Ruslan Kərimov: “Akademiyada həyata keçiriləcək struktur dəyişikliklərinin istiqamətləri barədə hələlik məlumat verə bilmərik”
Son illər Azərbaycan Milli Elmlər Akademiyasında (AMEA) ciddi struktur dəyişikliklərinin baş verəcəyi barədə söz-söhbətlər dolaşırdı. Hətta bildirilirdi ki, struktur dəyişikliyi nəticəsində profilcə yaxın elmi-tədqiqat institutlarının, eləcə də oxşar şöbələrin birləşdiriləcəyi, bəzilərinin isə ləğv ediləcəyi gözlənir. O vaxt AMEA rəhbərliyi hər hansı bir dəyişikliyin baş verəcəyini inkar edir, məlumatların həqiqəti əks etdirmədiyini deyirdi.
Azərbaycan Milli Elmlər Akademiyasının vitse-prezidenti, Milli Məclisin Elm və təhsil komitəsinin sədri, akademik İsa Həbibbəyli mətbuata bildirib ki, AMEA-da artıq islahatlar prosesinə başlanıb.
O qeyd edib ki, Prezident İlham Əliyevin struktur islahatlarının aparılması ilə bağlı verdiyi tapşırıq əsasında Akademiyanın rəhbərliyi tərəfindən buna hazırlıq işləri aparılır. “AMEA rəhbərliyi də idarəetmənin daha da təkmilləşdirilməsi, elmin daha effektiv nəticələr verməsi üçün zəruri islahatların aparılmasına çalışır” - deyə bildirən İ.Həbibbəylinin sözlərinə görə, islahatların aparılması zamanın tələbidir və bununla bağlı qarşıya konkret vəzifə qoyulub. O, həmçinin, vurğulayıb ki, Akademiya islahatların aparılması üçün müəyyən təkliflər paketi hazırlayır.
AMEA-nın vitse-prezidenti hazırda islahatların aparılması üçün müəyyən layihələr üzərində düşünüldüyünü və variantlar axtarıldığını söyləyib: “Bu islahatların aparılması üçün müxtəlif variantlar var. Onlardan hansının istifadə ediləcəyini müəyyən etmək üçün geniş müzakirələr aparılmalıdır. Bizim vaxtımız var ki, Prezidentin verdiyi altı ay ərzində daha optimal variantlar hazırlayaq. Hələlik isə bu islahatlar hazırlıq mərhələsindədir”.
Onu da qeyd edək ki, AMEA-da həyata keçiriləcək struktur islahatları bu qurumun müxtəlif institutlarında, şöbələrində çalışan alimlərin, elmi işçilərin narahatlığına səbəb olub. Onların əksəriyyəti öz iş yerlərini itirəcəyindən qorxur. Hətta bəzi alimlərin bildirdiyinə görə, Akademiyanın elə institut və şöbələri var ki, onların fəaliyyəti həddindən artıq zəifdir. Onlar deyirlər ki, AMEA-da həmin institutların bağlanması və əməkdaşlarının profilcə yaxın elmi-tədqiqat institutlarına köçürülməsi deyilir. Alimlərin bildirdiyinə görə, AMEA-nın elə institutları var ki, onlar eyni işlə məşğul olur, vahid sahəni tədqiq edirlər. Odur ki, onların birləşdirilməsi daha böyük səmərə verə bilər.
AMEA sistemində başlanan struktur islahatların hansı istiqamətləri ehtiva edəcəyini araşdırmaq qərarına gəldik və bu məqsədlə qurumla əlaqə saxladıq və onlara suallarımızı ünvanladıq.
AMEA-da struktur dəyişikliyi prosesinin həyata keçirilməsi hansı nəticələr verəcək? İslahatlar nəticəsində Akademiyanın profilcə yaxın olan elmi-tədqiqat institutlarının birləşdirilməsi, yaxud müəyyən şöbələrin ləğv edilməsindən söhbət gedə bilərmi? AMEA-nın ayrı-ayrı elmi-tədqiqat institutlarında çalışan elmi işçilərin ixtisarlarla bağlı narahatlığına əsas varmı? Struktur dəyişikliyi zamanı əsasən hansı meyarları əsas götürəcəklər?
AMEA-nın İctimaiyyətlə əlaqələr şöbəsi-mətbuat xidmətinin sözçüsü Ruslan Kərimov “Bakı-Xəbər”ə bildirdi ki, bu barədə hələlik hər hansı bir açıqlama vermək tezdir. AMEA-da başlanan struktur dəyişikliyi prosesinin nə kimi nəticələr verəcəyi haqqında yalnız Rəyasət Heyəti qərar qəbul etdikdən sonra ictimaiyyətə məlumat vermək olar: “Akademiyada həyata keçiriləcək struktur dəyişikliklərinin istiqamətləri barədə hələlik məlumat verə bilmərik. Bu məsələ Rəyasət Heyətində müzakirə edildikdən və qərar qəbul edildikdən sonra bu haqda danışmaq mümkün olacaq. İndi isə bir söz deyə bilmərik”.
Qeyd edək ki, hazırda postsovet məkanında Elmlər Akademiyası sistemlərində böyük islahatlar aparılır, hətta bəzi ölkələrdə, o cümlədən, Türkmənistanda Milli Akademiyanın ləğv olunması ideyası da var. Dəqiq desək, Türkmənistan Milli Akademiyasının dövlət maliyyələşməsindən özünümaliyyələşdirməyə keçirilməsi nəzərdə tutulur. Əlbəttə, bu yalnız ideyadır və necə qərar veriləcəyi zamanın işidir.
Görək, Azərbaycan MEA-da islahatlar necə olacaq?
İradə SARIYEVA
