İlqar Orucov: “Bu tədbirlərdən isə, bütövlükdə, Azərbaycan gəncliyi faydalanacaq”
Azərbaycanda mövcud olan müsbət ənənələrin respublika miqyasında yayılması, tətbiq edilməsi yaxşı haldır. Hər il, ənənvi olaraq, Azərbaycanın bir rayonu “Gənclər paytaxtı” stasusu daşıyır. 2018-ci ilin "Gənclər paytaxtı" Naxçıvan şəhəri idi. 2019-cu ildə isə Şamaxı şəhəri Azərbaycanın “Gənclər paytaxtı” seçilib. “Gənclər paytaxtı”nın simvolik açarı Şamaxı Şəhər İcra Hakimiyyətinin nümayəndəsinə təqdim olunub.
Azərbaycanın rayon və şəhərlərinin təbliği baxımından böyük əhəmiyyət daşıyan bu hadisələr diqqət çəkir. Ekspertlər qeyd edirlər ki, Şamaxının 2019-cu ilin “Gənclər payxatı” elan olunması həm bölgənin mədəni, ictimai həyatında canlanma yaradacaq, həm də turizm axınına müsbət təsir göstərəcək.
Fizika-riyaziyyat üzrə fəlsəfə doktoru, gənc ziyalı İlqar Orucov “Bakı-Xəbər”ə bildirdi ki, “Gənclər paytaxtı” ilə bağlı səsvermənin nəticələri fevralın 1-də elan olunub. “Həmin gün yaradıcı və istedadlı gənclərin mükafatlandırılma mərasimində artıq “Gənclər paytaxtı”nın rəmzi açarı Şamaxıya təqdim olundu. Əlbəttə, bu simvolik açar olsa da, onun çox böyük mənası, əhəmiyyəti var. Xüsuslə də bu layihə ona yönəldilib ki, Azərbaycanın təkcə paytaxt gəncləri deyil, bölgələrimizdə yaşayan gənclər də diqqətdə saxlansın, onların bütün sahələrdə aktivliyinin üzə çıxarılması üçün kompleks tədbirlər həyata keçirilsin. Artıq bu ənənə bir neçə ildir davam edir
və bu prosesi müşahidə edən bir elm adamı kimi deyə bilərəm ki, bu çox böyük əhəmiyyətə malik bir layihədir. Azərbaycanın “Gənclər paytaxtı” olaraq, bütövlükdə, gənclərlə bağlı böyük layihələr, tədbirlər Şamaxıda təşkil olunacaq, Şamaxı gəncləri ev sahibi olaraq bu tədbirlərdə aktiv şəkildə iştirak edəcəklər, müxtəlif layihələrə cəlb olunacaqlar, o layihələrin iştirakçısı və icraçısı funksiyasını yerinə yetirəcəklər. Hesab edirəm ki, bütövlükdə, bu, Şamaxı gəncliyinin daha çox ictimai proseslərə cəlb olunmasına təkan verəcək”.
O qeyd etdi ölkəmizə gələn turistlər, qonaqlar görəcəklər ki, Azərbaycan təkcə Bakıdan ibarət deyil, ölkəmizin yüksək səviyyədə inkişaf etmiş region şəhərləri də var. “Görəcəklər ki, həm də bu region şəhərlərinin özünəməxsus adət və ənənələri, mədəniyyəti var. Bunun digər bir üstün cəhəti də ondan ibarətdir ki, 2019-cu il cənab Prezidentin Sərəncamı ilə “Nəsimi ili” elan edilib. Bilirsiniz ki, Nəsimi də Şamaxıda doğulub. Düşünürəm ki, bu iki əlamətdar hadisənin üst-üstə düşməsi olduqca faydalı olacaq. Həm “Nəsimi ili”, həm də “Gənclər paytaxtı” ili çərçivəsində Şamaxıda çox maraqlı tədbirlər keçiriləcək. Bu tədbirlərdən isə, bütövlükdə, Azərbaycan gəncliyi faydalanacaq. Bundan başqa, bilirsiniz ki, Şamaxı böyük turizm potensialına malik rayondur. “Gənclər paytaxtı” ili çərçivəsində Şamaxıya gələn xarci gənclər buranın turizm imkanları ilə də tanış ola biləcəklər. Onlar öz ölkələrində bilavasitə Şamaxının təbliğatını gücləndirəcəklər. Şamaxının 2019-cu ildə Azərbaycanın “Gənclər paytaxtı” seçilməsi, bütövlükdə, Şamaxının təqdimatı baxımından çox əhəmiyyətlidir” - deyə İ.Orucov bildirdi.
İ.Orucov, həmçinin, vurğuladı ki, Şamaxının “Gənclər paytaxtı” seçilməsi təkcə Şamaxı deyil, ətraf rayonlar üçün də yeni imkanlar açır. O qeyd etdi ki, Şamaxı bizim qədim mədəniyyət, elm mərkəzlərindən biridir və bu şəhər vaxtilə Şirvanşahlar dövlətinin paytaxtı olaraq regionda mərkəz funksiyasını yerinə yetirib. “Şamaxının tarixi, mədəniyyəti, bir sözlə, bu şəhərlə bağlı bir sıra məqamlar var ki, Azərbaycan gəncləri onlar haqqında da ətraflı məlumatlar əldə edəcəklər. Eyni zamanda da “Gənclər paytaxtı” ili çərçivəsində Şamaxıda böyük beynəlxalq layihələr həyata keçiriləcək. Bura həm elmi konfranslar, mədəni-kütləvi tədbirlər, idman yarışları və sair daxildir. Azərbaycana gələn xarici gənclər də bu tədbirlər çərçivəsində Şamaxı ilə yaxından tanış olacaqlar”-deyə müsahibimiz bildirdi.
İradə SARIYEVA
