Pərviz Heydərov: “İşsizliyin aradan qaldırılması üçün icra olunan proqramlar sayəsində əhalinin məşğulluğu, əmək, sosial müdafiə və təminat sahələrində vətəndaşlara göstərilən xidmətlərin keyfiyyəti yüksələcək”
Azərbaycanda məşğulluq dövlət siyasətinin ən mühüm istiqamətlərindən biridir. Bu sahədə ölkədə görülən işlər müsbət nəticəsini verir. Məlumdur ki, son 15 ildə Azərbaycanda xeyli iş yeri açılıb, insanların layiqli iş yerləri ilə təmin olunması üçün addımlar atılır.
Açıqlanan statistik rəqəmlərə əsasən, ölkədə işsizliyin səviyyəsi 5 faiz civarındadır. İşsiz əhalinin işlə təmin olunması üçün ölkədə çoxlu sayda layihə həyata keçirilir. Sevindirici haldır ki, işsizlərin işlə təmin olunması üçün həyata keçirilən layihələr özünü müsbət şəkildə doğruldub.
Qeyd edək ki, ölkədə işsiz əhalinin işlə təmin olunması üçün həyata keçirilən layihələrdən biri də ötən il icrasına start verilən DOST layihəsidir. DOST (Dayanıqlı və Operativ Sosial Təminat Agentliyinin) layihəsinin həyata keçirilməsi əhalinin məşğulluğu, əmək, sosial müdafiə və təminat sahələri üzrə xidmətlərin bir pəncərədən, tam şəffaf, vətəndaşlarla açıq iş şəraitində, nəzakətli şəkildə, sadə və əlçatan prosedurlarla təqdim edilməsinə imkan verməklə ölkəmizin bu sahə üzrə yeni brendini formalaşdıracaq.
Layihənin icrası işləri “yol xəritəsi” üzrə mərhələli şəkildə, yerli və beynəlxalq ekspertlərin iştirakı, mütərəqqi dünya praktikasının öyrənilməsi şəraitində aparılır.
Belə layihələrdən biri də özünüməşğulluq layihəsidir. Prezident İlham Əliyevin tapşırığına əsasən, Əmək və Əhalinin Sosial Müdafiəsi Nazirliyi tərəfindən icra olunan özünüməşğulluq proqramı ötən il işsiz və işaxtaran vətəndaşların qazanc əldə etməsinə səbəb olub.
Növbəti belə layihə “İşsizin DOSTu” proqramıdır. Prezident İlham Əliyevin təşəbbüsü əsasında hazırlanan “İşsizin DOSTu” proqramının cari ilin əvvəlindən icrasına başlanıb. “İşsizin DOSTu" proqramı çərçivəsində artıq 16 minədək işsiz vətəndaş əmək müqaviləsi əsasında ödənişli ictimai işlərə cəlb olunub. Bu proqram çərçivəsində 30 min adamın işə götürülməsi nəzərdə tutulub.
“DOST İş Mərkəzi” tərəfindən proqram çərçivəsində ödənişli ictimai işlərə cəlb olunanlardan 3 mini Bakı şəhərinin, 13 mini isə rayonların payına düşüb. Bu proqram çərçivəsində 30 min adamın işə götürülməsi nəzərdə tutulub
Proqram çərçivəsində işaxtaran vətəndaşlarla əmək müqaviləsi birillik bağlanır. Gələcəkdə işçinin istəyindən asılı olaraq, müqavilənin müddəti artırıla bilər.
İşsiz əhalinin məşğulluğunun təmin olunması üçün yeni bir layihənin əhəmiyyəti barəsində danışan iqtisadçı- ekspert Pərviz Heydərov “Bakı-Xəbər”ə açıqlamasında qeyd etdi ki, dövlətin həyata keçirdiyi sosial-iqtisadi siyasətin əsas hissəsi ölkədə işsizliyin aşağı həddə salınması, əhalinin işlə təmin olunmasıdır: “İşsizliyin tam olaraq aradan qaldırılması mümkün deyil. İnkişaf etmiş ölkələrdə belə, az da olsa, işsizlik mövcuddur. Azərbaycanda isə işsizlik 5 faiz səviyyəsindədir. Məlumdur ki, ölkəmizdə işsizlik səviyyəsinin mümkün dərəcədə aşağı endirilməsi və ən aşağı həddə saxlanması dövlətin və hökumətin sosial-iqtisadi siyasətində daimi olaraq ən başlıca hədəf sayılır. Bunun üçün bütün vasitələrdən istifadə edilir. Demək olar, bütün icra strukturları bu vəzifənin həyata keçirilməsində maraqlı sayılır və yaxından iştirak edirlər.
