“Holiday İNN” otelində Nəsimi rayon İcra Hakimiyyəti başçısının 3 nömrəli Sahə İnzibati Ərazi Dairəsi üzrə nümayəndəliyinin 2018-ci ilin yekunlarına həsr olunan yığıncağı keçirilib.
Nəsimi RİH-dən baki-xeber.com-a verilən məlumata görə, hesabat məruzəsi ilə çıxış edən Nəsimi rayon İcra Hakimiyyəti başçısının 3 nömrəli Sahə İnzibati Ərazi Dairəsi üzrə nümayəndəsi Namiq Muradov bildirib ki, ötən il rayonda aparılan genişmiqyaslı quruculuq işləri çərçivəsində 3 nömrəli Sahə İnzibati Ərazi Dairəsi üzrə nümayəndəliyin ərazisində də bir sıra abadlıq, quruculuq və yenidənqurma işləri aparılıb.
Belə ki, Bakı şəhərinin rayonlarının sosial-iqtisadi inkişafının surətləndirilməsinə dair əlavə tədbirlər barədə Azərbaycan Respublikası Nazirlər Kabinetinin 25 fevral 2016-cı il tarixli, 86 nömrəli Qərarının icrası ilə əlaqədar hazırda inzibati ərazidə “Pilot İnşaat-A” MMC, “Malibo” MMC, “Yeni ailə”MMC, “Məkan” MMC, “Tac-1” MMC, “Bisütun” MTK tərəfindən işlər davam etdirilir.
“Bakı Abadlıq” MMC tərəfindən Dilarə Əliyeva, Şəmsi Bədəlbəyli, Səməd Vurğun, Bəşir Səfəroğlu, Rəşid Behbudov, 28 May, Vidadi , Əlövsət Quliyev, Rəsul Rza, Tolstoy, Qoqol, Həzi Aslanov, Mirzə İbrahimov, Əlimərdan Topçubaşov, Kövkəb Səfərəliyeva küçələrində ümumilikdə 230-dan çox binada təmir işləri aparılıb. Binaların eyvanları, dam örtükləri, fasadları təmir edilib, bəzi küçələrdə yeni optik kabellər çəkilib. Füzuli küçəsi 79 saylı binada isə təmir işləri davam etdirilir.
Rayonun Bəşir Səfəroğlu, Əlövsət Quliyev, Həzi Aslanov, Rəsul Rza, Əlimərdan Topçubaşov, Vidadi küçələrinin bəzi hissələrinə bardürlər düzüldüyünü deyən icra nümayəndəsi, eyni zamanda, səkilərə və yola asfalt örtüyü vurulduğunu, həmçinin küçələrə dibçəklər düzüldüyünü diqqətə çatdırıb və hazırda həmin ərazilərdə işlərin davam etdirildiyini deyib.
Onun sözlərinə görə, il ərzində müxtəlif ünvanlarda ümumilikdə 850 kv.m dam örtüyü, keçid meydançaları təmir edilib, Azərbaycan Dövlət Neft və Sənaye Universitetinin əsas korpusunun fasad hissəsində aparılan təmir işləri isə başa çatmaq üzrədir.
Namiq Muradov xatırladıb ki, uşaqların yay tətilinin səmərəli keçirilməsi məqsədilə Nəsimi rayon İcra Hakimiyyəti tərəfindən Respublikamızın gözəl guşələrindən olan Quba və Şəki şəhərlərində rayon ərazisində yerləşən orta ümumtəhsil məktəblərindən 200-dən çox şagirdin istirahəti təşkil olunub. Eləcə də "Ölkəmizi tanıyaq" layihəsi çərçivəsində Nəsimi rayon məktəbliləri respublikanın bir sıra rayonlarına səfər edib. Bununla yanaşı, Nəsimi rayon İcra Hakimiyyətinin təşkilatçılığı ilə 100 nəfər rayon məktəblisinin Heydər Əliyev Fondunun layihəsi olan Zirə Mədənyyət Mərkəzi və Eko Parka ekskursiyası təşkil olunub.
Yığıncaqda çıxış edən Nəsimi rayon İcra Hakimiyyətinin başçısı Asif Əsgərov bildirib ki, Prezident İlham Əliyevin həyata keçirdiyi yeni inkişaf konsepsiyasında ölkə paytaxtının və regionların sosial-iqtisadi inkişafı, şəhər və rayonların abadlaşdırılması, yeni infrastruktur layihələrinin davamlı olaraq icra edilməsi əsas istiqamətlər kimi qarşıya qoyulur.
Bakı şəhərində müasir infrastrukturun yaradılması sahəsində aparılan çoxşaxəli işləri burada yaşayan əhalinin mədəni-mənəvi həyat səviyyəsinin yüksəldilməsinə göstərilən diqqət və qayğının bariz nümunəsi adlandıran başçı deyib ki, məhz bu nəhəng quruculuq işlərinin nəticəsidir ki, müasir Bakı bu gün dünyanın ən gözəl şəhərlərindən birinə çevrilib.
Asif Əsgərov diqqətə çatdırıb ki, müxtəlif vaxtlarda 3 nömrəli Sahə İnzibati Ərazi Dairəsində “Central park” , “Winter park”, “Holiday İnn” otellərində, “Dünya biznes mərkəzi”ndə, “Messenat” holdinqdə, 8, 44, 46 saylı orta məktəblərdə səyyar qəbullar keçirilərək sakinlərin müraciətləri dinlənib.
Sentyabrın 12-də Prezident İlham Əliyevin general-leytenant Kərim Kərimov adına 8 nömrəli tam orta məktəbdə aparılmış əsaslı təmirdən sonra yaradılan şəraitlə tanış olduğunu deyən başçı 1900-cı ildə inşa edilən məktəb binasında pedaqoji kollektivin səmərəli fəaliyyət göstərməsi və şagirdlərin müasir tələblərə cavab verəcək səviyyədə təhsil almaları üçün hər cür şərait yaradıldığını vurğulayıb.
Daha sonra hesabat yığıncağında 8 nömrəli tam orta məktəbin müəllimi Hüseyn Əliyev, "Pilot İnşaat-A" MMC-nin icraçı direktoru Nuran Həsənzadə, “Ziya” İnsan hüquqlarının Müdafiə Mərkəzinin sədri Səyyad Bayramov və başqaları çıxış edərək, respublikada, o cümlədən Nəsimi rayonunda aparılan quruculuq işlərindən, həyata keçirilən böyük sosial və infrastruktur layihələrdən danışıblar.
Yığıncağın sonunda sakinləri maraqlandıran suallar cavablandırılıb.
Baki-xeber.com
