Anar Nəcəfli: “Babək prospektində yolun çökməsi ərazidən keçən magistral su kəmərində problem yarandığı üçün baş verib” “Azərsu” ASC: “Prospektin köməkçi yolunda su xəttində baş vermiş qəzanın aradan qaldırılması ilə əlaqədar qazıntı işləri aparıldığı üçün, sahənin yaxınlığında məlumatverici lövhə, xəbərdarlıq nişanları və qoruyucu lentlər qoyulub, lakin…” İlqar Hüseynli: “Yol çökən zaman onun nə səbəbdən baş verdiyi araşdırılmadan dərhal yol örtüyünün üzəri asfaltlanır”
Məlum olduğu kimi, Babək prospektində yenidən asfalt örtüyü çöküb. Hadisə srağagün axşam saatlarında baş verib. Olay prospektin Yeni Günəşli qəsəbəsindən üzü “Xalqlar dostluğu” metrostansiyasına gedən hissəsində baş verib. Yolun çökməsi nəticəsində dərin çuxur yaranıb. Saat 00:30 radələrində Babək prospektində hərəkətdə olan“Mercedes” markalı 99 CA 956 dövlət nömrə nişanlı avtomobil həmin çuxura düşüb.
Qeyd edək ki, adıçəkilən prospektdə aparılan yenidənqurma işlərindən sonra yol ötən il dekabrın 10-da sürücülərin ixtiyarına verilmşdi. Onu da bildirək ki, Prezident İlham Əliyevin sərəncamı ilə Babək prospektinin yenidənqurma işlərinə 2018-ci ilin dövlət büdcəsindən 20,1 milyon manat vəsait ayrılmışdı.
Yenidənqurma işləri zamanı yeraltı kommunikasiya xətlərinin çəkilişi digər qurumlarla birgə aparılıb, prospekt boyunca 4 km-ə yaxın yeni kanalizasiya kollektoru, 1000 və 800 mm diametrli polad borularla 7 km uzunluğunda əsas magistral, prospektin sağ və sol hissəsi ilə polietilen borularla 11 km uzunluğunda paylayıcı kəmərlər olmaqla, ümumilikdə 30 km-ə yaxın su xətti çəkilib.
Bundan başqa, aparılan yenidənqurma zamanı səth sularının yolun hərəkət hissəsindən kənarlaşdırılması üçün mövcud yağış-kanalizasiya sistemi də bərpa olunub, zəruri olan yerlərdə yeni sistem qurulub.
Xatırladaq ki, Babək prospektində yolun çökməsi halı yeni deyil. Bu ərazidə analoji hal təxminən 15 gün əvvəl də yaşanmışdı. O zaman Babək prospektinin "Monte Karlo" restoranı yaxınlığındakı hissəsində asfalt örtüyü təxminən 100 metr məsafədə çökərək çuxur yaranmışdı. Həmin ərazidə aparılan təmir işlərindən sonra yol istifadəyə verildi.
Hadisə ilə bağlı Azərbaycan Dövlət Avtomobil Yollarının sözçüsü Anar Nəcəfli bildirdi ki, bu, yol çökməsi deyil, qazıntıdır: “Babək prospektində yol çökməsi ərazidən keçən magistral su kəmərində problem yarandığı üçün baş verib. Babək prospektinin köməkçi yolunda su sızması baş verib. Qəzanın aradan qaldırılması üçün “Azərsu” ASC tərəfindən qazıntı işlərinə başlanıb. Məndə olan məlumata görə, təhlükəsizlik tədbirləri görülüb. Sadəcə olaraq qabaqdan gələn maşın nişanları aşırıb, ikinci maşın isə çuxura düşüb”.
A.Nəcəflinin sözlərinə görə, “Azərsu” ASC-nin təmir işləri bitdikdən sonra yolun həmin hissəsinin asfalt örtüyü bərpa ediləcək”.
“Azərsu” ASC-nin hadisə ilə bağlı yaydığı məlumatda deyilir ki, prospektin köməkçi yolunda su xəttində baş vermiş qəzanın aradan qaldırılması ilə əlaqədar qazıntı işləri aparılıb: “Bu zaman bütün tikinti və texniki normalara əməl olunub. Qazıntı aparılan sahənin yaxınlığında məlumatverici lövhə, xəbərdarlıq nişanları və qoruyucu lentlər qoyulub. Mətbuatda yayımlanmış fotoşəkillərdə də məlumatverici lövhələrin və qoruyucu vasitələrin mövcud olması əksini tapıb. Bu xəbərdaredici vasitələr gecə saatlarında hərəkətdə olan bir nəqliyyat vasitəsi tərəfindən dağıdılıb. Bundan sonra hərəkətdə olan digər nəqliyyat vasitəsi – “Mercedes” markalı avtomobil xəndəyə düşüb. Hadisə yerinə dərhal “Azərsu”nun əməkdaşları və texnikası cəlb olunub. Xüsusi texnika vasitəsilə avtomobil xəndəkdən çıxarılıb. Hazırda ərazidə təmir işlərinin başa çatdırılması istiqamətində işlər davam etdirilir”,
Sosial sahə üzrə ekspert İlqar Hüseynli bizimlə söhbətində qeyd etdi ki, adıçəkilən ərazidə tez-tez çökmə hadisəsinin baş verməsinin müəyyən səbəbləri var: “Yol çökən zaman onun nə səbəbdən baş verdiyi araşdırılmadan dərhal yol örtüyünün üzəri asfaltlanır. Bu düzgün deyil. Nəticədə isə ağır tonnajlı maşınlar həmin ərazidən keçən zaman yol çökür. Təəssüf ki, bu cür xoşagəlməz hal yaşanır. Hadisənin baş verməməsi üçün həmin ərazidən keçən su xətti və kanalizasiya sistemində yaşanan nasazlıq tam olaraq araşdırılıb aradan qaldırılmalıdır. Aidiyyəti qurumlar bu məsələdə birgə fəaliyyət göstərməlidirlər. Problem tam şəkildə həll olunandan sonra yol asfaltlanıb istifadəyə verilə bilər”.
Günel CƏLİLOVA
