“Əfqanıstanda sovet qoşunlarının tərkibində beynəlmiləl borcunu yerinə yetirərkən həlak olan, itkin düşmüş hərbi qulluqçuların ailəsinə verilən təqaüd məbləğinin artırılması qürurvericidir”
Xəbər verildiyi kimi, Prezident İlham Əliyev Azərbaycan Əfqanıstan veteranlarına dövlət qayğısının artırılması ilə bağlı əlavə tədbirlər haqqında sərəncam imzalayıb.
Sərəncama əsasən, Əfqanıstanda müharibənin başa çatmasının 30 illiyi ilə əlaqədar Azərbaycan Əfqanıstan veteranlarına dövlət qayğısının artırılması, Azərbaycan Əfqanıstan Veteranları İctimai Birliyinin maddi-texniki bazasının gücləndirilməsi, habelə Birliyin fəaliyyətinin təkmilləşdirilməsi üçün cari məsələlərin həlli və nəzərdə tutulan tədbirlərin həyata keçirilməsinin təmin olunması məqsədilə Azərbaycan Respublikasının 2019-cu il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Azərbaycan Əfqanıstan Veteranları İctimai Birliyinə 1,0 (bir) milyon manat ayrılıb.
O cümlədən, Əfqanıstanda sovet qoşunlarının tərkibində beynəlmiləl borcunu yerinə yetirərkən həlak olan, itkin düşmüş və məhkəmə qaydasında ölmüş elan edilən hərbi qulluqçuların ailəsi üçün Azərbaycan Respublikası Prezidentinin təqaüdünün aylıq məbləği artırılaraq 2019-cu il martın 1-dən 300 manat müəyyən edilib.
Qeyd edək ki, həmin məbləğ indiyə kimi 220 AZN təşkil edirdi.
Dövlət başçısının verdiyi sərəncam və fərmanla bağlı “Bakı-Xəbər”ə açıqlama verən Əfqanıstan Veteranlari İctimai Birliyinin sədri Məhəmməd Vəliyev qeyd etdi ki, Prezident İ.Əliyevin müharibə iştirakçılarının sosial vəziyyətinin yaxşılaşdırılması ilə bağlı bu günlərdə imzaladığı Fərman və Sərəncam biz veteranlara ali diqqət və qayğının bariz nümunəsidir. Bu sərəncam sayəsində dövlət başçısı bir daha təsdiq etdi ki, veteranların, şəhid ailələrinin daim yanındadır: “Cənab Prezident İlham Əliyev mütəmadi olaraq Əfqanıstan müharibəsi veteranlarına və bu müharibədə həlak olanların ailələrinə diqqət və qayğı göstərir. Biz bu sevgi və diqqəti daim hiss edirik”.
M.Vəliyevin sözlərinə görə, Əfqanıstanda sovet qoşunlarının tərkibində beynəlmiləl borcunu yerinə yetirərkən həlak olan, itkin düşmüş hərbi qulluqçuların ailəsinə verilən təqaüd məbləğinin artırılması qürurvericidir. Bu ailələr sizin qəzet vasitəsilə Prezident İlham Əliyevə öz sonsuz minnətdarıq hisslərini çatdırırlar.
Birlik sədri onu d vurğuladı ki, Azərbaycan Əfqanıstan Veteranları İctimai Birliyinə 1 milyon manatın ayrılması, eyni zamanda, müharibədə iştirak etmiş və həyatını itirmiş şəxslərin ailələrinə verilən təqaüdün artırılması bir daha sübut edir ki, ölkə rəhbərimiz hər bir azərbaycanlının prezidentidir.
Günel CƏLİLOVA
