Seyid Camal Əzimbəyli: “O baxımdan bu həm də sosial ədalətin qorunması deməkdir”
Məlum olduğu kimi, Prezident İlham Əliyev 90-cı illərdə sığorta ödənişi alan şəhid ailələrinə də 11 min manatlıq birdəfəlik ödənişlərin verilməsi barədə fərmanda dəyişiklik edib. Dövlət başçısının etdiyi dəyişikliklə birdəfəlik ödəniş alacaq ailələrin içərisində 461 şəhid polisin ailəsi də var. Ödənişlərin həyata keçirilməsi üçün isə, ümumilikdə, 135 milyon manat vəsaitin ayrılması nəzərdə tutulub.
Belə ki, dövlət başçısının növbəti humanist təşəbbüsü ilə əlavə olaraq 2264 şəhid hərbi qulluqçu və 461 şəhid polisimizin vərəsələrinə də birdəfəlik ödəmə veriləcək. Bu fərmanla birdəfəlik ödəmələr artıq 12268 şəhidin vərəsələrini əhatə edir.
Şəhid ailələrinə birdəfəlik ödəmənin (11 min manat) verilməsi cəmiyyətdə böyük rəğbətlə qarşılanır. Bu da həmin ailələrin sosial müdafiəsinin yaxşılaşdırılmasının dövlət başçısının uğurlu siyasətinin başlıca məqsədlərindən biri olduğunu bir daha təsdiq edir.
Məlumat üçün qeyd edək ki, ötən dövr ərzində 3100 şəhid hərbi qulluqçunun 4200-ə qədər vərəsəsinə birdəfəlik ödəmə həyata keçirilib, bu istiqamət üzrə 34 milyon manat vəsait ödənilib. Hazırda 6444 şəhidin vərəsələrinə ödənişlər davam etməkdədir.
Məlum fərmandan sonra birdəfəlik ödəmənin əhatə dairəsi daha da genişlənəcək. Çünki Azərbaycanın ərazi bütövlüyü uğrunda 1997-ci ilin avqust ayının 2-dək şəhid olmuş əlavə 2725 şəhidin (o cümlədən 11000 manatdan az sığorta ödənişi almış 2264 şəhid hərbi qulluqçunun və 461 şəhid polisin) vərəsələrinə də birdəfəlik ödəmənin verilməsi tapşırılıb.
Onu da qeyd edək ki, ölkədə şəhid ailələrinin və müharibə əlillərinin sosial müdafiəsinin gücləndirilməsi istiqamətində mühüm addımlar atılır. Ümumilikdə, ötən dövrdə bu kateqoriyalardan olan vətəndaşlara 6654 mənzil verilib. O cümlədən, 2018-ci ildə şəhid ailələrinə və müharibə əlillərinə nəzərdə tutulduğundan 3 dəfə çox olmaqla 626 mənzil verilib. 2019-cu ildə isə həmin vətəndaşlara azı 800 mənzilin verilməsi nəzərdə tutulur. Eləcə də bu vaxta qədər müharibə əlillərinə 6144 avtomobil verilib.
Görünən odur ki, şəhid ailələri və müharibə veteranları hər zaman dövlətin diqqət mərkəzindədir. Prezident İlham Əliyevin qətiyyəti sayəsində son illər bu kateqoriyadan olan şəxslərə göstərilən sosial qayğı daha da artırılıb. Bütün bunlardan çıxış edərək ölkə başçısının son qərarını ekspertlər necə dəyərləndirirlər?
Məsələyə münasibət bildirən şərqşünas Seyid Camal Əzimbəyli ölkə başçısının məlum qərarını çox yüksək dəyərləndirdi: “Bu, Prezident İlham Əliyevin şəhid ailələrinə göstərdiyi diqqətin növbəti əyani sübutudur. Bunun sayəsində digər şəhid ailələri də diqqətdən kənarda qalmayacaq və birdəfəlik ödənişlərdən faydalanacaqlar. 3000 nəfərə yaxın şəhidin ailəsi yeni qərar sayəsində bu sosial imtiyazdan istifadə edəcək. O baxımdan bu həm də sosial ədalətin qorunması deməkdir. Nəzərə almaq lazımdır ki, Qarabağ müharibəsində çoxsaylı polis əməkdaşı şəhid olub. Münaqişənin ilk vaxtlarında Azərbaycanda milli ordu yox idi. Həmin dövrdə torpaqlarımızın müdafiəsində polislər böyük fədakarlıq göstəriblər. Sevindirici hal ondan ibarətdir ki, məlum fərmandan sonra şəhid olan polislərin vərəsələri birdəfəlik ödənişləri ala biləcəklər. Hesab edirəm ki, ölkə başçısının bu addımı Vətən yolunda şəhid olanların ruhuna böyük hörmətdir”.
Vidadi ORDAHALLI
