Təhsil Nazirliyindən isə “Qisas” hekayəsində M.İbrahimovun şəhidlik yolunu tutarkən keçirdiyi hiss və duyğuların yüksək səviyyədə təsvir edildiyi bildirilir
Respublikamızın orta ümumtəhsil məktəbləri üçün çap olunan dərsliklərdə müəyyən nöqsanlar özünü göstərməkdədir. Qeyd edək ki, bu dəfə nöqsana Azərbaycan orta ümumtəhsil məktəblərində tədris edilən 5-ci sinif dərsliyində yol verilib. Sosial şəbəkələrdə yayılan məlumata görə, 5-ci sinif “Ədəbiyyat” kitabında Milli Qəhrəman Mübariz İbrahimova həsr olunan “Qisas” adlı hekayədə onun intihar etməsi ilə bağlı həqiqətə uyğun olmayan fikirlər yer alıb.
Sosial şəbəkələrdə “Qisas” hekayəsində yer alan həmin hissə M.İbrahimovun ruhuna təhqir kimi dəyərləndirilib. Qeyd edilib ki, M.İbrahimov düşmənlə qeyri-bərabər döyüşdə qəhrəmancasına şəhidlik zirvəsinə çatıb və bu cür hekayələr onun ruhuna hörmətsizlikdir.
M.İbrahimova həsr olunan hekayənin müəllifinin isə yazıçı İbrahim Vahabov olduğu bildirilir.
Xatırladaq ki, 5-ci sinif “Ədəbiyyat” dərsliyinin həmmüəllifləri Soltan Əliyev, Bilal Həsənov, Əminə Səfərova və Əsgər Quliyevdir. Bu məsələni araşdırmaq məqsədilə 5-ci sinif “Ədəbiyyat” dərsliyinin müəlliflərindən biri olan Bilal Həsənovla əlaqə saxladıq. B.Həsənov “Bakı-Xəbər”ə bildirdi ki, “Qisas” hekayəsi onun və həmkarlarının müəllifi olduğu dərslikdə getməyib. Bu hekayənin alternativ 5-ci sinif “Ədəbiyyat” dərsliyində yer aldığını deyən müəllif bildirdi ki, bu hekayəyə görə onlar məsuliyyət daşımır. “Bu hekayə bizim müəllifi olduğumuz 5-ci sinif “Ədəbiyyat” dərsliyində getməyib. Ona görə də bu barədə sualı bizə ünvanlamayın. Təhsil Nazirliyi həm bizim müəllifi olduğumuz dərsliyə, həm də alternativ dərsliyə çap qrifi verib. Ona görə də məktəblərin yarısında bizim yazdığımız dərslik, digər yarısında isə alternativ dərslik tədris edilir” -deyə B.Həsənov bildirdi. O qeyd etdi ki, alternativ dərsliyin müəllifi isə Afət Süleymanovadır.
Məlumatlara görə, alternativ “Ədəbiyyat” dərsliyində M.İbrahimovla bağlı iki hekayə yer alıb və onların ikisi də bir-birilə ziddiyyət təşkil edir. “Qisas” hekayəsinin mətnində bildirilir ki, Mübariz İbrahimov döyüşə gedir və erməniləri yatdıqları yerdə güllələyir (?), sonra yadına düşür ki, namaz vaxtıdır, arxaya qaçanda onu ermənilər vururlar.
Təhsil Nazirliyi 5-ci sinif “Ədəbiyyat” kitabında Milli Qəhrəman Mübariz İbrahimova həsr olunan “Qisas” adlı hekayədə onun intihar etməsi ilə bağlı yazılanlara münasibət bildirib. Nazirlikdən “Report”un sorğusuna cavab olaraq bildirilib ki, yazıçı İbrahim Vahabovun qələmə aldığı əsər məzmun baxımından vətənpərvərlik və qəhrəmanlıq nümunələri ilə zəngindir: “Eləcə də qəhrəmanın şəhidlik yolunu tutarkən keçirdiyi hiss və duyğular yüksək səviyyədə təsvir edilib. Bütün bunların ümumtəhsil müəssisələrində tərbiyə işinin təşkilində böyük rola malik olduğu nəzərə alınıb. Bununla belə, əsərin məzmunu, oradakı hadisələrin gedişatı ilə bağlı sualların yazıçının özünə ünvanlanması daha məqsədəuyğundur”.
İradə SARIYEVA
