Rəsul Cahangirli: “Şəhid ailələrinə göstərilən sosial qayğı davamlı xarakterlidir”
Məlum olduğu kimi, Prezident İlham Əliyev şəhid ailəsi üçün Azərbaycan Respublikası Prezidentinin təqaüdünün artırılması haqqında Fərman imzalayıb. Fərman şəhid ailəsinin sosial müdafiəsini gücləndirmək və onlara dövlət qayğısını artırmaq məqsədilə imzalanıb. Fərmana əsasən, şəhid ailəsi üçün Azərbaycan Respublikası Prezidentinin təqaüdünün aylıq məbləği artırılaraq 2019-cu il fevralın 1-dən 300 manat müəyyən edilib. Qeyd edək ki, bu məbləğ əvvəl 242 manat təşkil edib.
Bütövlükdə, şəhid ailələrinin sosial vəziyyətinin yaxşılaşdırılması ilə bağlı ilbəil bir sıra tədbirlər görülür. Çünki şəhid ailələrinə göstərilən diqqət və qayğı ölkə başçısının həyata keçirdiyi siyasi kursun mühüm istiqamətlərindən biridir. İndiyə qədər bu kateqoriyadan olan vətəndaşlara 6654 mənzil, 6144 avtomobil, ötən il isə 626 mənzil verilib. Bu il həmin vətəndaşlara azı 800 mənzilin təqdim olunması nəzərdə tutulur. Şəhid ailələrinə və müharibə əlillərinə, Milli Qəhrəmanlara verilən Prezident təqaüdünün də məbləği ötən dövrdə mütəmadi artırılıb, bu qəbildən olan insanların uşaqlarına aylıq sosial müavinətin verilməsi təmin olunub. Məsələn, ötən il Azərbaycan Respublikası Prezidentinin Azərbaycanın Milli Qəhrəmanları üçün təqaüdünün məbləği 15 faiz artırılaraq 1500 manata çatdırılıb.
Bununla da şəhid ailələrinin sosial müdafiəsi ildən-ilə yaxşılaşıb. Dövlət başçısının bu sahədə həyata keçirdiyi tədbirlər ictimaiyyət tərəfindən hər zaman böyük rəğbətlə qarşılanıb. Prezident İlham Əliyevin sözügedən məsələdə xidmətləri böyükdür. Digər tərəfdən, bir sıra imtiyazlarla yanaşı, şəhid ailələrinin işlə təmin edilməsi də daim diqqət mərkəzindədir. Bütün bunlardan çıxış edərək şəhid ailələrinə verilən sözügedən təqaüdün 300 manata çatdırılmasını yetərli hesab etmək olarmı?
Məsələyə münasibət bildirən ekspert Rəsul Cahangirlinin sözlərinə görə, indiki dövrdə sözügedən təqaüdün 300 manata çatdırılması tamamilə normal göstəricidir: “Məsələ ondadır ki, hazırkı dövrdə sözügedən məbləği qaneedici hesab etmək olar. Ona görə ki, ailədə ən azı bir nəfər işləyirsə və orta hesabla 500 manat məvacib alırsa, həmin rəqəmin üstünə 300 manat gəldikdə gəlirin məbləği artır. Yənu bu məbləğlər üst-üstə gələndə ailənin sosial vəziyyətini normal səviyyədə təmin etmək mümkündür. Elə ailələr var ki, orada işləyənlər çoxdur. Ona görə də məlum artım mövcud sosial ehtiyac meyarlarına uyğundur. Onu da nəzərə almaq lazımdır ki, Prezident təqaüdü ilə yanaşı, müharibə əlillərindən böyük əksəriyyəti əlilliyə görə əmək pensiyası, pensiya hüququ olmayan az bir qismi isə əlilliyə görə müavinət alır. Əmək pensiyası almaq hüququ olmayan şəhid ailəsi üzvlərinə və müharibə əlillərinin uşaqlarına aylıq sosial müavinət verilir. Şəhid ailəsi və Milli Qəhrəman ailəsi üzvlərinə əmək pensiyası təyin olunarkən əlavə də hesablanır. Həmçinin, şəhid ailələrinin və müharibə əlillərinin uşaqları dövlət ali və orta ixtisas təhsili müəssisələrində ödənişli təhsil aldıqda təhsil haqqı dövlət büdcəsi hesabına ödənilir. Ölkədə icra olunan özünüməşğulluq proqramına müraciət edənlər arasında digər həssas qruplarla yanaşı, şəhid ailələri və müharibə əlillərinə də üstünlük verilir. Təkcə ötən il 100-dək şəhid ailəsi bu proqrama cəlb olunaraq aktivlərlə təmin olunub. Digər sahələrdə də şəhid ailələrinin sosial müdafiəsi məqsədilə mühüm tədbirlər həyata keçirilir. Deməyim odur ki, şəhid ailələrinə göstərilən sosial qayğı davamlı xarakterlidir”.
Vidadi ORDAHALLI
