Şakir Ağayev: “Yaxşı haldır ki, əvvəlki dövrlərdən fərqli olaraq, hazırda dövlət qurumları fövqəladə hadisələrə, təbii fəlakətlərə daha tez, çevik reaksiya verməyi bacarırlar”
Fevralın 5-də gecə saatlarında Şamaxı rayonunda baş verən zəlzələ hər birimizə böyük həyəcan yaşatdı. Zəlzələ nəticsəsində yaşayış evlərinə, ictimi obyektlərə, eləcə də digər tikililərə zərər dəyib, əhali arasında yaralananlar, şok keçirənlər olub. Baş verən hadisə Prezident İlham Əliyev tərəfindən nəzarətə götürülüb. Prezident təbii fəlakət nəticəsində yaranan fəsadların operativ şəkildə aradan qaldırılması üçün müvafiq qurumlara göstətiş verib.
Qeyd edək ki, Azərbaycan Respublikasının fövqəladə hallar naziri, general-polkovnik Kəmaləddin Heydərov, Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin direktoru Qurban Yetirmişli, Şamaxı Rayon İcra Hakimiyyətinin başçısı Tahir Məmmədov nazirliyin digər rəhbər şəxsləri ilə birgə fevralın 6-da baş vermiş zəlzələnin nəticələri ilə yaxından tanış olmaq məqsədilə həmin əraziyə gediblər.
Onu da qeyd edək baş verən hadisə ilə bağlı artıq fövqəladə komissiya yaradılıb. Azərbaycanın Birinci vitse-prezidenti Mehriban Əliyevanın göstərişinə əsasən, Heydər Əliyev Fondunun könüllüləri də bu işdə yaxından iştirak edəcəklər. O da bildirilib ki, qəzalı vəziyyətdə olan evlərin sakinləri başqa evlərdə müvəqqəti yerləşdiriləcəklər. Daha çox dağıntı rayonun Qəleybuğurt, Qızmeydan və Nağaraxana kəndlərində qeydə alınıb.
Məlum olduğu kimi, hadisə ilə bağlı bütün aidiyyəti qurumlar gücləndirilmiş iş rejiminə keçib. Zəlzələdən zərər çəkən insanlara tibbi yardımlar edilib və Səhiyyə Nazirliyi tərəfindən kəndlərdə səyyar tibb məntəqələri qurulub. Dağıntılar zamanı xəsarət alanların sayının artdığı və onların əksəriyyətinə ambulator yardım göstərildiyi bildirilir. Şamaxı Rayon Mərkəzi Xəstəxanası da gücləndirilmiş iş rejiminə keçib.
Şamaxıda baş verən zəlzələnin fəsadlarının aradan qaldırılması üçün Şamaxı Rayon İcra Hakimiyyətinin, eləcə də müfaviq dövlət qurumlarının hadisəyə operativ reaksiya verməsi qənaətbəxş sayıla bilərmi?
“Novaya vremya” qəzetinin baş redaktoru Şakir Ağayev “Bakı-Xəbər”ə bildirdi ki, dövlət qurumları Prezidentin bu barədə göstərişlərini zamanında icra edə bildilər. O qeyd etdi ki, əlaqədar qurumlar Şamaxıda baş verən zəlzələyə operativ reaksiya verdilər. “Baş verən hadisə zamanı mətbuat tərəfindən yayılan informasiyalar da təsdiqləyir ki, əlaqədar dövlət qurumları hadisəyə olduqca operativ reaksiya verdilər. Yəni onlar çeviklik göstərərək dərhal hadisə yerində tədbirlər həyata keçirməyə başladılar. İstər Səhiyyə Nazirliyi, istər Fövqəladə Hallar Nazirliyi, eləcə də digər dövlət qurumları Prezident İlham Əliyevin tapşırığına əsasən, baş verən hadisənin aradan qaldırılması üçün çevik fəaliyyət göstərirlər. Bu məsələ ilə bağlı Təhsil Nazirliyi də, Ekologiya və Təbii Sərvətlər Nazirliyi də operativ informasiyalar yaydılar. Sözsüz ki, bütün bunlar Prezidentin şəxsi nəzarətindədir. Çox arzu edərdik ki, evlərə, eləcə də insanlara dəyən zərər tezliklə aradan qaldırılsın, onların üzləşdikləri çətinliklər belə operativ surətdə öz həllini tapsın. Şamaxıda baş verən zəlzələnin vurduğu zərərin aradan qaldırılmasında Prezidentin göstərişi ilə operativlik təmin olunub. Yaxşı haldır ki, əvvəlki dövrlərdən fərqli olaraq, hazırda dövlət qurumları fövqəladə hadisələrə, təbii fəlakətlərə daha tez, çevik reaksiya verməyi bacarırlar. Yəni artıq biz bu cür hadisələrə tez reaksiya verməyə hazırıq” - deyə Ş.Ağayev bildirdi.
İradə SARIYEVA
