Ərşad Hüseynov: “Bütün daşıyıcılar nağdsız ödəniş sisteminə keçərsə, maliyyə dövriyyəsinə nəzarət etmək rahat olur”
Davosda səfərdə olan Azərbaycan Prezidentinin görüşləri davam edir. Ölkə başçısı yanvarın 22-də Davosda “Visa” şirkətinin prezidenti Rayan Maklnerni ilə görüşüb.
“Visa” brendli kartlardan geniş istifadə edildiyini deyən Rayan Maklnerni şirkətin ölkədə fəaliyyətinin genişləndirilməsində maraqlı olduğunu, bir çox sahələrdə, o cümlədən, ictimai nəqliyyatda da nağdsız ödənişlərin geniş tətbiqinə dəstək göstərməyə hazır olduqlarını vurğulayıb.
İctimai nəqliyyatda nağdsız ödənişlərin tətbiqinin vacibliyi barəsində danışan nəqliyyat məsələləri üzrə ekspert Ərşad Hüseynov “Bakı-Xəbər”ə açıqlamasında qeyd etdi ki, hazırda şəhərdaxili avtobus və metroda kart sistemindən istifadə olunur: “İctimai nəqliyyat geniş sahələri əhatə edir. Bura avtobus, gəmi, təyyarə, qatar, metro, taksi və digər nəqliyyat vasitələri aiddir. Məlumdur ki, təyyarə, qatar və gəmidən istifadə etmək üçün bilet əldə etmək lazımdır. Öncədən bilet almaqla adıçəkilən nəqliyyat vasitələrindən istifadə etmək olar. Taksidə isə bu gün yalnız nağd ödəniş sistemindən istifadə olunur. Nağdsız ödəniş metroda uzun illərdir tətbiq olunub. Şəhərdaxili avtobusların bəzisində nağdsız ödəniş tətbiq olunub. Paytaxt ərazisində hərəkət edən 400-dən artıq avtobus nağdsız ödəniş sistemindən istifadə edir. Bakı şəhərində hərəkət edən abtobusların hər birinin nağdsız ödənişdən istifadə edəcəyi gözlənir. Bununla bağlı müəyyən işlər görülür. Ancaq bölgələrdə isə nağdsız ödəniş hələ tətbiq olunmayıb. Tək paytaxt ərazisində deyil, bölgələrdə də avtobusların nağdsız ödənişdən istifadə etməsi yaxşı hal olar. Bütün daşıyıcılar nağdsız ödəniş sisteminə keçərsə, maliyyə dövriyyəsinə nəzarət etmək rahat olur. Eyni zamanda, sürücülərin nağd puldan asılılığı da aradan qalxır. Bu səbəbdən də hesab edirəm ki, ictimai nəqliyyat nağdsız ödəniş sisteminə keçməlidir”.
Günel CƏLİLOVA
