Məlahət Mürşüdlü: “Dövlət sifarişlərinin artırılması çox istedadlı, amma maddi vəziyyəti əlverişli olmayan gənclərin təhsil almasına şərait yaradacaq”
Ötən illə müqayisədə dövlət sifarişli yerlər növbəti tədris ili üçün 12324-dən 20500-ə kimi artırılıb. Bu barədə təhsil naziri Ceyhun Bayramov “Günün nəbzi” verilişində deyib. Nazir bildirib ki, 2019-2020-ci tədris ili üçün dövlət sifarişli yerlərlə bağlı sənəd müvafiq olaraq Nazirlər Kabinetində təsdiq olunma mərhələsindədir:
“Bir il ərzində dövlət sifarişli yerlərdə 65 faizdən artıq artım görürük. Hesab edirik ki, növbəti illərdə də müsbət tendensiya davam edəcək. Yalnız növbəti ilin proqnoz yerlərindən danışılırsa, dövlət sifarişli yerlərin sayı 42 faiz müəyyən edilib. 2018-2019-cu təqvim ili üçün bu rəqəm 30 faizin altında idi. Bu da bir il ərzində əlavə sifarişli yerlərin olması deməkdir. Bu, dövlət vəsaiti hesabına təhsilin müxtəlif istiqamətlərində gənclərə ali təhsil imkanlarının verilməsi və genişlənməsidir”.
Sözügedən qərar bu sahədə ciddi yeniliklərin olacağından xəbər verir. Məsələ ondadır ki, son illərə qədər ödənişli ixtisasların sayı ilbəil artırdı. Bu da cəmiyyətdə birmənalı qarşılanmırdı. Çünki bir çoxlarının ödənişli əsaslarla təhsil almaq imkanının olmaması son nəticədə onların təhsildən kənarda qalmasına gətirib çıxarır. Müşahidələr göstərir ki, dövlət sifarişli yerlərə tələbat daha böyükdür. O baxımdan, belə bir qərarın verilməsi böyük marağa səbəb olub.
Maraqlıdır, bəs ekspertlər dövlət sifarişli yerlərin növbəti tədris ili üçün 12324-dən 20500-ə kimi artırılmasını necə dəyərləndirirlər?
Məsələyə münasibət bildirən təhsil məsələləri üzrə ekspert Məlahət Mürşüdlünün sözlərinə görə, dövlət sifarişli yerlərin sayının artırılması müsbət haldır: “Belə bir qərarın verilməsi həm vacib idi, həm də gözlənilən. Yaxşı ki, bununla bağlı belə bir qərar verildi. Ancaq, bununla belə, hesab edirəm ki, dövlət sifarişli yerlərin 12324-dən 20500-ə kimi artırılması yenə də yetərli deyil. Yəni yeri gələndə bu da azdır. Hesab edirəm ki, növbəti tədris illərində bunun sayı daha da artırılmalıdır. Dövlət sifarişlərinin artırılması çox istedadlı, amma maddi vəziyyəti əlverişli olmayan gənclərin təhsil almasına şərait yaradacaq. Çünki nə qədər belə vətəndaş var ki, maddi sıxıntılar üzündən ali təhsil ala bilmir. Dövlət sifarişləri az olduğuna görə ballar çox yüksəkdir. Məlum qərar, öz növbəsində, daha çox sayda ölkə vətəndaşının ali təhsil almasına şərait yaradacaq. Nə qədər çox gənc ali təhsil alsa, bu bir o qədər ölkənin inkişafına, tərəqqisinə öz töhfəsini verəcək. Ona görə də belə bir qərarın verilməsinə müsbət yanaşıram. Məndən olsa, bütün yerlər dövlət sifarişi ilə olmalıdır. Azərbaycan Konstitusiyasında yazılıb ki, təhsil pulsuzdur. O baxımdan hesab edirəm ki, bütün yerlər pulsuz olmalıdır”.
Vidadi ORDAHALLI
