Flora Qasımova: “Prezidentin şəhid ailələri ilə görüşü onlara mənəvi baxımdan da böyük dəstəkdir”
Şəhid ailələrinə diqqət və qayğı ilbəil artır. Onların ailələrinə dövlətimiz tərəfindən hər cür köməklik və yardımlar göstərilir. Məlumdur ki, ötən il 1997-ci il avqustun 2-dək Azərbaycan Respublikasının ərazi bütövlüyü uğrunda həlak olmuş, ölmüş və hərbi əməliyyatlarla əlaqədar xəbərsiz itkin düşdüyünə görə ölmüş elan edilmiş hərbi qulluqçuların vərəsələrinə 11.000 (on bir min) manat məbləğində birdəfəlik ödəmə verilməsi ilə bağlı ölkə başçısının imzaladığı fərman da bu qayğının nəticəsidir.
Şəhid ailələrinə dövlət tərəfindən maddi yardımla yanaşı, sosial qayğı da göstərilir. Onlara dövlət tərəfindən mənzil verilir. Prezident İlham Əliyev mütəmadi olaraq şəhid ailələri ilə görüşür.
Dövlət başçısının şəhid ailələri ilə daha bir görüşü ötən gün baş tutub. Görüşdə dövlət tərəfindən şəhid ailələrinə göstərilən qayğı barəsində fikir mübadiləsi aparılıb.
Qeyd edək ki, şəhid ailələrinə diqqət və qayğı Prezident İlham Əliyevin həyata keçirdiyi siyasi kursun mühüm istiqamətlərindən biridir.
Millət vəkili Flora Qasımova “Bakı-Xəbər”ə açıqlamasında qeyd etdi ki, İlham Əliyev Prezident seçildikdən sonra ilk fərmanı məhz şəhid ailələrinin sosial müdafiəsinin gücləndirilməsi ilə bağlı oldu: “Həmin fərman sayəsində 10 minə yaxın şəhid ailəsinə birdəfəlik ödəmə veriləcək. Şəhid ailələrinə birdəfəlik ödəmənin verilməsi onların sosial müdafiəsinin yaxşılaşdırılması istiqamətində mühüm addımlardan biridir. Bu fərman sayəsində şəhid ailələrinin sosial problemi qismən də olsa öz həllini tapdı”.
Xanım millət vəkili bildirdi ki, Vətən yolunda şəhid olan şəxslərin ailələrinə daim qayğı göstərilir. Onların maddi durumunun yaxşılaşdırılması ilə bağlı mütəmadi olaraq yeni layihələr həyata keçirilir: “Şəhid övladlarının təhsil təminatı, sosial qayğıları dövlət tərəfindən qarşılanır.
Qarabağ müharibəsi əlillərinin, eyni zamanda, şəhid ailələrinin daşınmaz əmlakla təmin olunması ilə bağlı layihələr həyata keçirilir. Azərbaycanda hərbi qulluqçuların, şəhid ailələrinin, müharibə əlillərinin etibarlı sosial müdafiəsinin təmin edilməsinə xüsusi diqqət göstərilir. Məlumdur ki, son 20 il ərzində ölkəmizdə şəhid ailələrinə, müharibə əlillərinə 5500-dən çox fərdi ev və mənzil, altı mindən çox minik maşını verilib ki, bu da dövlətin müvafiq kateqoriyadan olan insanlara qayğısının təzahürüdür. Bu siyasət eyni ardıcıllıqla bu gün də davam etdirilir.
Bəllidir ki, Prezident İlham Əliyev mütəmadi olaraq şəhid ailələri ilə görüşür, onların sosial problemləri ilə maraqlanır. Prezidentin şəhid ailələri ilə görüşü onlara mənəvi baxımdan da böyük dəstəkdir”
Günel CƏLİLOVA
