Sahib Məmmədov: “Onlar dövlət büdcəsindən maaş alsalar da…”
Milli Məclisin Hüquq siyasəti və dövlət quruculuğu komitəsinin sədri Əli Hüseynli "Azərbaycan dövlət qulluğu sistemində islahatların davam etdirilməsinə dəstək layihəsi"nin bağlanış mərasimində çıxışı zamanı deyib ki, dövlət qulluğuna gənclərin qəbulu vətəndaşların bu prosesinin şəffaflığına olan inamını artırır.
Deputat qeyd edib ki, dövlət qulluğu ilə bağlı əsas məsələlər qanunvericilikdə öz əksini tapıb. Onun sözlərinə görə, 2016-cı il 31 may tarixində "Dövlət qulluğu haqqında" Qanuna edilən dəyişikliklər kifayət qədər mütərəqqi idi: "İndi qarşıya qoyulan yeni məsələlər mövcuddur. Mövcud problemlərin qanunvericilik yolu ilə həlli məqsədilə tövsiyələr verilib. Hazırda komitəmizdə bu iş həyata keçirilir. Bu işi Dövlət İmtahan Mərkəzinin hüquqşünasları ilə birlikdə icra edəcəyik".
Avropa İttifaqının Azərbaycandakı nümayəndəliyinin rəhbəri Kestutis Yankauskas isə deyib ki, təhsil, səhiyyə, sosial müdafiə sahələrində yeni sistem qurulmalı, bu sahələri dövlət qulluqçuları idarə etməlidirlər: "Dövlət qulluqçularının seçilməsi, onların maaş və təqaüd məsələsi barəsində düşünməliyik. Layihə çərçivəsində qiymətləndirmə, maaş, mükafatlandırma sisteminin qurulması vacibdir. Ümid edirəm ki, Azərbaycanın dövlət qulluğu sistemi daha effektiv və güclü olacaq".
Bu məsələ ilə bağlı Avropa İttifaqının Azərbaycandakı rəhbərinin yanaşmasında xüsusilə diqqətçəkən məqam var. O deyib ki, təhsil, səhiyyə, sosial müdafiə sahələrində yeni sistem qurulmalı, bu sahələri dövlət qulluqçuları idarə etməlidirlər. Maraqlı sual yaranır: məgər indiyə qədər Azərbaycanda deyilən sahələri dövlət qulluqçuları idarə etmirlər? Aİ-nin nümayəndəsinin bu islahat təklifi özündə nəyi əhatə edə bilər?
Əmək Hüquqlarının Müdafisəi Liqasının rəhbəri Sahib Məmmədov “Bak-Xəbər”ə açıqlamasında bildirdi ki, bu olduqca maraqlı təklifdir: “Bilirsiniz ki, sözügedən orqanlar: Təhsil Nazirliyi, Əmək və Əhalinin Sosial Müdaifiəsi Nazirliyi və Səhiyyə Nazirliyini əhatə edən sahələrin böyük əksəriyyəti dövlətin nəzarətindədir. Həmin qurumları idarə edənlər isə dövlət qulluqçularıdırlar. Görünür, Avropa İttifaqının nümayəndəsi başqa detalı nəzərədə tutur. Söhbət həmin sahələrdə çalışanlardan gedə bilər. Məsələn, sosial, səhiyyə və təhsil sahələrində çalışan şəxslər nəzərdə tutula bilər. Bu qurumların dövlətin nəzarətində olan hissələrində çalışanların böyük əksəriyyəti dövlət qulluqçusu deyil. Onlar dövlət büdcəsindən maaş alsalar da, dövlət qulluqçusu statusunda deyillər. Əvvəllər belə bir təklif vardı ki, bu kateqoriya da dövlət qulluğunun hansısa formasına keçə bilər. Yəqin ki, bu məqam nəzərdə tutulub. Avropa İttifaqı nümayəndəsinin qeyd etdiyi sahələrdə doğrudan da ciddi islahatların aparılmasına zərurət var. Hazırda dövlətimiz tərəfindən həmin istiqamətlərdə islahatlar aparılır. Hər üç qurumda struktur və kadr islahatları həyata keçirilir. Bu islhatların nə dərəcədə uğurlu olub-olmayacağını isə zaman bizə göstərəcək. Bir faktı da qeyd edim ki, deyilən sahələrin hazırda heç də hamısı dövlətin nəzarəti altında deyil. Bilirsiniz ki, özəl təhsil və səhiyyə sistemi də mövcuddur. Amma ümumi nəzarət dövlətin əlindədir. Hər üç sahə çox vacibdir. Avropa İttifaqı nümayəndəsinin məhz bu sahələrin inkişafına diqqət yönəltməsi olduqca təqdirəlayiqdir”.
Məhəmmədəli QƏRİBLİ
