İlqar Hüseynli: “Xüsusən də xidmətin keyfiyyətində, personal və vətəndaşlar arasında münasibətlərin qurulmasında özünü çox yüksək səviyyədə göstərir”
“ASAN xidmət”, əslində, ictimai xidmətlər sahəsində böyük bir inqilabdır”. Bunu Prezident İlham Əliyev REAL televiziyasına verdiyi müsahibədə bildirib. Ölkə başçısının sözlərinə görə, bugünkü Azərbaycan əvvəlki Azərbaycandan çox fərqlənir: “Bugünkü Azərbaycan müasir dövlət kimi özünü artıq təsdiqləyib. Ölkədə aparılan islahatlar bizim niyyətimizi, siyasətimizi əks etdirir”.
Prezident vurğulayıb ki, "ASAN xidmət" çox geniş və müsbət bir təşəbbüsün təzahürüdür: “Orada işləyən gənclər bizim gələcəyimizdir. "ASAN xidmət"də korrupsiya, rüşvətxorluq, kobudluq, bürokratiya sıfırdır. Yəni mənfi halların qarşısını almaq mümkündür. Bunu biz özümüz etmişik. Hansısa bir xarici təşkilat bunu bizə tövsiyə etməmişdir. Qərar da bizimdir, icraçılar da Azərbaycan vətəndaşlarıdır, gənclərdir və nəticəni də Azərbaycan vətəndaşları görürlər. Ona görə bu, ictimai davranış sahəsində, ictimai xidmətlər sahəsində, məmur-vətəndaş münasibətlərində inqilabdır”.
Həqiqətən də “ASAN xidmət” fəaliyyətə başlayandan sonra bu sahədə əhaliyə göstərilən xidmət əhəmiyyətli dərəcədə yaxşılaşdı. Nəzərə almaq lazımdır ki, “ASAN xidmət” çoxsaylı xidmətlər göstərir. Təsadüfi deyil ki, bir sıra qurumların xidmətlərini “ASAN xidmət” icra edir. O baxımdan ictimai xidmətlər sahəsində böyük bir inqilaba imza atılıb.
Maraqlıdır, bəs ekspertlər bunu necə dəyərləndirirlər?
Məsələyə münasibət bildirən ekspert İlqar Hüseynlinin sözlərinə görə, “ASAN xidmət”, sözün həqiqi mənasında, Cənubi Qafqaz və digər ölkələr üçün örnək ola biləcək bir xidmətdir: “Yerli və beynəlxalq tədbirlərdə “ASAN xidmət” modelinin uğurlu bir paket olduğunu hər zaman önə çəkmişik. “ASAN xidmət”in yaradılmasından vətəndaşlar faydalanıb. Ümumilikdə, bu mexanizm vətəndaşların işlərini xeyli asanlaşdırıb. Xüsusən də xidmətin keyfiyyətində, personal və vətəndaşlar arasında münasibətlərin qurulmasında özünü çox yüksək səviyyədə göstərir. Bütün proseslərin bir yerdə həll olunması, əlavə sənədlərin və bürokratik maneələrin aradan qaldırılması baxımından “ASAN xidmət” çox uğurlu layihədir. Ekspert olaraq hər zaman bunu yüksək dəyərləndirirəm. Ancaq bir məqamı da qeyd etmək istəyirəm ki, bəzi sənədlərin dəyər məbləği bir qədər aşağı salınsa, daha yaxşı olar. Söhbət bəzi sənədlərin - tərcümə, təsdiq, apostin xidmətlərin qiymətinin bir qədər aşağı salınmasından gedir. Hesab edirəm ki, bu sahədə qiymətlər aşağı salınsa, daha yaxşı olar. Bəzi xidmətlərdə dövlət rüsumları bir balaca endirilsə, o zaman vətəndaşlar üçün də rahat olar. Ancaq ümumilikdə götürdükdə “ASAN xidmət”, sözün həqiqi mənasında, Cənubi Qafqaz və digər ölkələr üçün örnək olan bir xidmətdir”.
Vidadi ORDAHALLI