Xüsusilə qeyd etmək lazımdır ki, bu sahədə ən böyük ağırlıq şübhəsiz ki, Əmək və Əhalinin Sosial Müdafiəsi Nazirliyinin üzərinə düşür. Bilavasitə dövlət başçımızın tapşırığı ilə adıçəkilən qurumun yeni rəhbərliyi tərəfindən bu məsələyə diqqət və onun davamlı olaraq həlli üçün görülən işlər son 1 il ərzində artıb və gücləndirilib.
Məsələn, Prezident İlham Əliyevin təşəbbüsü ilə hazırlanmış “İşsizin DOSTu” adlı proqramın icrasına hazırlıq işlərinin artıq başa çatdırıldığı bildirilir ki, buna əsasən, cari il ərzində 30 minədək şəxsin ödənişli ictimai işlərə cəlb edilməsinə imkan yaranacaq. Düzdür, həmin şəxslər nazirliyin rayon (şəhər) məşğulluq mərkəzlərində işaxtaran və ya işsiz kimi qeydiyyatda olan şəxslərdən ibarət olacaq. Lakin əsas budur ki, məsələyə sistemli yanaşılır.
Xatırladım ki, Prezident keçən il avqustun 9-da əhalinin məşğulluğu, əmək, sosial müdafiə və təminat sahələrində idarəetmənin təkmilləşdirilməsi ilə bağlı əlavə tədbirlər haqqında Fərman imzaladı. Fərmana əsasən, Əhalinin Sosial Müdafiəsi Nazirliyinin tabeliyində DOST agentliyi yaradıldı. Bu addım əhalinin məşğulluğu, əmək, sosial müdafiə və təminat sahələrində vətəndaşlara göstərilən xidmətlərin keyfiyyətinin yüksəldilməsi, şəffaflığın artırılması, innovativ həllərin tətbiqi və elektron xidmətlərə keçidin sürətləndirilməsi, habelə süründürməçilik hallarının qarşısının alınması və vətəndaş məmnunluğunun artırılması məqsədilə atıldı. Bunun üçün dövlət büdcəsindən vəsait ayrıldı.
Ardınca, “2019-2030-cu illər üçün Azərbaycan Respublikasının Məşğulluq Strategiyası” təsdiq edildi. Sərəncama əsasən, mövcud demoqrafik meyllərə və inkişaf perspektivlərinə, ölkənin müəyyən olunmuş iqtisadi prioritetlərinə əsaslanmaqla, səmərəli məşğulluğu təmin etmək məqsədilə qarşıdakı 11 illik bir dövr ərzində uzunmüddətli dövlət məşğulluq siyasətinin formalaşdırılması üzrə xüsusiyyətlər təsdiq edildi.
Buna qədər isə əmək ehtiyatlarından səmərəli istifadə yolu ilə əhalinin məşğulluğunu təmin etmək məqsədilə Prezidentin 2005-ci il 26 oktyabr tarixli Sərəncamı ilə təsdiq edilən 2006-2015-ci illər üzrə də Məşğulluq Strategiyası olub. Həmin strategiyanın icrasının bir-birini tamamlayan iki mərhələdə reallaşdırılmasını təmin etmək məqsədilə 2007-2010-cu və 2011-2015-ci illər üzrə müvafiq dövlət proqramları mövcud olub və uğurla icra edilib.
Məşğulluğun təmin olunması üçün Prezident tərəfindən imzalanan fərmanda əhalinin məşğulluğu, əmək, sosial müdafiə və təminat, habelə Əmək və Əhalinin Sosial Müdafiəsi Nazirliyinin fəaliyyət istiqamətlərinə uyğun digər sahələrdə xidmətlərin həyata keçirilməsini təmin edən DOST mərkəzlərinin yaradılması müəyyən edilib. Elə “İşçinin dostu” proqramı da DOST agentliyi, onun mərkəzləri vasitəsilə həyata keçiriləcək. Hesab edirəm, ilkin olaraq 30 mindən də çox yeni iş yerinin yaradılmasına imkan yarana bilər. Baxır, bu sahədə işlər necə, hansı sürətlə həyata keçiriləcək”.
Günel CƏLİLOVA
