Gülnar İbişova: “Bizim ali məktəbdə tədrislə azərbaycançılıq ideologiyası uzlaşdırılır” Hacı Nizami Rza: “Dini tədris məsələsində dövlətin maraqları əsas götürülməlidir”
Azərbaycançılıq ideologiyası təməli üzərində qurulan dövlətçiliyimizin maraqlarının bütün sahələrdə müdafiə olunması, qorunması əsas olmalıdır. Zəngin mədəniyyətə, milli-mənəvi dəyərlər sisteminə malik olan ölkəmizdə dini təhsil məsələsinə də ciddi əhəmiyyət verilir.
Bildiyimiz kimi, Azərbaycanda dini təhsil sistemi qurulub və bu özünü daha çox ali məktəblərin timsalında ifadə edir. Bu gün Azərbaycanda Bakı İslam Universiteti, İlahiyyat İnstitutu, eləcə də Bakı Dövlət Universitetinin ilahiyyat fakültəsi fəaliyyət göstərir. Göründüyü kimi, burada dinin tədrisi həyata keçirilir.
Ölkəmizdə dini təhsil sistemi azərbaycançılıq ideologiyası ilə nə dərəcədə uzlaşır?
Mütəxəssislər qeyd edirlər ki, ümumiyyətlə, ölkəmizdə dinin istənilən pillədə tədrisi, mütləq mənada, milli dövlətçilik ideologiyasının tələbləri səviyyəsində olmalıdır.
Orta məktəblərdə din ayrıca bir fənn kimi tədris olunmasa da, şagirdlərin dini biliklərlə tanış olması üçün “Həyat bilgisi” və digər uyğun dərsliklərdə bu barədə məlumatlar verilir. Bu gün ölkəmizdə dinin tədrisi sahəsində əvvəllər mövcud olan neqativlərin aradan qaldırıldığını deyən mütəxəssislər hesab edirlər ki, Azərbaycanda din üzrə kadr hazırlanması prosesinin həyata keçirilməsi nəticəsində bu sahədə irəliləyişlər var.
Onu da vurğulayaq ki, bəzi mütəxəssislərə görə, ölkəmizdə dinin tədris edilməsi nəticəsində respublikamızdan kənarda bu sahədə təhsil almaq istəyənlərin sayı azalıb. Ekspertlərin qənaətinə görə, illər əvvəl Azərbaycandan kənarlarda ali dini təhsil alan gənclərin xeyli qismi ölkəmizə həmin dövlətlərin ideologiyasını, dünyagörüşünü gətirməyə cəhd göstərirdilər. Lakin dövlətin dinin tədrisi sahəsində həyata keçirdiyi ardıcıl və səmərəli siyasət nəticəsində bu gün ölkəmizdə sağlam təməllər üzərində qurulan və azərbaycançılıq ideologiyasına xidmət edən dini təhsil sistemimiz formalaşmaqdadır. Bu gün Azərbaycan dövlətinin özünəməxsus dini-milli modelinin hazırlanmasının vacibliyini irəli sürən bəzi mütəxəssislər qeyd edirlər ki, bunu bizim din sahəsi üzrə milli kadrlar yetişdirməyimiz də təsdiqləyir.
Vaxtilə mövcud olan dini təhsilin Sovet dövründə məhv edildiyini deyən mütəxəssislər vurğulayırlar ki, müstəqillik dövründə dini təhsil ideyası yenidən həyata qaytarılıb. Mütəxəssislər deyirlər ki, Azərbaycan dövləti öz ali dini təhsil müəssisələrini yaratmaqla ölkəmizə daşınan və bizim milli-mənəvi dəyərlərimizə, dövlətçilik prinsiplərimizə yad olan zərərli dini ideologiyaların, təsirlərin qarşısını ala bildi. Azərbaycanda bütün ənənəvi dinlərin inkişafına, fəaliyyətinə şərait yaradıldığını deyən mütəxəssislər qeyd edirlər ki, bu, ölkə Konstitusiyasında da öz əksini tapıb.
