Osman Gündüz: “İnternetdə təhlükəsizliyin təmin olunması üçün müəyyən texniki addımlar atılmalıdır”
Xəbər verildiyi kimi, Azərbaycanda “təhlükəsiz internet” mexanizmi yaradılır. Parlamentin fevralın 19-da keçirilən növbəti plenar iclasında “Gənclər siyasəti haqqında” Qanuna dəyişiklik layihəsi ikinci oxunuşda müzakirəyə çıxarılıb.
Qanun layihəsi barədə media nümayəndələrinə parlamentin Gənclər və idman komitəsinin sədri Ülvi Quliyev məlumat verib. O bildirib ki, dəyişikliklərə uyğun olaraq, müvafiq icra hakimiyyəti orqanları 18 yaşınadək şəxslərin mənəvi-əxlaqi tərbiyəsinə, onların fiziki və psixi sağlamlığına təhlükə yaradan zərərli informasiyalardan qorunmasını təmin etmək üçün “təhlükəsiz internet” mexanizminin yaradılmasını təmin edəcəklər: “Bundan əlavə, ölkədə 18 yaşınadək şəxslərin idman mərc oyunlarında birbaşa və ya dolayı iştirakına yol verilməyəcək”.
Azərbaycanda “təhlükəsiz internet” mexanizmi yaradılması barədə fikir bildirən Azərbaycan İnternet Forumunun prezidenti Osman Gündüz “Bakı-Xəbər”ə açıqlamasında qeyd etdi ki, internetdə təhlükəsizliyin təmin olunması üçün müəyyən texnoloji addımlar atılmalıdır: “Xatırladım ki, bu yaxınlarda “Uşaqların zərərli informasiyadan qorunması haqqında” Qanun qəbul olunub, eyni zamanda, “Telekommunikasiya haqqında” qanuna dəyişiklik olunub. Həmin qanunlarda nəzərdə tutulur ki, uşaqların internetdə təhlükəsizliyinin təmin olunması üçün müəyyən texniki addımlar atılmalıdır. Həmin işlər əsasən zərərli informasiyalardan təmizlənmiş internet olacaq. Nəzərə almaq lazımdır ki, hazırda orta məktəblərdə yalnız süzgəcdən keçirilmiş internetdən istifadə olunur. Məktəblərə internet bir nöqtədən verilir və həmin internet təmizlənmiş internet sayılır. Bu qaydanın bütün ölkə üzrə şamil olunması isə sual doğurur. Çünki bizim provayderlər buna hazır deyil. Provayderlərin hər biri interneti süzgəcdən keçirmək imkanına malik deyil. Bu səbəbdən qanunvericilik tələb edir ki, provayderlər bu işə hazırlansın. Onlar öz ofislərində yeni avadanlıqlar qurmalıdırlar ki, vətəndaş təmiz internet istəyəndə onu verə bilsinlər. Təhlükəsiz internet deyəndə süzgəcdən keçirilmiş internet nəzərdə tutulur”.
Günel CƏLİLOVA
