Musa Quliyev: “Ölkə əhalisinin sosial rifahının yüksəlməsi naminə Prezident tərəfindən sərəncamların imzalanması və onların icrası bir daha sübut edir ki...”
“İmkanlarımız artdıqca, çətin şəraitdə yaşayan insanların yaşayış səviyyəsini yaxşılaşdırmağa çalışırıq”. Bunu Azərbaycan Prezidenti İlham Əliyev REAL televiziyasının rəhbəri Mirşahin Ağayevə müsahibəsində deyib. Dövlət başçısı qeyd edib ki, bizim siyasətimizin mərkəzində Azərbaycan vətəndaşı dayanır: “Mən dəfələrlə bu barədə öz fikirlərimi bildirmişəm və bizim atdığımız addımlar dediklərimi sübut edir. Bizim imkanlarımız artdıqca, ilk növbədə, bu gün hələ də ağır vəziyyətdə, çətin şəraitdə yaşayan insanların yaşayış səviyyəsini yaxşılaşdırmağa çalışırıq”.
Prezident bildirib ki, bugünkü reallıqlar, dünyada baş verən və bölgəmizdə yaşanan hadisələr diktə edir ki, biz daha səmərəli iş aparaq və şəffaflıq əsas prinsip olmalıdır: “Deyə bilərəm ki, keçən il hazırlanan və bu il başlanan, xüsusilə iqtisadi, sosial və kənd təsərrüfatı sahələrində aparılan islahatlar imkan verir ki, biz əlavə maliyyə resursları əldə edək. Siz bilirsiniz ki, bu yaxınlarda minimum əməkhaqqının qaldırılması ilə bağlı çox ciddi addım atılıb, digər sosialyönümlü addımlar atılıb. Biz nəyin hesabına buna nail ola bilmişik? Ona görə ki, bu ilin birinci ayında biz əlavə gəlirlər əldə etdik. Gəlirlər məhz şəffaflıq, düzgün yanaşma hesabına əldə olundu. Bu gəlirlər bizə əlavə maliyyə resurslarının yaranmasına imkan verdi. Biz bu maliyyə resursunu müxtəlif istiqamətlərə - ehtiyatların artırılmasına, infrastruktur layihələrinin icrasına yönəldə bilərdik. Amma mən qərar verdim ki, əldə edilmiş bu əlavə maliyyə resursları, ilk növbədə, vətəndaşların rifah halının yaxşılaşmasına yönəlməlidir və biz bunu da etdik. Güclü sosial siyasət bizim gündəliyimizdə bundan sonra da ən vacib, ən ümdə məsələlərdən biri olaraq qalacaq”.
Məlumdur ki, son bir ay ərzində ölkə başçısının qərarı ilə aztəminatlı, şəhid və məcburi köçkün ailələrinə verilən maddi yardımın məbləği artırılıb, o cümlədən, minimum əməkhaqqının məbləği də yüksəlib. Bəzi şəxslər isə sosial şəbəkələrdə son bir ay ərzində insanların sosial rifah halının yüksəlməsi üçün ayrılan pulun mənbəyinin hardan gəlməsinə sualla yanaşırdılar. Ancaq Prezident REAL televiziyasına müsahibəsində bir daha bəyan etdi ki, əhalinin sosial rifah halının yüksəlməsi üçün ayrılan vəsait, əslində, keçən il hazırlanan və bu il başlanan, xüsusilə iqtisadi, sosial və kənd təsərrüfatı sahələrində aparılan islahatlar nəticəsində gələn gəlirdir.
