Fazil Talıblı: “Heyvana yaxşı qulluq etməyibsə, bunun günahını niyə nazirlikdə axtarmaq lazımdır?”
Son vaxtlar Əmək və Əhalinin Sosial Müdafiəsi Nazirliyinin özünüməşğulluq proqramının icrası çərçivəsində layihəyə qatılanlara xəstə və yaşlı mal-qara verilməsi ilə bağlı məlumatların yayıldığını müşahidə edirik. Bu məlumatlara daha çox sosial şəbəkə və bəzi internet media resurslarında rast gəlirik.
Bu mövzunu əhatən edən son şikayətlərdən birini Ucar rayonunun Lək kənd sakini Sevinc Həsənova edib. Şikayətçi deyir ki, ona verilən heyvanlar xəstədir. Şikayətçinin təqdim etdiyi fotolardan da görünür ki, inəklər arıq və xəstə durumdadır. Bundan əvvəl də yayılan məlumatlarda bildirilirdi ki, vətəndaşlara qısır, balası olmayan inək və qoyunlar, "süddən yanıq" dana, toğlular təklif edilib. Hansı ki, sənədləşmədə heyvanın yanıbalalı, üstəlik, sağlam olduğu əksini tapıb. İddia olunurdu ki, sənədi oxumadan imzalayan vətəndaş sonradan heyvanı geri qaytara bilmir, qazanıb ailəsini dolandırmaq əvəzinə xərcə düşür.
İddialardan biri də bazardan 500-600 manata alınan heyvanların sənədlərdə 3-5 min manat arasında rəsmiləşdirilməsilə bağlı idi. Bütün bu suallara cavab tapmaq üçün Əmək və Əhalinin Sosial Müdafiəsi Nazirliyinin mətbuat katibi Fazil Talıblı ilə əlaqə saxladıq. O, “Bakı-Xəbər”ə açıqlamasında səsləndirilən iddialarla razılaşmadığını bildirdi: “Deyilən proqram çox uğurla icra olunur. Ötən il 7300 vətəndaş özünüməşğulluq proqramı çərçivəsində biznes planını müdafiə edib. Onlardan 6 mininə aktivlər təqdim olunub. Bu, ailə biznesinin formalaşdırılmasına böyük dəstək sayılır. Proqrama əsasən, vətəndaşlar öz potensiallarına uyğun olaraq müəyyən etdikləri iqtisadi fəaliyyət sahəsi üzrə təlimlərdə iştirak edirlər. Təlimləri bitirdikdən sonra isə öz biznes planlarını müdafiə edirlər. Bunu müsbət müdafiə etdikdən sonra dövlət tərəfindən aktivlərlə təltif olunurlar. Ölkəmizin regionlarında kənd təsərrüfatı prioritet məşğulluq sahəsi təşkil etdiyi üçün, layihə çərçivəsində heyvandarlığa böyük önəm verilir. Təkcə ötən il 20 mindən artıq mal-heyvan vətəndaşlara təqdim edilib”.
Bu sahədə şikayətlərin olduğundan xəbər tutduqlarını deyən Fazil Talıblı bildirdi ki, belə məlumatlar daha çox sosial şəbəkələr və saytlar üzərindən olunur: “Həmin şikayətləri dərhal araşdırırıq. Məlumatı yayan KİV-ə və şikayətçinin özünə bu barədə ətraflı xəbər veririk. Məlumat üçün deyim ki, paylanan 20 mindən artıq mal-qaradan cəmi 119-da problem aşkar edilib və neqativlik dərhal aradan qaldırılıb, şikayətçiyə yeni heyvan verilib. Təəssüflə deyə bilərəm ki, bir çox hallarda bundan sui-istifadə də edirlər. Belə ki, heyvanları alarkən akta qol çəkən, heç nəyə etiraz etməyən vətəndaş görürsən ki, sonradan şikayətçi olur. Biz şəffaflığı təmin etmək üçün həmin heyvanların verilmə anını videoya da çəkirik. Həmin çəkilişlərdə görürük ki, vətəndaş heyvanlardan razılıq edir. Üstündən bir neçə ay keçdikdən sonra məlum olur ki, heyvana yaxşı qulluq etmədiyi səbəbindən onlar xəstələnib. Məhz heyvanın xəstə halının fotosunu çəkib ictimailəşdirib, guya nazirliyin onlara heyvanı həmin şəkildə verdiyinə dair yalan məlumat təqdim edirlər. Bu yanlış təqdimatın fonunda da bizim nazirliyin ünvanına ittihamlar səslənir. Faktları tutuşduranda məlum olur ki, vətəndaşlar bu məsələdə haqsızdırlar. Heyvana yaxşı qulluq etməyibsə, bunun günahını niyə nazirlikdə axtarmaq lazımdır? Təəssüf ki, bu cür hallar həyata keçirilən proqramın ümumi mahiyyətinə kölgə salan cəhdlər sayıla bilər. Dəfələrlə bu barədə KİV-lərdə çıxış edib, məlumat vermişik ki, bütün hallarda, vətəndaşların sorğularına biz cavab veririk. Bəzən isə media orqanlarında belə məlumatlar bizim mövqeyimiz dinlənilmədən yayılır ki, bu da dövlət proqramı haqda yanlış təəssüratın yaranmasına səbəb olur”.
Məhəmmədəli QƏRİBLİ
