Son həftələr Azərbaycan Dillər Universiteti (ADU) ilə bağlı müxtəlif qalmaqallı xəbərlər yayılmaqdadır. Səsləndirilən əsas iddialar ADU-da təhsilin keyfiyyətinin aşağı olması, burada təhsil alan tələbələrin dörd il müddətində xarici dilləri mənimsəməməsi, eləcə də universitetin elmi şurasında elmi işlərin 90 faizinin təmənna qarşılığında müdafiə edilməsi ilə bağlıdır.
Filologiya üzrə fəlsəfə doktoru, ADU-nun Filologiya və Jurnalistika fakültəsinin keçmiş dekanı, ADU-nun dosenti və YAP Qadınlar Şurasının sədri Vüsalə Ağabəylinin bu ali məktəbdə tədrisin keyfiyyətinin aşağı olması, burada elmlə məşğul olanlara şərait yaradılmaması ilə bağlı mətbuata verdiyi açıqlama əməlli-başlı qalmaqala səbəb olub. Qeyd edək ki, V.Ağabəyli bu ali məktəbdə baş verənlərlə əlaqədar ölkəmizin Birinci vitse-prezidenti Mehriban Əliyevaya da müraciət ünvanlayıb.
“Məsələnin ictimailəşdirilməsinə ilk başdan tam qarşı olsam da, mövzudan tam xali olmayan insanların da qoşulması, haqsız münasibət bildirməsi məni cavab verməyə məcbur edir. Bizim istəyimiz ən yüksək səviyyədə tam obyektivliklə vəziyyətin araşdırlması, Azərbaycan Dillər Universitetində rektor Kamal Abdullayevin bir sıra yüksək peşəkar kadrlara münasibətdə yaratdığı dözülməz vəziyyət, xarici dil tədrisinin formalaşmış yaxşı ənənələrinin səriştəsizliklə dağıdılması və təhsilin gələcəyinə törədilən təhlükələrə diqqət yönəldilməsidir. Qurama ittihamlarında şərə, böhtana əsaslanan K.Abdullayevin haqsızlığının əlavə sübutu ondan ibarətdir ki, o bir nəfərə qarşı başladığı qeyri-obyektiv hücumlarında dəstəsini getdikcə böyütməyə çalışır. Əgər doğrudan da haqlı idinizsə, faktlar sizin tərəfinizdədirsə, niyə tabeliyinizdə olan tərəfdarlarınızdan əlavə, bu dəstəyə real vəziyyətdən yetərincə məlumatlı olmayan, özəl münasibətləriniz olan deputatlar qrupunu da qoşmusunuz? Yoxsa deyəcəksiniz onlar mənim əleyhimə çıxışları elə vicdanlarının səsinə qulaq asaraq, ADU-dakı problemləri daim izlədikləri və dərindən bildikləri səbəbindəndir?
Axı bu qədər adamın bir nəfər əleyhinə belə hücumlarını təşkil etməyinizin çürük və asanlıqla ifşa ediləcək bir saxta kampaniya olması məntiqlə düşünən hər kəsə aydındır. Sizə münasibətlərinizdən sui-istifadə edərək bu oyununuza cəlb etdiyiniz hörmətli şəxsləri heç də yaxşı olmayan vəziyyətə gətirməyinizin fərqindəsinizmi? Məsələyə münasibət bildirməyə cəlb edilmiş deputatların Kamal Abdullayevlə yaxın münasibətləri aydındır, lakin bir mühüm məqama diqqəti çəkmək istəyirəm ki, siz axı millətin vəkillərisiniz, sizin əsas vəzifəniz, məncə, dostluq münasibətləriniz öz yerində, haqqı tapdanılan insanlara dəstək olmaqdır. Niyə bu sual sizləri düşündürmür ki, Kamal müəllim haqlıdırsa, niyə 34 yaşlı bir ziyalı xanıma qarşı az qalsın bir batalyonla hücuma keçib?” - deyə o qeyd edib.
O bildirib ki, K.Abdulla bir universitet rəhbəri olaraq, universitetdə sabitliyi bərqərar etmək əvəzinə, onu özü pozur. “Niyə rektor və dekan arasında baş verən kiçik bir mübahisəli məsələni universitetin müəllim-tələbə heyətinə və daha sonra mediaya daşımalı idi ki? Bu da, əslində, onun idarəçiliyinin düzgün olmamasına dəlalət etmirmi? Mənim iş otağımın qapısının qırılaraq açdırılması, açarların dəyişdirilməsi, hələ mən vəzifədə ola-ola xəstə olmağımdan istifadə edərək, yerimə başqa birinin təyin edilməsi bəs necə, rəhbərə yaraşan addımdır?”
V.Ağabəyli ADU rəhbərliyi tərəfindən haqsızlıqla üzləşdiyini deyib.
Qeyd edək ki, mətbuatda ADU-nun “Keyfiyyətə təminat” bölməsinin əməkdaşı Cəmilə Qədirlinin də məlum olmayan səbəbdən işdən çıxarıldığı haqqında məlumatlar yayılıb. Mətbuatın yazdığına görə, səhər işə gələn C.Qədirlini mühafizəçilər binaya buraxmaq istəməyiblər. Yazılana görə, mühafizəçilərin tələbinə məhəl qoymayan xanım əməkdaş 4-cü mərtəbədəki iş otağına qalxıb və burada onun vəziyyəti pisləşib, o hətta huşunu itirib. “Vəziyyət o həddə çatıb ki, binaya təcili tibbi yardım briqadası çağırılıb” - deyə mətbuatda bildirilir.
Həm V.Ağabəyli, həm də C.Qədirli olayının medianın gündəminə çıxması ADU ətrafında müxtəlif söz-söhbətlər, qalmaqallar yaranmasına səbəb olub.
V.Ağabəylinin ADU-ya və onun rəhbərliyinə qarşı irəli sürdüyü iddialar nə dərəcədə əsaslıdır? Doğrudanmı, bu ali məktəbdə təhsil alan tələbələr xarici dil öyrənmədən məzun olurlar?
ADU-nun tədris işləri üzrə prorektoru, professor Əfqan Abdullayev “Bakı-Xəbər”ə bildirdi ki, bu məsələ ilə bağlı şərh vermək istəmir: “Mən bu barədə heç bir fikir bildirmək istəmirəm. Qalmaqallara mən münasibət bildirməli deyiləm. O ki, qaldı tədrisin keyfiyyətinin aşağı olması ilə bağlı iddialara, bu haqda da bir söz demək fikrində deyiləm. Sizi universitetə dəvət edirəm, buyurun gəlin, görün burada necə dərs keçilir”.
Açıq deyək ki, Dillər Universitetinin adı ictimaiyyət arasında tədrisin şəffaflığı və təmizliyi ilə tanınan universitet kimi çəkilir. Bu halda, sabiq dekanın söylədikləri bizim üçün də maraqlı və təəccüblü oldu. Odur ki, hörmətli prorektorla söhbətimizdə gələn həftə universitetdən oxucularımız üçün geniş bir reportaj hazırlayacağımızı bildirdik.
İradə SARIYEVA
