Vaqif Abışov: “Azərbaycan məktəbliləri arasında rus dili və ədəbiyyatı üzrə respublika olimpiadasının keçirilməsi də iki dövlət və iki xalq arasındakı əlaqələrin çox möhkəm olduğunu bir daha sübut edir”
Azərbaycan və Rusiya arasında qırılmaz bağlar mövcuddur. Ölkəmizdə rus dilində təhsilə, rus dili və ədəbiyyatının təbliğ edilməsinə xüsusi diqqət yetirilir. Bilirik ki, respublikamızda ayrıca rusdilli məktəblər, eləcə də orta ümumtəhsil məktəblərində rus bölməsi fəaliyyət göstərir. Bu da onu göstərir ki, Azərbaycan və Rusiya arasında elm-təhsil, mədəniyyət, bir sözlə, humanitar sahədə ənənəvi əməkdaşlıq əlaqələri mövcuddur və bu əlaqələr günü-gündən daha da genişlənir. Buna nümunə kimi hər il, ənənəvi olaraq, Azərbaycan məktəbləri arasında keçirilən rus dili və ədəbiyyatı üzrə respublika olimpiadasını qeyd edə bilərik.
Bəzi ermənipərəst qüvvələr Azərbaycan-Rusiya əlaqələrinə zərbə vurmaq niyyətilə təxribatçı fikirlər yayırlar. Uzağa getmədən, Rusiya Xarici İşlər Nazirliyinin sözçüsü Mariya Zaxarovanın erməni təxribatından qaynaqlanan, həqiqətə uyğun olmayan fikirlərini yadınıza salmaq istəyirik. M.Zaxarova iddia edirdi ki, erməni mənşəli Rusiya vətəndaşları Azərbaycana buraxılmır, onlar burada təqib olunurlar (?). M.Zaxarova bunu Rusiya vətəndaşlarının hüquqlarının pozulması (?) kimi qiymətləndirirdi. Əslində, Zaxarovanın bu fikrində heç bir həqiqət çaları yoxdur. Yaxşı, əgər bu həqiqətən də belədirsə, bəs onda nə üçün Azərbaycanda rus mədəniyyətinin, rus dilində təhsilin, rus dili və ədəbiyyatının təbliğinə belə geniş meydan verilir? Ermənistanda isə nə rusdilli məktəblər var, nə rus dili və ədəbiyyatının təbliğinə önəm verilir. Xatırlayırsınızsa, bir neçə ay bundan əvvəl Ermənistan ictimaiyyəti İrəvanda yeganə olan Rus Dram Teatrının qapadılması ilə bağlı aksiya keçirmişdi. Onlar hökumətdən bu teatrın fəaliyyətinin dayandırılması ilə əlaqədar qərar verməsini tələb edirdilər. Bu, Ermənistan tərəfdən Rusiya mədəniyyəti, rus dili əleyhinə atılan bir daş deyildimi ki, Zaxarova bu faktlara göz yumaraq erməniləri müdafiə edir. Monoetnik dövlət olan Ermənistanda rus dilinin boğulması, ruslara qarşı təzyiqlər göstərilməsi adi hala çevrilib. Azərbaycanda isə həm dövlət, həm də cəmiyyət səviyyəsində rus dilinə, rus mədəniyyətinə olduqca isti münasibət var.
Tarix üzrə fəlsəfə doktoru Vaqif Abışov “Bakı-Xəbər”ə bildirdi ki, tarix boyu Azərbaycanla Rusiya arasında siyasi və diplomatik münasibətlər mövcud olub. O qeyd etdi ki, bu gün də həmin münasibətlər geniş səviyyədə davam etdirilir. Onun sözlərinə görə, bu gün Azərbaycanda rus dili və ədəbiyyatının təbliğ edilməsi, bununla bağlı xüsusi olimpiadanın keçirilməsi iki ölkə arasındakı münasibətlərin hansı səviyyədə olmasını göstərir. Rusiyadakı ermənipərəst qüvvələrin iki ölkə arasındakı əlaqələrin inkişafına xələl gətirmək məqsədilə ortaya təxribatçı fikirlər atması heç bir nəticə verməyəcək. Rusiyada bəzi dövlət qurumlarında ermənipərəst qüvvələrin münasibətlərə kölgə salmaq niyyəti güddüyünü deyən tarixçi-alim hesab edir ki, Azərbaycan və Rusiya dövlətləri, onların vətəndaşları heç kəsin təxribatına uymamalıdır.
