Aytən Mustafayeva: “ASAN xidmət”də olan hər kəs müşahidə edib ki, orada çalışan gənclərin hər biri tam yeni təfəkkürlüdür”
Ölkəmiz nümunəvi xidmətləri ilə dünyanın bir çox dövlətini qabaqlayır. Həmin nümunəvi xidmətin ən bariz nümunəsi isə ölkə başçısı İlham Əliyevin təşəbbüsü isə yaradılan və xalqa şərəflə xidmət edən “ASAN xidmət” mərkəzləridir.
“ASAN xidmət" Azərbaycan məhsulu, ixtirası və brendi olaraq beynəlxalq tərəfdaşlar və ekspertlər tərəfindən yüksək maraq və rəğbətlə xarakterizə olunur. Bəllidir ki, "ASAN xidmət” mərkəzlərinin fəaliyyəti operativlik, şəffaflıq, nəzakətlilik, məsuliyyət və rahatlıq prinsipləri əsasında qurulur. “ASAN xidmət” mərkəzləri Prezident İlham Əliyevin təşəbbüsü ilə məhz xalqın rifahı, vətəndaşın rahatlığı üçün yaradılıb. “ASAN xidmət”də çalışan əməkdaşların vətəndaşlara münasibəti, kübarlığı, diqqəti və peşəkarlığı xidmət modelinin uğurundan xəbər verir.
“ASAN xidmət”də çalışan gənclərin peşəkarlığı, onların dünyagörüşü, təfəkkürü haqqında Prezident İlham Əliyev REAl telekanalına müsahibəsi zamanı da fikir bildirib. O qeyd edib ki, "ASAN xidmət" onun təşəbbüsü ilə yaradılıb: “Ancaq onu da bildirməliyəm ki, orada çalışan gənclər "ASAN xidmət"i çox böyük dərəcədə inkişaf etdirdilər, zənginləşdirdilər, yeni, kreativ ideyaları ilə "ASAN xidmət"i doğrudan da nadir bir ictimai xidmət mərkəzinə çevirdilər. Hər bir yeni mərkəzə gedəndə, - mən 15 mərkəzin açılışının hər birində olmuşam, - görmüşəm ki, edilən təqdimatlarda hansısa bir yenilik var. Yəni bu onu göstərir ki, orada çalışan insanlar, - onların mütləq əksəriyyəti gənclərdir, - çox böyük həvəslə, böyük sevgi ilə bunu edirlər. Onlarda böyük ruh yüksəkliyi var. Onlar istəyirlər ki, ölkəmizdə işlər daha yaxşı getsin, istəyirlər ki, bu işlərə öz töhfələrini versinlər. Yəni "ASAN xidmət" çox geniş və müsbət bir təşəbbüsün təzahürüdür. Orada işləyən gənclər bizim gələcəyimizdir. "ASAN xidmət"də korrupsiya, rüşvətxorluq, kobudluq, bürokratiya sıfırdır. Yəni mənfi halların qarşısını almaq mümkündür. Bunu biz özümüz etmişik. Hansısa bir xarici təşkilat bunu bizə tövsiyə etməmişdir. Qərar da bizimdir, icraçılar da Azərbaycan vətəndaşlarıdır, gənclərdir və nəticəni də Azərbaycan vətəndaşları görürlər. Ona görə bu, ictimai davranış sahəsində, ictimai xidmətlər sahəsində, məmur-vətəndaş münasibətlərində inqilabdır.
"ASAN xidmət"də təlim keçmiş 17 min könüllü tam yeni təfəkkürlü insanlardır. Onların amalı vətəndaşlara xidmət etməkdir, özü də təmənnasız. Gələcəkdə bu könüllülər, - artıq onların bir çoxu indi müxtəlif təşkilatlarda işləyirlər, - vətəndaşlarla təmasda tam yeni bir mövqe, tam yeni bir yanaşma nümayiş etdirəcəklər”.
“ASAN xidmət”də olan hər kəs müşahidə edib ki, orada çalışan gənclərin hər biri tam yeni təfəkkürlüdür, onların tək amalı ölkə vətəndaşlarına layiqincə xidmət etməkdir.
Millət vəkili Aytən Mustafayeva “Bakı-Xəbər”ə açıqlamasında qeyd etdi ki, Prezident İ.Əliyevin ideyası olan “ASAN xidmət” yüksək səviyyədə özünü doğrultdu. Ümumiyyətlə, bu sahə analoqu olmayan bir xidmətdir: “Həm Avropa, həm də yaxın qonşu ölkələr tərəfindən qeyd etdiyim xidmətə böyük maraq var. Bu təcrübəni özlərində tətbiq etmək üçün dəfələrlə ölkəmizə gəlib onunla maraqlanıblar. Bəllidir ki, əvvəllər məmurla vətəndaş arasında problem yaşanırdı. Bu kimi problemlərin aradan qaldırılması üçün belə xidmət yaradıldı. Yeni ideya, yeni təfəkkür gətirən bu xidmət təbii ki, yeni təffəkürə malik gənclərin bu işə cəlb olunmasını tələb edirdi. Tam fərqli dünyagörüşə malik, yeni təfəkkürə malik gənclərimiz bu sahəyə maraq göstərdilər. Gənclərimiz daha çox düzgün fəaliyyət göstərməyə, insanlara yardım etməyə can atırlar. Sevindirici haldır ki, gənclərimiz könüllü olmağa da maraq göstərirlər”.
Xanım millət vəkilinin sözlərinə görə, “ASAN xidmət”də yüksək peşəkarlıqla çalışan gənclərimiz həm öz biliklərini, həm vətəndaş prinsiplərini yüksək tutaraq, ölkə əhalisinə xidmət göstərirlər. Hətta gənclərimiz təşəbbüs göstərərək yeni istiqamətlərdə xidmət göstərməyə can atırlar. “ASAN xidmət”də çalışan gənclərin yüksək peşəkarlıqla öz işlərini icra etməsi ölkə başçısını da qane edir. Prezident onlara inandığı üçün “ASAN xidmət”lərin sayı artır.
Günel CƏLİLOVA
