Mais Ağayev: “Bu il ölkəyə 300 avtobus gətiriləcək, bununla da Bakıətrafı kənd və qəsəbələrdə nəqliyyatın vəziyyəti müsbətə doğru dəyişəcək” İlqar Hüseynli: “Bakıətrafı qəsəbə və kəndlərdə istifadə müddəti bitmiş avtobuslar yeniləri ilə əvəz olunmalıdır”
Uzun illərdir Bakıətrafı kəndlərdə sərnişindaşıma məsələsi ilə bağlı müxtəlif problemlər mövcuddur. Təəssüf ki, sakinlərin narazılığına baxmayaraq, hələ də bu çətinlik tam olaraq aradan qaldırılmayıb. Əvvəllər sözügedən ərazilərə işləyən marşrut avtobuslarının sayı məhdud olsa da, son dövrlər avtobusların sayı artrırılıb.
Saatlarla mənzil başına çatmaq üçün “Koroğlu” metrostansiyası ətrafında marşrut gözləyən sərnişinlər indi bu halla qarşılaşmırlar. Yəni bu sarıdan artıq problem həllini tapıb. İndi başqa bir ciddi problem meydana çıxıb. Bu da Bakıətrafı kənd və qəsəbələrə işləyən marşrut avtobusların hədsiz dərəcədə köhnə olması, çoxunun öz istismar müddətini başa vurmasıdır. Buna baxmayaraq, bu avtobuslardan hələ də sərnişindaşımada istifadə olunur.
Hər gün işə, dərsə və ya müxtəlif məqsəd üçün evdən mərkəzə gəlmək üçün avtobusdan istifadə edənlər min-bir əziyyət çəkirlər. O da qeyd olunur ki, həmin avtobusları idarə edənlər, əslində, bu işin peşəkarı deyil.
Bakıətrafı qəsəbələrə hərəkət edən avtobusların köhnə olması sərnişinlərin haqlı narazılığına səbəb olur. Xüsusən də yay aylarında həmin avtobuslarda kondisioner olmadığı üçün, “hamam kimi” isti olurlar.
Bakıətrafı qəsəbələrə hərəkət edən avtobusların yenilənməsi dəfələrlə müzakirə olunub. Sərnişinlər və sürücülər yeni avtobusların verilməsini səbrsizliklə gözləyirlər.
Qeyd edək ki, Bakıətrafı qəsəbələrə hərəkət edən avtobuslarla bağlı redaksiyamıza dəfələrlə müraciət olunub. Xüsusən də “Koroğlu” metrostansiyasından Zabrat-Maştağa istiqamətinə hərəkət edən 198, 107, 148, 131, eyni zamanda, buradan Ramana qəsəbəsinə hərəkət edən 204, 166, “Qara Qarayev” metrostansiyasından Bahar qəsəbəsinə gedən 191 saylı avtobusların istifadəyə yararsız olması sərnişinləri narahat edir. Analoji problem Bakıətrafı qəsəbələrə hərəkət edən əksər avtobusda müşahidə olunur.
Xatırladaq ki, ötən il avqustun 8-də Prezident İlham Əliyevin imzaladığı sərəncama əsasən, 300 ədəd sərnişin avtobusunun alınması məqsədilə ilk olaraq Bakı Nəqliyyat Agentliyinə 47 924 000 manat ayrıldı. Həmin sərəncam əsasında Bakı şəhərində avtobus parkı qismən də olsa yeniləndi. Cari il ərzində avtobus parkının yenilənməsi üçün yeni avtobusların alınması gözlənir.
Bakı Nəqliyyat Agentliyinin mətbuat xidmətinin rəhbəri Mais Ağayev “Bakı-Xəbər”ə açıqlamasında qeyd etdi ki, Bakıətrafı kənd və qəsəbələrə hərəkət edən sərnişin daşıyıcılarının vəziyyəti ürəkaçan səviyyədə deyil. Bu problemin həll olunması istiqamətində hazırda müəyyən işlər aparılır: “Məlumdur ki, Bakıda avtobus parkının yenilənməsi ilə bağlı işlər aparılır. Avtobus parkının yenilənməsi çərçivəsində bu il yeni avtobusların gətiriləcəyi gözlənir. Bu il 300 avtobusun ölkəyə gətirilməsi nəzərdə tutulub. Avtobus parkının yenilənməsi ilə bağlı görülən işlər çərçivəsində Bakıətrafı kənd və qəsəbələrdə nəqliyyatın vəziyyəti müsbətə doğru dəyişəcək.
Xatırladım ki, Bakı Nəqliyyat Agentliyinin 3 il ərzində gördüyü işlər sayəsində Bakının mərkəzi küçələrində və kənar qəsəbələrdə ictimai nəqliyyatın durumu yaxşılığa doğru dəyişib. Bunu sərnişinlər də təsdiqləyirlər. Ancaq onu da demək lazımdır ki, ictimai nəqliyyatla bağlı görülən işlər yetərli deyil. Bu istiqamətdə işlər görülür”.
M.Ağayev onu da vurğuladı ki, avtobus parkının yenilənməsi ilə bağlı ötən il Prezident tərəfindən sərəncam verilmişdi: “Bu il də Bakının avtobus parkı yenilənəcək. Artıq tender bitib. Hazırda texniki məsələlər dəqiqləşdirilir. İl ərzində yeni avtobuslar paytaxt ərazisinə gətiriləcək. Xüsusi olaraq vurğulayım ki, gətiriləcək avtobuslar kart sistemi ilə çalışacaq”.
Sosial sahə üzrə ekspert İlqar Hüseynli bildirdi ki, Bakıətrafı qəsəbə və kəndlərdə avtobus problemi yaşanır. Problem əsasən həmin avtobusların köhnə olmasından ibarətdir: “Sərnişinlər çarəsizlikdən istifadə müddəti bitmiş daşıyıcılardan istifadə edirlər. Oturacaqların vəziyyəti olduqca bərbaddır, həmçinin, natəmizlik o dərəcədədir ki, sərnişin əyləşmək belə istəmir. Bəzi avtobuslar sınıq-salxaq vəziyyətdə olduğu üçün, sərnişinləri ünvana çatdıra bilmirlər. Avtobus yarı yolda xarab olduğu üçün, sərnişinlər yolda qalmalı olurlar. O da bəllidir ki, yol-qəza hadisələrinin bir qismi məhz istifadəyə yararsız daşıyıcılar üzündən baş verir. Bu kimi problemin həll olunması üçün Bakının avtobus parkı tam olaraq yenisi ilə əvəz olunmalıdır. Problemin həll olunmasında öncə vətəndaşların özləri maraqlı olmalıdırlar. Onlar istifadə etdikləri nəqliyyat vasitəsinin yenisi ilə əvəz olunması üçün aidiyyəti qurumlara müraciət etməlidirlər”.
Günel CƏLİLOVA
