Kəmalə Ağazadə: “Yeni qaydalara əsasən, əlillərin övladlığa uşaq götürməsi ilə bağlı qadağa aradan qaldırılır”
Xəbər verildiyi kimi, Azərbaycanda övladlığagötürmə ilə bağlı qanunvericilik təkmilləşdiriləcək. Qeyd edək ki, Azərbaycan Respublikasının Prezidenti cənab İlham Əliyevin “Övladlığagötürmə sahəsində idarəetmənin təkmilləşdirilməsi haqqında” 10 dekabr 2018-ci il tarixli, 393 nömrəli Fərmanı ilə verilmiş tapşırıqların icrası ilə bağlı Əmək və Əhalinin Sosial Müdafiəsi Nazirliyi üzrə tədbirlər planı hazırlanaraq təsdiq edilib.
Fərmana əsasən, övladlığagötürmə sahəsində idarəetmə mexanizminin, valideyn himayəsindən məhrum olmuş və övladlığa götürülən uşaqların, habelə onları övladlığa götürməyi arzu edən şəxslərin uçotunun təkmilləşdirilməsi, eləcə də övladlığagötürmə prosesində şəffaflığın təmin edilməsi, övladlığa götürülmüş uşaqların yeni ailələrdə yaşaması və inkişafı prosesinə nəzarətin gücləndirilməsi məqsədilə övladlığagötürmə sahəsində dövlət siyasətinin və tənzimləmənin həyata keçirilməsi Əmək və Əhalinin Sosial Müdafiəsi Nazirliyinə tapşırılıb.
Əmək və Əhalinin Sosial Müdafiəsi Nazirliyinin şöbə müdiri Sabir Qocayev media nümayəndələrinə açıqlamasında qeyd edib ki, müəyyən yaş kateqoriyasında olan uşaq onu övladlığa götürmək istəyən ailəni özü seçə biləcək. Eyni zamanda, övladlığa uşaq götürmək istəyən şəxslər arasında valideyn olmağa uyğun olanlar seçiləcək: “Valideynin kriteriyası ilə uşağın meyarları tutuşdurulacaq. Uşaq üçün bir neçə namizəddən ən uyğun gələni bal sistemi ilə müəyyənləşdiriləcək. Daha uyğun, daha münasib ailə seçiləcək. İlkin mərhələdə müəyyən sınaq müddəti, təxmini bir neçə ay müddətində həmin uşağın ailədə yerləşdirilməsi nəzərdə tutulur. Bu prosesə Əmək və Əhalinin Sosial Müdafiəsi Nazirliyinin bilavasitə əməkdaşları nəzarət edəcək, mütəmadi monitorinqlər aparılacaq”.
Övladlığa uşağın yeni qaydalar əsasında verilməsinin əhəmiyyəti barəsində “Bakı-Xəbər”ə məlumat verən Azərbaycan Uşaqlar Birliyinin sədri Kəmalə Ağazadə qeyd etdi ki, övladlığa uşaq verilməsi olduqca həssas məsələdir: “Məlumdur ki, uşaqların övladlığa verilməsi müəyyən qurumlar tərəfindən həyata keçirilir. İndiyədək 3 yaşa qədər uşaqların övladlığa götürülməsi ilə bağlı qərarı Səhiyyə, daha böyük yaş kateqoriyasında isə Təhsil Nazirliyi, əcnəbilərə isə Ailə, Qadın, Uşaq Problemləri üzrə Dövlət Komitəsi verirdi. Bir növ, bu sahədə pərakəndəlik yaşanırdı. Bundan sonra övladlığagötürmə və valideynlikdən məhrum olunma ilə bağlı bütün qərarlar Əmək və Əhalinin Sosial Müdafiəsi Nazirliyinə həvalə olunub”.
Həmsöhbətimizin sözlərinə görə, övladlığa uşaq verilməsi ilə bağlı vahid məlumat bazasının yaradılması müsbət haldır. Uşaqlar haqqında məlumatın yerləşdirilməsi şəffaflığı təmin edəcək.
Ekspert onu da bildirdi ki, yeni qaydalara əsasən, əlillərin övladlığa uşaq götürməsi ilə bağlı qadağa aradan qaldırılır: “BMT-nin Əlilliyi olan şəxslərin hüquqları üzrə komitəsindən Azərbaycan hökumətinə bu sahədəki konvensiyanın icrası ilə bağlı suallar daxil olub. Həmin suallardan biri Nazirlər Kabinetinin 172 saylı qərarında olan, övladlığa uşaq götürmək istəyən şəxslərin xəstəliklərinə dair tələbidir. Həmin tələbdə birinci, ikinci qrup əlilliyi olan şəxslərə övladlığa uşaq götürmək məhdudiyyəti qoyulub. Bu da, təbii ki, həmin şəxslərə qarşı ayrıseçkilikdir. Uşağın valideynlərindən biri vəfat edirsə və digər valideyni birinci və ya ikinci qrup əlilliyi olan şəxsdirsə, uşaq valideyn himayəsindən məhrum edilmiş hesab olunur".
Günel CƏLİLOVA
