Kamran Əsədov: “Tələbə təqaüdünün artırılması təhsilin keyfiyyətinin artırılmasına birbaşa yönələcək”
Prezident İlham Əliyevin Azərbaycan gəncliyinə və təhsil ictimaiyyətinə diqqət və qayğısı davam edir. Dövlət başçısı doktorantlara, ali təhsil, orta ixtisas və peşə təhsili müəssisələrində, həmçinin, Azərbaycan Milli Elmlər Akademiyasının magistratura səviyyəsində təhsil alan tələbələrə təqaüdlərin verilməsi haqqında sərəncam imzalayıb.
Qeyd edək ki, 110 minə yaxın təhsilalanın təqaüdü artırılıb. Sərəncama əsasən, elmlər doktoru hazırlığı üzrə doktorantlara 300 manat, fəlsəfə doktoru hazırlığı üzrə doktorantlara isə 180 manat təqaüd təyin edilib. Ali təhsil müəssisələrində və Milli Elmlər Akademiyasında adlı təqaüd alan tələbələrə 170 manat təqaüd veriləcək. Magistratura səviyyəsi üzrə isə akademik göstəriciləri 91-100 bal olan tələbələrə - 145 manat, 71-100 bal olan tələbələrə - 120 manat, 51-100 bal olan tələbələrə isə 80 manat təqaüd müəyyən edilib. Bakalavriat səviyyəsində təhsil alanların da təqaüdləri artırılıb. Bu səviyyə üzrə akademik göstəriciləri 91-100 bal olan tələbələr 130 manat, 71-100 bal olan tələbələr 110 manat, 51-100 bal olan tələbələr isə 75 manat təqaüd alacaqlar.
Orta ixtisas təhsili müəssisələrində isə akademik göstəriciləri 91-100 bal olan tələbələrə 75 manat, 71-100 bal olan tələbələrə 60 manat, 51-100 bal olan tələbələrə 50 manat təqaüd veriləcək. Peşə təhsili müəssisələrinin tələbələrinə isə 50 manat təqaüd təyin edilib.
Dövlət başçısı, həmçinin, ali təhsil müəssisələrində təqaüd sisteminin təkmilləşdirilməsi ilə bağlı əlavə tədbirlər barədə də sərəncam imzalayıb. Sərəncama əsasən, ali təhsil müəssisələrində müvəffəqiyyət göstəriciləri əsasında dövlət hesabına maliyyələşən təqaüd yerlərinin sayı 2019-cu il martın 1-dən 16 min vahid artırılıb. Eləcə də təqaüd alan tələbələrin sayının tələbələrin ümumi sayına olan nisbətinin hazırkı 31 faizdən 2019/2020-ci tədris ilində 45 faizə, 2020/2021-ci tədris ilindən başlayaraq isə 50 faizdən az olmayan səviyyəyə çatdırılması qərara alınıb.
Prezident İlham Əliyevin imzaladığı Fərmanla "Ali məktəb tələbələri üçün Prezident təqaüdünün təsis edilməsi haqqında" Prezidentin 2001-ci il 3 sentyabr tarixli, 564 nömrəli Fərmanında dəyişiklik edilib. Dəyişikliyə əsasən, Prezident təqaüdünün məbləği artırılaraq 185 manatdan 210 manata çatdırılıb. Fərman martın 1-dən qüvvəyə minir.
110 minə yaxın tələbənin təhsil haqqının artırılması təhsilin keyfiyyətinə, tələbələrin sosial rifahının yüksəlməsinə səbəb olacaq.
Təhsil eksperti Kamran Əsədov “Bakı-Xəbər”ə açıqlamasında qeyd etdi ki, Azərbaycanda fəaliyyət göstərən 54 ali təhsil müəssisəsində 164 min tələbə təhsil alır. Onların yalnız 31 faizi ödənişsiz təhsil aldığı üçün təqaüd alır.
Həmsöhbətimizin sözlərinə görə, Prezident İ.Əliyevin tələbələr, magistr və doktorantlarla bağlı verdiyi qərar təhsilalanların həyat şəraitinə müsbət təsir edəcək: “Tələbənin maddi problemi olmazsa, onlar təhsilin keyfiyyətinin artırılmasına maraq göstərəcəklər. Tələbələr özlərini təkmilləşdirmək üçün hazırlıq kursuna gedəcək, xarici dil öyrənmək istəyəcəklər. Həmçinin, onların sosial problemləri də həll olunacaq. Tələbə təqaüdünün artırılması təhsilin inkişafına kömək edəcək”.
Təhsil eksperti hesab edir ki, tələbə təqaüdünün artırılması mütərəqqi addımdır. Tələbə təqaüdünün artırılması imkan verəcək təhsilin əhatə dairəsi genişləndirilsin. Tələbələr həmin artımı özlərinin səmərəli inkişafı üçün sərf edəcəklər: “Tələbə təqaüdünün artırılması təhsilin keyfiyyətinin artırılmasına birbaşa yönələcək. O da bəllidir ki, bəzi hallarda tələbələr maddi imkanı yetərincə olmadığı üçün, tez-tez dərsə gələ bilmirdilər. Artıq tələbə təqaüdü məbləğinin artımı onların sosial qayğılarını azaldacaq”.
K.Əsədov bildirdi ki, tələbələrə dövlət tərəfindən təqaüd verilməklə yanaşı, onlara əlavə təqaüd də verilir: “Bəllidir ki, ali təhsil müəssisələrinə qəbulda 500 və daha yüksək bal toplayan, ixtisas seçimində birinci müəllimlik ixtisasını qeyd edən tələbələrə 100 manat məbləğində əlavə təqaüd verilir. Həmçinin, SABAH qrupunda oxuyanlara əlavə olaraq 50 manat dəyərində təqaüd verilir. Bununla yanaşı, “Azercell” və SOCAR-ın layihələri əsasında tələbələrə maddi dəstək olaraq əlavə təqaüd verilir. Yaxşı akademik göstəricisi olan tələbə 500 manata yaxın təqaüd ala bilər. Bu kifayət qədər böyük rəqəmdir. Bununla yanaşı, tələbə təqaüdünün də artırılması sevindirici bir addımdır”.
Günel CƏLİLOVA
