“Əfqanıstan Veteranlar Cəmiyyətinə Azərbaycan Prezidentinin ehtiyat fondundan ayrılan 1 milyon manat Birliyin inkişafına və veteranların sosial vəziyyətinin yaxşılaşmasına səbəb olacaq”
Məlum olduğu kimi, Prezident İlham Əliyev Əfqanıstan müharibəsində həlak olmuş hərbi qulluqçuların ailələrinin sosial müdafiəsinin gücləndirilməsi ilə bağlı fərman və sərəncam imzalayıb. Sərəncamda qeyd olunur ki, Əfqanıstanda müharibənin başa çatmasının 30 illiyi ilə əlaqədar Azərbaycan Əfqanıstan veteranlarına dövlət qayğısının artırılması, Azərbaycan Əfqanıstan Veteranları İctimai Birliyinin maddi-texniki bazasının gücləndirilməsi, habelə Birliyin fəaliyyətinin təkmilləşdirilməsi üçün cari məsələlərin həlli və nəzərdə tutulan tədbirlərin həyata keçirilməsinin təmin olunması məqsədilə Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Prezidentinin ehtiyat fondundan Azərbaycan Əfqanıstan Veteranları İctimai Birliyinə 1 milyon manat ayrılsın. Əfqanıstan Veteranları İctimai Birliyinin üzvü, müharibəsi veteranı Rasim İsgəndərov “Bakı-Xəbər”ə açıqlamasında bildirdi ki, dövlət tərəfindən hər zaman Əfqanıstan müharibəsində iştirak etmiş şəxslərə qayğı göstərilirdi: “Fevralın 21-dən imzalanan sərəncam sübut edir ki, hərbçilərə dövlətin diqqəti yüksək səviyyədədir. Ümumiyyətlə, son zamanlar Qarabağ müharibəsi iştirakçılarına, eyni zamanda Əfqanıstan müharibəsində iştirak etmiş hərbçilərə dövlət tərəfindən xüsusi qayğı göstərilir. Sərəncama əsasən, Əfqanıstan Veteranlar Cəmiyyətinə Azərbaycan Prezidentinin ehtiyat fondundan 1 milyon manat ayrıldı. Bu vəsait Cəmiyyətin inkişafına və veteranların sosial vəziyyətinin yaxşılaşmasına səbəb olacaq. Eyni zamanda, Əfqanıstan müharibəsi zamanı şəhid olmuş hərbçi qulluqçuların ailələrinə də yardım ediləcək”.
R.İsgəndərov onu da vurğuladı ki, Əfqanıstan müharibəsi iştirakçılarının mənzil problemi yaşanırdı. Prezidentin məlum sərəncamı Əfqanıstan müharibəsində iştirak etmiş hərbi qulluqçuların, əlillərin, şəhid olan şəxslərin mənzil problemini də həll edəcək: “Əfqanıstan müharibəsi iştirakçılarının sosial vəziyyətinin yaxşılaşması ilə bağlı imzalanan sərəncama görə biz cənab Prezidentə təşəkkür edirik”.
Günel CƏLİLOVA
