Fatimə Hacıbəyli: “Azərbaycanda “donuz qripi” var deyənlər bu şayiəni ona görə yayırlar ki...” “Bu gün Cənubi Qafqazda ən çox turist axınının Azərbaycana olması xaricdə oturub bizi pisləyən bəzi qara qüvvələri ciddi narahat edir”
Azərbaycanı istəməyən qüvvələr ölkəmizin imicinə xələl gətirmək üçün müxtəlif üsullardan istifadə edirlər. Son günlər sosial şəbəkələrdə, eləcə də bəzi saytlarda Azərbaycanda “donuz qripi” olması (?) ilə bağlı xəbərlər yayılır. Hətta onlar bir nəfər gənc xanımın “donuz qripi”ndən dünyasını dəyişdiyini iddia edirlər. Guya ki, ölkəmizdə “donuz qripi” var və bununla bağlı xəstəxanalara müraciət edənlər olub. Səhiyyə Nazirliyi rəsmiləri isə bu iddianın əsassız olduğunu bildiriblər.
“Azərbaycanda “donuz qripi” var” deyənlər kimlərdir və onların məqsədi nədir?
Ekspertlərin bildirdiyinə görə, ölkəmizdə nə “donuz qripi” var, nə də onunla bağlı hər hansı bir təhlükə. Onlar qeyd edirlər ki, bu həqiqətə uyğun olmayan xəbəri Azərbaycanı istəməyən xarici ölkələrdən maliyyələşən bəzi qüvvələr yayır və onların da məqsədi xarici ölkələrdən Azərbaycana gələn turist axınının qarşısını almaqdır.
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə bildirdi ki, Azərbaycanın günü-gündən inkişaf etməsi, şəhərlərimizin, bölgələrimizin abadlaşdırılması bəzi xarici qüvvələri ciddi narahat edir. Onun sözlərinə görə, bu gün reallıq ondan ibarətdir ki, ölkəmiz dünyada həm mədəniyyəti, həm tarixi, həm turizm potensialı baxımından tanınır. O qeyd etdi ki, bu baxımdan, Azərbaycana maraq göstərənlər çoxdur. “Azərbaycanda “donuz qripi”nin yayılması ilə bağlı təhlükə olardısa, ilk olaraq buna qarşı mübarizə tədbirləri gücləndirilər və bu barədə əhaliyə xəbərdarlıq edilərdi. Bilirsiniz ki, dövlətimiz insanlarımızın, bütün mənalarda, qayğısına qalır. Bu baxımdan, inanmıram ki, bizdə belə bir təhlükə olsun. Düşünürəm ki, bu məlumatı yayan Azərbaycanı istəməyən, onun inkişafını gözü götürməyən qüvvələrdir. Bu gün Azərbaycana güclü turist axını var. Müsbət haldır ki, ilin bütün fəsillərində ölkəmizə gələn turistlərin sayı çoxdur. “Azərbaycanda “donuz qripi” var deyənlər bu şayiəni ona görə yayırlar ki, ölkəmizə turist axınının qarşısını alsınlar. Belə yalan xəbərləri dövriyyəyə buraxmaqla, ölkəmizə gələn turistlərin diqqətini başqa ölkələrə yönəltmək məqsədi güdürlər. Qara qüvvələrin sosial şəbəkələr və saytlar vasitəsilə yaydıqları bu şayiələrin heç bir əsası olmadığı məlumdur. Bəzi ölkələr var ki, onlar Azərbaycanı gözdən salmaq üçün müxtəlif vasitələrə əl atır. Onlardan biri də hazırda dövriyyəyə buraxılan “donuz qripi” şayiəsidir” - deyə bildirən F.Hacıbəyli qeyd etdi ki, il ərzində Azərbaycana dünyanın müxtəlif ölkələrindən minlərlə turist gəlir. O vurğuladı ki, Novruz bayramı ilə əlaqədar, ənənəvi olaraq, ölkəmizə həm Şərq, həm də Avropa ölkələrindən turistlər axın edəcəklər. Bu şayiəni yayanların məqsədi isə ölkəmizə gələn turistlərin yolunu kəsməkdir. “Turistlərin ölkəmizə axını büdcəmizə xeyir verir, eyni zamanda da onlar Azərbaycanı gəzir, tarix-mədəniyyət abidələrimizlə, muzey və teatrlarımızla, təbiətimizlə yaxından tanış olur, öz ölkələrinə getdikdən sonra Azərbaycanın təbliği ilə məşğul olurlar. Bilirsiniz ki, bu gün Cənubi Qafqazda ən çox turist axınının Azərbaycana olması xaricdə oturub bizi pisləyən bəzi qara qüvvələri ciddi narahat edir və onlar da turistlərin səfərinin qarşısını almaq üçün şayiələrə, yalanlara əl atırlar” - deyə müsahibimiz qeyd etdi.
İradə SARIYEVA
