“Bunu təxribat məqsədilə ediblər ki, guya Azərbaycanda rusların qəbri dağıdılır…” “Təxribatçıların pis əməlləri nəticəsində xalqımızın, dövlətimizin adına xələl gələ bilər”
Azərbaycan cəmiyyəti tarixən öz tolerantlığı, milli və dini cəhətdən heç bir ayrıseçkiliyin yol verilmədiyi bir cəmiyyət kimi tanınıb, bu gün də tanınmaqdadır. Burada yaşayan bütün xalqların milli-mənəvi dəyərlərinə hörmət və qayğı ilə yanaşılır.
Ölkəmizdə azərbaycanlılarla yanaşı, digər xalqlara, dinlərə məxsus məzarlıqlar da mövcuddur və həmin məzarlıqlara, orada uyuyan qeyri-azərbaycanlıların xatirəsinə həmişə sayğı göstərilib. Yəni Azərbaycanda heç bir xalqa aid olan məzarlıqlara qarşı hər hansı bir neqativ münasibət olmayıb. Bu bir danılmaz həqiqətdir.
Mətbuatda Sabunçu rayonunun Zabrat qəsəbəsində yerləşən “rus qəbiristanlığı”nda qəbirlərin dağıdılması haqqında məlumat yayılıb. Oxu.az-ın yazdığına görə, bu barədə onlara yaxınlarının məzarını ziyarət etmək üçün “rus qəbiristanlığı”na gedən vətəndaşlar məlumat veriblər. Vətəndaşlardan birinin mətbuata bildirdiyinə görə, həyat yoldaşı Zabratda yerləşən “rus qəbiristanlığı”na anasının məzarını ziyarət etməyə gedib və görüb ki, yaxınlıqdakı qəbir daşları sındırılıb, xaçlar yerindən çıxarılaraq kənara atılıb. O, həmçinin, vurğulayıb ki, təxminən 150-yə yaxın qəbir daşı, portretlər dağıdılıb. “Bu, bir və ya beş nəfərin işi deyil. Mənzərədən görünür ki, kimlərsə hazırlıqlı şəkildə əllərində balyozlarla (kuvald) gəlib və yüzlərlə insanın əzizlərinin məzarını dağıdıblar. Buna heç bir izah vermək olmaz” - deyə mətbuata həmin şəxs bildirib.
Sözügedən hadisənin baş verməsi həqiqətən də qəbuledilən deyil. Məzarlıqda həyata keçirilən bu xoşagəlməz hadisənin sırf təxribat məqsədilə törədildiyi gizlin deyil. Hansısa təxribatçı qüvvələr “rus qəbiristanlığı”nda məzar daşlarını sındırmaqla, qəbirlərə qarşı belə naqis əməl işlətməklə Azərbaycan və rus xalqları arasında nifaq yaratmağa cəhd göstəriblər. Eləcə də bu hadisəni törədənlər Azərbaycan və Rusiya dövlətləri arasında günü-gündən inkişaf edən dostluq münasibətlərinə, əməkdaşlıq əlaqələrinə xələl gətirmək məqsədi güdüblər.
Zabrat “rus qəbiristanlığı”nın müdiri Əsgər Sadıqov “Bakı-Xəbər”ə açıqlamasında təəssüf hissilə belə bir hadisənin baş verdiyini təsdiqlədi. Ə.Sadıqov hesab edir ki, bu sırf təxribatdır və bu təxribata yol verən şəxslər məsuliyyətə cəlb edilməlidirlər. Hadisə ilə bağlı müvafiq qurumlara, hüquq-mühafizə orqanlarına məlumat verildiyini deyən Ə.Sadıqovun sözlərinə görə, hadisəni törədən şəxslər bunu məqsədli şəkildə həyata keçiriblər. “Çox təəssüf ki, belə bir hadisə baş verib. Artıq bu barədə müvafiq qurumlara məlumat verilib, hüquq-mühafizə orqanlarına müraciət edilib. Burada bir-iki məzar yox, 50 qəbir dağıdıblar. Belə halın baş verməsi biabırçılıqdır. Mənə belə gəlir, bu işi törədənlər bunu təxribat məqsədilə ediblər ki, guya Azərbaycanda rusların qəbri dağıdılır. Belə olmaz. Hadisə bizim iş saatımız vaxı baş verməyib, bu işi gecə görüblər. Mən səhər saat 08:00-dən axşam saat 17:00-a qədər əraziyə mümkün qədər nəzarət edirəm. Mən bu hadisəni törədənləri görsəydim, onalara imkan verməzdim ki, belə hadisələr törətsinlər. Qəbir daşlarını niyə sındırırsınız? Bu daşlar sizə nə edib? Hadisə gecə saatlarında baş verib. İnsanlarda namus, qeyrət olmalıdır ki, bu addımı atmasınlar. Bu qəbirləri vurub sındıran təxribatçıların pis əməlləri nəticəsində xalqımızın, dövlətimizin adına xələl gələ bilər. Əslində, elə onların da məqsədi budur ki, dövlətimizə xələl gəlsin”.
Bu qəbiristanlığın 100-dən artıq yaşı olduğunu deyən Ə.Sadıqovun sözlərinə görə, burada Bakının müxtəlif yerlərindən olan ruslar dəfn ediliblər. “Zabratdan, Sabunçudan, Bakıxanovdan, eləcə də Bakının digər yerlərindən gətirib burada vəfat edən insanları dəfn edirlər. Ölü sahibləri gəlib hadisəni gözləri ilə görüblər və onlar müxtəlif təşkilatlara müraciət ediblər. Bu böyük təxribatdır və bunun qarşısı alınmalıdır” - deyə Ə.Sadıqov qeyd etdi.
İradə SARIYEVA
