Sahib Məmmədov: “Məşğulluq Strategiyasında gənclərin məşğulluğunun təmin edilməsinə yönələn tədbirlər nəzərdə tutulub”
Azərbaycan dövləti gənclərin məşğulluğunun təmin edilməsi ilə bağlı müxtəlif tədbirlər həyata keçirir. Bu da cəmiyyətin aparıcı qüvvəsi olan gənclərin iş yerləri qazanması ilə nəticələnir. Son illər dövlətin işsizliyin ləğv edilməsi ilə əlaqədar gördüyü işlərin nəticəsidir ki, həm paytaxtda, həm də bölgələrdə gənclər işlə təmin edilir, onlar müxtəlif sferalarda çalışırlar. Müasir əmək bazarının tələblərini nəzərə alan dövlət müxtəlif peşə yönümlü təhsil müəssisələrində yeni peşə ixtisaslarının tədrisinin də həyata keçirilməsinə nail olub.
Azərbaycanda gənclərin məşğulluğunun yüksələn xətt üzrə inkişaf etməsi beynəlxalq qurumların da diqqətindən yayınmır. Beynəlxalq Əmək Təşkilatı Azərbaycanda gənclərin məşğulluğu üzrə aparılan işi yüksək qiymətləndirir.
Qurumdan bildirilir ki, Azərbaycan gənclərin iş yerləri ilə təmin olunmasına böyük əhəmiyyət verir. Bu barədə Bakıda keçirilən “Gənclərin məşğulluğu: işəgötürənlərin baxışı, çağırışlar və perspektivlər” konfransında Beynəlxalq Əmək Təşkilatının (BƏT) baş direktoru Qay Rayderin iştirakçılara ünvanlanmış müraciətində bildirilir.
Müraciətdə bildirilir ki, Azərbaycan əhalisinin əksəriyyəti gənclərdir və gələcəkdə onlar üçün əlverişli şərait yaratmaq lazımdır: “Biz əmək bazarında indiki vəziyyətdə əlverişli şərait yaratmalıyıq. Əks halda bu, dünyada iş yerlərinin kəskin azalmasına gətirib çıxaracaq. Hesab edirəm ki, bizim üçün ən vacib məsələlərdən biri əmək bazarını müasir dünyanın tələblərinə uyğunlaşdırmaqdır”.
Əməkçilərinin Hüquqlarının Müdafiə Liqasının sədri Sahib Məmmədov mövzu ilə bağlı “Bakı-Xəbər”ə bildirdi ki, Azərbaycanda gənclərin məşğulluğunun təmin edilməsi ilə əlaqədar problem tam həll olunmasa da, bu istiqamətdə inkişafa doğru xeyli irəliləyiş var. “Son illər gənclərin məşğulluğunun təmin edilməsilə bağlı işlər görülməkdədir. Bilirsiniz ki, “2019-2030-cu illər üçün Məşğulluq Strategiyası” təsdiqlənib. Gözlənir ki, yaxın vaxtlarda bu strategiyanın icrası üzrə birinci fəaliyyət planı, yaxud dövlət proqramı qəbul olunacaq. Məşğulluq Strategiyasında gənclərin məşğulluğunun təmin edilməsinə yönələn tədbirlər nəzərdə tutulub. Xüsusilə də peşə, eləcə də ali və orta ixtisas təhsilinin inkişafına diqqət yönəldilib, təhsillə istehsal arasında əlaqələrin qurulmasına dair hədəflər müəyyən edilib. Eyni zamanda, işəgötürmə ilə bağlı müxtəlif təşkilatların təşəbbüsləri də var. Məsələn, bunlar Gənclər Fondu tərəfindən işə götürülən gənclərin dəstəklənməsi ilə bağlıdır və s. Azərbaycanda gənclərin məşğulluğunun təmin edilməsi sahəsində nəzərəçarpacaq dərəcədə irəliləyiş var. Ancaq gənclərin məşğulluğu ilə bağlı problem hələ tam olaraq öz həllini tapmayıb. Hesab edirəm ki, bu istiqamətdə də addımlar atılacaq. Regionlardakı gənclərin əməyinin stimullaşdırılması üçün müəyyən tədbirlər həyata keçirilməlidir”.
S.Məmmədov hesab edir ki, gəncləri daha çox bölgələrə cəlb etmək və orada onların məşğulluğunu təmin etmək məsələsi diqqətdə saxlanmalıdır. O qeyd edir ki, gənclərə bölgələrdə ipoteka yolu ilə mənzillərin verilməsi, həmçinin, ev tikmələri üçün pulsuz torpaq sahələri ayrılması çox vacibdir. Gənclərin bu yollarla stimullaşdırılması daha müsbət nəticələr verə bilər.
İradə SARIYEVA