Millət vəkili Musa Quliyev “Bakı-Xəbər”ə açıqlamasında qeyd etdi ki, Prezident İlham Əliyev REAL televiziya kanalına və xarici KİV-ə müsahibələrində ölkə iqtisadiyyatının hazırkı vəziyyəti ilə bağlı məlumat verib. Həmçinin, Prezidentin müxtəlif hökumət tədbirlərində, regionlara səfəri zamanı verdiyi açıqlamalar ölkə başçısının xalqa hesabatının bir formasıdır: “Fevralın 12-də Prezident İlham Əliyev yerli telekanala müsahibə verərkən bildirdi ki, əhalinin sosial müdafiəsi, aztəminatlı insanlara qayğı və diqqət Azərbaycan dövlətinin prioritet məsələsidir. Uzun illərdir dövlət büdcəsinin 30 faizdən çoxu məhz sosial xərclərə yönəlir. Bu, Azərbaycanın sosialyönümlü dövlət olmasının göstəricisidir. Son bir neçə ay ərzində Prezident tərəfindən əhalinin sosial rifah halının yüksəlməsi məqsədilə çoxlu sayda sərəncam imzalanıb. Həmin sərəncamların imzalanmasında məqsəd xüsusi qayğıya ehtiyacı olan şəxslərin həyat səviyyəsinin yaxşılaşdırılmasıdır. Məlumdur ki, dövlət başçısı şəhid ailələrinin bir qrupunu qəbul edib, onların varislərinə əlavə olaraq birdəfəlik maddi yardım ödənilib. Eyni zamanda, 460 hərbçi, polisin varislərinə də əlavə olaraq birdəfəlik maddi yardımın verilməsi ilə bağlı sərəncam imzalayıb. Bütövlükdə, 12750 şəhid ailəsi Prezidentin həssas qayğısını hiss etdi. O cümlədən, bu günlərdə Şamaxıda baş vermiş zəlzələ zamanı dağılan evlərin təmiri ilə bağlı Prezident tərəfindən sərəncam imzalandı. Bu günlərdə dövlət başçısının imzaladığı sərəncam isə minimum əməkhaqqının 50 manat dəyərində qaldırılması oldu. Bu sərəncam ölkədə 650 min ailənin sosial vəziyyətinin yaxşılaşmasına səbəb olacaq. Hazırda pensiya məbləğinin artırılması da gündəmdədir. Zənnimcə, yaxın zamanlarda bu məsələ Milli Məclisdə müzakirə olunacaq. Əhalinin sosial rifah halının yaxşılaşması istiqamətində görüləcək işlər davam edəcək”.
Millət vəkili onu da bildirdi ki, əhalinin vəziyyətinin yaxşılaşması istiqamətində imzalanan sərəncamlar, görülən işlər Azərbaycan dövlətinin iqtisadi gücüdür. Ölkənin iqtisadi gücü artdıqca, əhalinin sosial müdafiəsinə yönələn diqqət də artacaq. Şübhəsiz ki, bunların hər biri öncədən proqramlaşdırılır: “Bəzi müxalifət cəbhəsində, xüsusən də radikal müxalifətin təmsilçiləri əsassız şəkildə fikir bildirirlər.Hətta bəzi qüvvələr belə bir fikir səsləndirdilər ki, guya ötən ay müxalifətin keçirdiyi mitinq və bəyanlanan şüarlar nəticəsində sosialyönümlü sərəncamlar imzalanıb. Həmin şəxslər başa düşməlidirlər ki, dövlət büdcəsi il başa çatmamış müzakirə olunur və qəbul olunur. Ölkə əhalisinin sosial rifahının yüksəlməsi naminə Prezident tərəfindən sərəncamların imzalanması və onların icrası bir daha sübut edir ki, bu cür həssas işlərdə müxalifətin və ya ölkə xaricində yaşayanların heç biri rolu yoxdur”.
Həmsöhbətimizin sözlərinə görə, Prezident yerli telekanala müsahibəsi zamanı son zamanlar ölkə iqtisadiyyatında qeydə alınan inkişafdan danışıb: “Bildirib ki, son zamanlar aqrar, infrastruktur, turizm və digər sahələrdən gələn gəlir nəticəsində ölkənin gəliri artıb. Bu gəlir infrastruktura, iqtisadi layihələrə deyil, məhz ölkə əhalisinin sosial rifahının yüksəlməsinə yönəldi. Bu isə onu göstərir ki, Prezident xalqın və qayğıya ehtiyacı olan şəxslərin yanındadır”.
Günel CƏLİLOVA
