“Xarici ölkələrin ali təhsil müəssisələrində təhsil alan tələbələrin bilik və bacarıqları Azərbaycanda təhsil alan tələbələrin bilik və bacarıqlarından fərqlənir”
“Ali təhsil müəssisələrimizdə təhsil əmək bazarının tələblərinə uyğun şəkildə təşkil olunmalıdır". Bunu Dövlət İmtahan Mərkəzinin Direktorlar Şurasının sədri Məleykə Abbaszadə "Azərbaycan dövlət qulluğu sistemində islahatların davam etdirilməsinə dəstək layihəsi"nin bağlanış mərasimində çıxışı zamanı deyib. O qeyd edib ki, dövlət qulluğu sahəsinin inkişaf etdirilməsi birbaşa təhsil sistemi ilə bağlıdır: "Bu sahədə biz təkcə dövlət qurumları ilə deyil, ali təhsil ocaqları ilə də sıx əlaqələr qurmalıyıq. Ali təhsil müəssisələrimizdə təhsil əmək bazarının tələblərinə uyğun şəkildə təşkil olunmalıdır".
Ali təhsil müəssisələrində təhsilin əmək bazarının tələbinə necə uyğunlaşdırılacağını öyrənmək məqsədilə təhsil eksperti Məlahət Mürşüdlüyə müraciət etdik.
O bizimlə söhbətində qeyd etdi ki, bəzi ali təhsil müəssisələri tərəfindən hazırlanan kadrlar əmək bazarının tələblərinə cavab vermir. Bu gün xaricdə təhsil proqramı üzrə xarici ölkələrin ali təhsil müəssisələrində təhsil alan tələbələrin bilik və bacarıqları Azərbaycanda təhsil alan tələbələrin bilik və bacarıqlarından fərqlənir: “Bununda səbəbi bizim ali təhsil müəssisələrimizin hazırladığı kadrlar, kadrların bilik və bacarıqları, yerli tələblərə cavab vermir”.
Həmsöhbətimiz hesab edir ki, təhsilin inkişafı ölkədə əhalinin rifahının yaxşılaşması, həmçinin, fərdin həyatının daha yüksək səviyyədə qurulması üçün zəmin yaradır. Təhsil insanlara texnologiyaları çevik mənimsəmək, əmək bazarında layiqli yer tutmaq və ömür boyu təhsil prosesinə qoşulmaq, sağlam həyat tərzi, ətraf mühitə münasibətdə düzgün mövqe seçmək imkanı verir: “Təhsilin əmək bazarının tələbinə cavab verməsi üçün xarici təcrübədən istifadə etmək lazımdır. Eyni zamanda, təhsilin büdcədən asılılığını azaltmaq lazımdır.
Günel CƏLİLOVA
