Mayis Əliyev: “Bəzi binaların dam örtüyü yararsız vəziyyətə düşdüyü üçün, külək əsəndə ətrafa səpələnir”
Bakıda sovet dövründə tikilən binalardakı liftlər dünya standartlarından çox geridə qalır. Liftlərin həm işləkliyi, həm də vizual görkəmi xoşagələn deyil. Əksər binalardakı liftlərdə natəmizlik hökm sürür, düymələri siqaretlə yandırıblar, mərtəbə işarələri isə yoxdur. Əgər liftdə kimsə qalarsa, ümid qalır yalnız pilləkənlə enib-qalxan adamların içəridən gələn haraylara göstərdiyi reaksiyaya. Bu hal tək paytaxt ərazisində deyil, bölgələrdə də müşahidə olunur.
Prezident İlham Əliyev Azərbaycan Respublikasının şəhər və rayonlarında çoxmənzilli binaların lift təsərrüfatının maddi-texniki bazasının möhkəmləndirilməsi ilə bağlı əlavə tədbirlər haqqında sərəncam imzalayıb. Sərəncama əsasən, Azərbaycanın 12 şəhər və rayonunda 237 çoxmənzilli binanın lift təsərrüfatının maddi-texniki bazasının möhkəmləndirilməsi məqsədilə Azərbaycan Prezidentinin 2019-cu il 15 yanvar tarixli, 890 nömrəli Sərəncamı ilə təsdiq edilmiş “Azərbaycan Respublikasının 2019-cu il dövlət büdcəsində digər layihələr üzrə dövlət əsaslı vəsait qoyuluşu (investisiya xərcləri) üçün nəzərdə tutulan vəsaitin bölgüsü”nün 1.64-cü bəndində göstərilmiş məbləğin 40 milyon manatı bu sərəncama əlavə edilmiş siyahıya uyğun olaraq şəhər, rayon icra hakimiyyətlərinə ayrılır.
Lift probleminin həlli ilə yanaşı, Prezident binaların dam örtüyünün yenilənməsinə də diqqət göstərib. Məlumdur ki, əksər binaların dam örtüyü yararsız vəziyyətdədir. Güclü külək olan kimi həmin dam örtüyünün parçaları ətrafa tökülür. Nəticədə xoşagəlməz hal yaşanır. Bəzi hallarda binadan tökülən dam örtüyü parçaları həmin ərazidə dayanan avtomobilləri zədələyir.
Bu kimi problemlərin həll olunması üçün paytaxtda və regionlarda çoxmərtəbəli binaların dam örtükləri yenilənəcək. Dövlət başçısının sərəncamına əsasən, Gəncə, Sumqayıt, Şəki, Şirvan və Qazaxda, ümumilikdə, 379 binanın dam örtüyü təmir olunacaq.
Binaların kommunal probleminin həll olunmasına münasibət bildirən sosial sahə üzrə ekspert Mayis Əliyev “Bakı-Xəbər”ə açıqlamasında qeyd etdi ki, bu gün yeni inşa olunan binalardan savayı, köhnə binaların lifti bərbad vəziyyətdədir: “Bunu istənilən şəxs müşahidə edib. Liftlərin təhlükəsizliyi və keyfiyyətinin müasir tələblərə cavab verməməsi əhalinin haqlı narazılığına səbəb olur. Bəzən liftlərdə qalan insanların köməyinə bina sakinləri çatır. Həmçinin, liftlərdə antisanitariya halları mövcuddur. Əksər köhnə binaların liftləri müasir standartlara cavab verməməklə yanaşı, xoşagələn vəziyyətdə deyil. Liftə daxil olan şəxslər orada sərbəst şəkildə siqaret çəkir. Bu kimi hallar liftlərdə yaşanır. Ancaq çoxmərtəbəli binalarda vəziyyət əksinədir. Lift müasir tələblərə cavab verir”.
Ekspertin sözlərinə görə, liftlərdə yaşanan xoşagəlməz halların qarşısının alınması üçün bu sahəyə dövlət tərəfindən diqqət göstərildi. Prezidentin sərəncamı ilə Azərbaycanın 12 şəhər və rayonunda 237 çoxmənzilli binanın lift təsərrüfatının maddi-texniki bazası möhkəmləndiriləcək. Məlum sərəncamdan sonra bu sahədə yaşanan problemlər öz həllini tapacaq”.
Həmsöhbətimiz onu da əlavə etdi ki, binalarda yaşanan problemlərdən biri də dam örtüyü ilə bağlıdır. Bu problem əsasən güclü külək əsən vaxtı özünü göstərir. Bəzi binaların dam örtüyü yararsız vəziyyətə düşdüyü üçün, külək əsəndə ətrafa səpələnir. Qırılmış dam örtüyü avtomobillərə, həmin ərazidən keçən insanlara zərər yetirir. Bu səbəbdən çoxmənzilli binaların dam örtüyü probleminin həll olunması sevindiricidir.
Günel CƏLİLOVA