Məlumdur ki, azərbaycançılıq ideologiyasının əsas xətlərindən biri Azərbaycanı özünə vətən sayan bütün xalqların milli, etnik, dini və sosial hüquqlarının bərabərliyidir. Dini təhsil də, öz növbəsində, milli təhlükəsizliyimizin, milli dövlətçilik ideologiyamızın müdafiəsində dayanmalıdır.
İlahiyyat İnstitutunun aparıcı mütəxəssisi Gülnar İbişova “Bakı-Xəbər”ə bildirdi ki, sözügedən ali məktəbdə tədris prosesi, birmənalı olaraq, Azərbaycan dövlətinin maraqlarına uyğun şəkildə aparılır. Dini tədrislə azərbaycançılıq ideologiyasının prinsiplərinin uzlaşdığını vurğulayan G.İbişovanın sözlərinə görə, bu xətt həmişə əsas götürülür. “Ümumiyyətlə, İlahiyyat İnstitutunda tədris prosesində milli-mənəvi dəyərlərimizin qorunmasına, təbliğ edilməsinə xüsusi əhəmiyyət verilir. Bizim ali məktəbdə tədrislə azərbaycançılıq ideologiyası uzlaşdırılır. Bu məsələni həm tədrisdə, həm də tələbələrlə keçirdiyimiz tədbirlərdə, “dəyirmi masa” və konfranslarda önə çəkirik. Tədris zamanı Azərbaycan dövlətinin maraqlarının, azərbaycançılıq ideologiyasının, dövlət siyasətinin qorunmasını həmişə tələbələrə təlqin edirik” - deyə G.İbişova bildirdi.
Dinşünas Hacı Nizami Rza isə hesab edir ki, bu gün dini təhsilin Azərbaycanın dövlət maraqlarına xidmət etməsi vacib məsələdir. Onun sözlərinə görə, dini dəyərlərin təbliği, tədrisi məsələsində daha ciddi addımlar atılmalıdır. “Təəssüf ki, bu gün bir sıra dövlətlər din pərdəsi altında öz məkrli siyasətini həyata keçirir. Din pərdəsi altında qurulan məkrli siyasət nəticəsində minlərlə insanın dini inancına olan sədaqətindən istifadə edərək onları öz ətraflarında birləşdirə bilərlər. Bu gün bəzi siyasətbazların əlində din və dini atributlar öz məqsədlərinə çatmaq üçün bir silahdır. Hesab edirəm ki, dini təhsil daha mükəmməl şəkildə qurulmalıdır. Bu sahə ilə məşğul olan adamlar gənclərimizə, tələbələrə elə düzgün istiqamət verməlidirlər ki, onlar yad təsirlərə uymayıb öz dövlətinin, dövlətçiliyinin maraqlarını müdafiə etsinlər. Yaxşı olardı ki, orta məktəblərdə dinimizlə bağlı şagirdlərə doğru-düzgün məlumat verilsin. Qoy yeni nəslin şüurunda Allahı tanımaq, Allahın buyurduqlarını bilməklə bağlı ibtidai bir bilik olsun. Yəni yalan danışma, oğurluq etmə, dilinlə insanları incitmə, əməlinlə insanlara dayaq ol, kasıba dəstək ol və s. - bunların hamısını uşaqlara öyrətməliyik. Azərbaycanda dini təshillə məşğul olan müəssisələr olub. Bakı İslam Universitetində, Bakı Dövlət Universitetinin ilahiyyat fakültəsində din tədris edilib. Ancaq mən onların məzunlarının indi fəaliyyətini görmürəm. Onlar nə üçün camaatın arasında görünmürlər? Bizim ali məktəblər çalışmalıdırlar ki, yetişdirdikləri mütəxəssislərin dini bilgiləri üstün olsun. Onlar xalqla dövlət arasında etibarlı körpü olsunlar. Hesab edirəm ki, dini tədris məsələsində dövlətin maraqları əsas götürülməlidir” - deyə Hacı Nizami Rza bildirdi.
İradə SARIYEVA