Alim bu günlərdə Azərbaycanda rus dili və ədəbiyyatı üzrə 11-ci respublika olimpiadasının keçirilməsinin böyük əhəmiyyəti olduğunu vurğuladı. O bildirdi ki, bu olimpiada Azərbaycan məktəblilərində rus dili və ədəbiyyatına maraq yaradılması üçün keçirilir. “Azərbaycan və Rusiya arasında həm tarixi, həm mədəni, həm elm və təhsil, eləcə də digər sahələrdə əməkdaşlıq əlaqələri, dostluq var. Bilirsiniz ki, bu gün Azərbaycanda rusdilli təhsilə böyük maraq mövcuddur. Orta və ali məktəblərdə rus dili fənni tədris olunmaqla yanaşı, həm də rus bölmələri fəaliyyət göstərir. Azərbaycanda tarixən rus dilinə, rus ədəbiyyatına, rus mədəniyyətinə böyük hörmətlə yanaşılıb. Azərbaycan məktəbliləri arasında rus dili və ədəbiyyatı üzrə respublika olimpiadasının keçirilməsi də iki dövlət və iki xalq arasındakı əlaqələrin çox möhkəm olduğunu bir daha sübut edir. Qara qüvvələrin iki dövlət arasına nifaq toxumları əkmək cəhdləri baş tutmayacaq. Çünki görülən işlər, həyata keçirilən tədbirlər iddiaları alt-üst edir. Azərbaycan mədəniyyəti, ədəbiyyatı, tarixi şəxsiyyətləri də Rusiyada təbliğ olunur. Yəni bizim qarşılıqlı mədəni-humanitar əlaqələrimiz var. Azərbaycanda Rus Dram Teatrı var. Ayrı-ayrı rus icmalarının musiqi qrupları, özfəaliyyət dərnəkləri mövcuddur. Ölkəmizdə Rusiya mədəniyyət mərkəzləri fəaliyyət göstərir” - deyə alim bildirdi.
Qeyd edək ki, hər il ölkəmizdə 7-8-ci sinif şagirdləri arasında keçirilən bu intellektual yarışda minlərlə məktəbli iştirak edir. XI rus dili və ədəbiyyatı respublika olimpiadasının əhəmiyyətini rusiyalı tanınmışlar da qeyd edirlər. “Rossotrudniçestvo” təşkilatının Azərbaycandakı nümayəndəliyinin rəhbəri Valentin Denisovun sözlərinə görə, Azərbaycanda rus dilinin inkişafına böyük önəm verilir. O qeyd edib ki, Azərbaycanda rus dili gənclər arasında çox populyardır. Dilin tədrisi üçün kurslar, orta və ali məktəblərdə xüsusi dərnəklər fəaliyyət göstərir.
Yeri gəlmişkən, 5 ay ərzində ölkənin müxtəlif şəhər və rayonlarında olimpiadanın 24 turu keçiriləcək. Nəticələr isə iyunda beynəlxalq rus dili günündə elan olunacaq.
Onu da deyək ki, Azərbaycanda keçirilən XI rus dili və ədəbiyyatı fənni üzrə respublika olimpiadasında Pirallahı və Xəzər rayonlarında fəaliyyət göstərən və BŞTİ-nin tabeliyində olan ümumtəhsil məktəblərinin 7-8-ci sinif şagirdləri iştirak ediblər. Sözügedən məktəblərin şagirdlərinin iştirakı ilə keçirilən olimpiadada qeyd edilib ki, keçmiş SSRİ respublikalarından fərqli olaraq, Azərbaycanda rus dilinə və ədəbiyyatına olan münasibət əvvəlki kimi qalıb. Bütün bunlar Azərbaycanda təhsilin səviyyəsinin, respublikamızda rus dilinə münasibətin yüksək olmasının təzahürüdür. Bu isə, öz növbəsində, Azərbaycanla Rusiya arasında olan əlaqələrin daha da möhkəmlənməsinə və inkişaf etməsinə şərait yaradacaq.
Onu da vurğulayaq ki, son 5 ildə Azərbaycanda rus dili və ədəbiyyatı üzrə respublika olimpiadası bir sıra rayon və şəhərlərimizdə keçirilib. İndiyə qədər bu olimpiada Sumqayıt, Gəncə, Xaçmaz, Şəki, Mingəçevir, Şamaxı, Şirvan, Lənkəran, Naxçıvan, Ağstafa, İsmayıllı, Göygöl, Daşkəsən, Samux, Goranboy, Yevlax, Tovuz və s. şəhər və rayonlarda düzənlənib.
Heç şübhəsiz ki, rus dili və ədəbiyyatının Azərbaycanda təbliğatı baxımından bu olimpiadanın ayrıca yeri var. Bunu hər kəs görür. Azərbaycan və Rusiya arasındakı isti münasibətlərin nümunələrindən olan bu tədbirlərin ölkəmizdə davamlı olaraq keçirilməsi bütün iddialara əsl cavabdır.
İradə SARIYEVA
