Aytəkin Kamranqızı: “Gənclərin dövlət sektoruna meyl etməsi üçün müəyyən stimullaşdırıcı tədbirlər görülməlidir”
“Bu gün dövlət sektoru ilə müqayisədə özəl sektorda əmək haqqının yüksək olması səbəbindən peşəkar kadrlar daha çox özəl sektora üz tuturlar". Bunu jurnalistlərə açıqlamasında Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.
O, bildirib ki, peşəkar kadrları dövlət sektorunda saxlamaq üçün motivasiya xarakterli addımlar atılmalıdır: "Hazırkı mövcud qanunvericilikdə dövlət qulluqçularının qiymətləndirilməsi sistemi var. Lakin bu fəaliyyətin nəticəsi yalnız mənəvi baxımdan dəyərləndirilir, yəni pisdirsə töhmət, yaxşıdırsa təşəkkürnamə ala bilər. Bu fəaliyyətin nəticəsi dövlət qulluqçusunun əmək haqqına heç bir təsir göstərmir. Biz dövlət qulluqçularının fəaliyyətinin qiymətləndirilməsi ilə bağlı yeni təklifləri qanunvericilik bazasına daxil etmək təşəbbüsündən çıxış etmişik".
Bu gün gənclərin dövlət sektoru ilə müqayisədə özəl sektora meyl etməsinin səbəbi və bunun necə həll olunmasını öyrənmək məqsədilə sosioloq Aytəkin Kamranqızı bizimlə söhbətində bildirdi ki, özəl sektora meylin artmasının səbəblərindən biri əmək haqqının həcmi ilə bağlıdır: “Özəl sektorla müqayisədə dövlət sektorunda çalışanlara daha yüksək əmək haqqı verilməlidir. Gənclərin dövlət sektoruna meyl etməsi üçün müəyyən stimullaşdırıcı tədbirlər görülməlidir. Əmək haqqı artmalı, onların öz işini daha mükəmməl şəkildə mənimsəməsi üçün təlimlərə göndərilməsinə şərait yaratmaq lazımdır”.
Həmsöhbətimiz onu da bildirdi ki, dövlət sektorunda çalışanlara güzəştlər tətbiq olunmalıdır. Onlara güzəştli kreditlər verilə bilər. Bu kimi tədbirlər görülərsə gənclər dövlət sektoruna daha çox meyl göstərər.
Günel CƏLİLOVA
