“Frau Merkelin Paşinyanı "cəsarətli" adlandırması mübaliğədən, diplomatik etiketə uyğun komplimentdən başqa bir şey deyil”
Ermənistanın Baş naziri Nikol Paşinyan Almaniya Federativ Respublikasına ikigünlük rəsmi səfəri zamanı kansler Angela Merkellə birgə mətbuat konfransı da keçirib. Erməni KİV-inin verdiyi xəbərə görə, Almaniya kansleri həmin tədbirdə bildirib ki, Paşinyan Dağlıq Qarabağ münaqişəsinin nizama salınması istiqamətində olduqca cəsarətli addımlar atıb. Kansler, hətta qarşı tərəf kimi, Azərbaycandan da belə “cəsarətli addımlar”ın atılmasını gözlədiyini bəyan edib. Çox maraqlıdır, Paşinyanın hakimiyyətə gəldiyi qısa müddət ərzində münaqişənin nizama salınması istiqamətində hər hansı bir cəsarətli addımı müşahidə olunmayıb. Əksinə, onun tərəfindən dəfələrlə sülh danışıqlarının davamı üçün problemlərin yaranmasına səbəb olan qeyri-ardıcıl mövqelərin sərgiləndiyini görmüşük. Belə olan təqdirdə, əslində neytral olmalı ölkənin rəhbəri Merkeli bu cür aşırı ermənipərst olmağa və bunun müqabilində ağ yalan danışmağa nə vadar edir? Politoloq Nəzakət Məmmədova "Bakı-Xəbər"ə bildirdi ki, Merkelin bu fikirləri ilk növbədə təmsil etdiyi Avropa Birliyinin Cənubi Qafqazdakı maraqları ilə bağlıdır: “Hazırda böyük güclər Cənubi Qafqaza Ermənistan vasitəsilə nüfuz etməyə çalışırlar. Bu güclərdən biri də Avropa Birliyidir. Xüsusən də İran amilinin ABŞ və AB arasında fikir ayrılığı yaratdığı bir dövrdə Ermənistanın İranın şimal sərhədindəki geosiyasi platsdarm olaraq əhəmiyyəti artır. Ermənistan ABS, Avropa Birliyi və Rusiya arasında "nifaq alması"na çevrilib. Danışıqlar prosesində konkret irəliləyişin olmadığı bir şəraitdə frau Merkelin Paşinyanı "cəsarətli" adlandırması mübaliğədən, diplomatik etiketə uyğun komplimentdən başqa bir şey deyil. Lakin məsələnin siyasi tərəfi ola bilsin onunla bağlı ola bilər ki, Paşinyanın Rusiyanın danışıqlardakı mövqeyini zəiflətmək cəhdləri Qərbi qane edir və bu baxımdan onun bu cür siyasət yeritməsi təşviq edilir. Paşinyanın ABŞ-la yanaşı Avropa Birliyinin də maraqlarını yaxından nəzərə alması görünür Merkeli razı salıb. Belə ki, AB-nin Genişlənmə və Qonşuluq siyasətinə məsul komissarı Yohannes Hanın İrəvana son səfəri AB tərəfindən yüksək qiymətləndirilib. Paşinyan Berlinə səfəri zamanı onu da bildirib ki, AB-nin dəstəyinə əminlik yaranarsa, ölkədə islahatlara təkan vermək mümkündür. Eyni zamanda o, ölkəsinin geosiyasi seçim qarşısında qalmamasını istəyib. Bundan başqa, AB Ermənistandan əhalinin sürətlə ölkəni tərk etməsi, çoxsaylı şəxslərin Avropadan, xüsusilə Almaniyadan sığınacaq istəməsi AB-ni və Merkeli çətin durumda qoyub. Belə bir şəraitdə demokratiya islahatları aparmağı vəd edən Paşinyan miqrant axınının qarşısını almağı vəd etməklə Merkelin rəğbətini qazanmağı düşünür. Azərbaycan dövlət başçısı onsuz da istər Qarabağ, istərsə də risqli beynəlxalq və regional məsələlərin həllində daim təşəbbüskarlıq və cəsarət göstərdiyindən, onun Merkelin komplimentinə ehtiyacı yoxdur. Ermənistan baş nazirini cəsarətli adlandıran Almaniya kansleri, ola bilsin ki, həm də Paşinyanın sülh danışıqlarına getmək istəməsini nəzərdə tutaraq bu fikri səsləndirib. Amma hər bir halda Ermənistan tərəfdən real sülh təşəbbüsləri olmadıqca Merkelin Paşinyan haqda fikirləri sadəcə diplomatik protokol xatirinə kompliment olaraq qalacaq”.
Məhəmmədəli QƏRİBLİ
