Məhərrəm Zülfüqarlı: “Bu baxımdan, aparılan islahatlara göstərilən fəal ictimai dəstəyin daha da artacağı gözlənir”
Ölkədə həyata keçirilən inkişaf strategiyası və bundan irəli gələn məsələlərin həlli Azərbaycanın iqtisadi baxımdan inkişafını stimullaşdırır. Özü də bütün görülən işlər müasir dövrün tələblərinə uyğun şəkildə həyata keçirilir. Çünki müasir dövrdə iqtisadi şərait sürətlə dəyişir və əməyə olan tələbatın həcmi, eləcə də tərkibində davamlı dəyişikliklər yaşanır. Belə bir dövrdə, yəni əmək bazarının çoxamilli təsirlərə məruz qaldığı bir şəraitdə əhalinin məşğulluğunun davamlı təmin edilməsi, işsizliyin aşağı səviyyədə saxlanmasına nail olunması çox vacib məsələdir.
Azərbaycanın əmək bazarında stabilliyin təmin edilməsi, onun qorunub saxlanması daim mövcud hakimiyyətin diqqətində olan məsələdir. Ölkənin əmək bazarına hər il 100 mindən çox gənc işçi qüvvəsinin daxil olduğu bir dövrdə məşğulluq məsələləri səmərəli kompleks tədbirlər proqramının reallaşdırılması hesabına təmin edilir, kütləvi işsizliyin yaranması kimi hallar baş vermir.
Müşahidələr göstərir ki, Azərbaycanda aparılan struktur islahatları MDB ölkələri ilə müqayisədə iş yerlərinin ixtisar olunması ilə, bağlanması ilə müşayiət olunmur. Buna görə müxtəlif qurumlarda çalışan şəxslər işsiz qalmırlar. Bəzi ölkələrdə bu kimi islahatlar kütləvi ixtisarlarla müşayiət olunur. Bu da, öz növbəsində, müəyyən sosial gərginliklərin yaranmasına səbəb olur. Azərbaycanda isə sözügedən proses çox ağrısız həyata keçirilir.
Bu günlərdə Prezident İlham Əliyev bəyan etdi ki, struktur islahatları ixtisarlara səbəb olmamalıdır: “Dövlət qurumlarında struktur islahatları aparılır. Bu islahatların bir məqsədi var ki, biz işimizi daha da yüksək səviyyədə quraq. Onu da bildirməliyəm ki, mövcud strukturlarda, ixtisar olunan strukturlarda çalışan vətəndaşlar işlə təmin olunacaqlar. Kənd təsərrüfatında heç bir ixtisar gözlənilmir və digər strukturlara da tapşırılıb ki, islahatlar ixtisarlara gətirib çıxarmasın”.
Prezident İlham Əliyevin bu yanaşması ictimaiyyətin böyük rəğbətinə səbəb oldu. Bütün bu deyilənlərin fonunda, Azərbaycanda struktur islahatlarının MDB ölkələri ilə müqayisədə ixtisarlarsız həyata keçirilməsi aparılan islahatlara ictimaiyyətin daha da fəal dəstək verməsində necə rol oynayacaq?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, bu faktor islahatlarla bağlı ictimai dəstəyin daha da artmasında mühüm rol oynayacaq: “Yeri gəlmişkən qeyd edim ki, Azərbaycan hətta SSRİ vaxtı 14 respublikadan fərqlənirdi. Yəni Azərbaycan SSRİ-də dotasiya ilə yaşamayan yeganə respublika idi. Moskva bizdən alırdı və ac Ermənistana verirdi. O vaxt belə, bizdə iqtisadi inkişaf digər müttəfiq respublikalarla müqayisədə yüksək idi. Ona görə də indi Azərbaycan regionda lider dövlət olmaqla yanaşı, aparılan struktur islahatları ixtisarlarla müşayiət olunmur. Neftdən gələn gəlir qeyri-neft sektorunun inkişafına yönəldilir. Bütün bunlarla paralel, islahatlar keçirilir və ixtisara düşənlər digər yerlərdə müvafiq işlə təmin olunurlar. Ona görə də Azərbaycanda aparılan struktur islahatları işsizliyin yaranmasına gətirib çıxarmır. Belə olan halda, əlbəttə ki, ölkə ictimaiyyəti bu yöndə görülən işləri dəstəkləyəcək. Necə ki, dəstəkləyir. Bütün bunlar Azərbaycan vətəndaşlarının gələcəyə olan ümidlərini daha da artırır. Bu baxımdan, aparılan islahatlara göstərilən fəal ictimai dəstəyin daha da artacağı gözlənir. Çünki dövlətin bu yöndə apardığı siyasət xalqın maraqlarına uyğundur. Digər tərəfdən, Allah Azərbaycana bütün nemətləri verib. Zəngin təbii iqlim, faydalı qazıntılar bu baxımdan yaxşı imkanlar vəd edir. Bizdə olan imkanlar digər ölkələrlə müqayisədə daha böyükdür. Hesab edirəm ki, aparılan struktur islahatları yaxın perspektivdə öz bəhrəsini verəcək”.
Vidadi ORDAHALLI
