Əhali üçün tibbi xidmətin keyfiyyətinin yüksəldilməsinin yeganə yolu icbari tibbi sığortaya keçiddir. Bunun ikinci yolu yoxdur. “Trend”in məlumatına görə, bunu Milli Məclisin Səhiyyə komitəsinin sədri Əhliman Əmiraslanov komitənin yanvarın 18-də keçirilən iclasında çıxış edərkən deyib.
Ə.Əmiraslanovun sözlərinə görə, 2020-ci ildə bütün ölkə üzrə icbari tibbi sığorta sistemi tətbiq ediləcək. Buna görə də 2019-cu il icbari tibbi sığortaya keçid üçün “hazırlıq ili” elan edilib: “Prezidentin fərmanı ilə “Tibbi Ərazi Bölmələrini İdarəetmə Birliyi” (TƏBİB) yaradılıb. Bu qurum artıq öz işinə başlayıb. Həmin qurum gələcəkdə icbari tibbi sığortanın həyata keçirilməsində əsas rol oynayan təşkilata çevriləcək”.
Komitə sədri icbari tibbi sığortaya keçidin təmini üçün 1999-cu ildə qəbul edilmiş “Tibbi sığorta haqqında” qanun layihəsinin yenidən işlənildiyini, icbari tibbi sığortanın tətbiqinin qanunvericilik baxımından təmin edildiyini söyləyib.
Ə.Əmiraslanov sistemin tətbiq edildiyi pilot rayonlarda icbari tibbi sığorta üzrə nəticələrin çox müsbət olduğunu deyib.
Komitə sədri deyib ki, “Reproduktiv sağlamlıq haqqında”, “İnsan orqanlarının donorluğu və transplantasiyası haqqında, “Optika və optikaçılıq haqqında qanun layihələrinin parlamentin yaz sessiyasının müzakirəsinə çıxarılması nəzərdə tutulur. Ə.Əmiraslanov qeyd edib ki, “Reproduktiv sağlamlıq haqqında” qanunla bağlı bəzi deputatların iradları olub: “Onların iradlarında obyektiv səbəblər də var idi, amma subyektiv yanaşmalar da çox idi. Biz qanun layihəsini yenidən işlədik və artıq müzakirəyə hazırdır. Qanunun əleyhinə olan qurum yoxdur”.
Komitə sədri əlavə edib ki, “Reproduktiv sağlamlıq haqqında” qanun layihəsində yalnız ekstrakorporal (süni) mayalanmadan söhbət getmir: “Bu məsələ həmin qanunun cüzi bir hissəsidir. Bu qanun layihəsi ümumilikdə qadınlarımızın sağlamlığına yönəlib". “İnsan orqanlarının donorluğu və transplantasiyası haqqında qanun layihəsiə gəldikdə isə Ə.Əmiraslanov hesab edir ki, sənəddə ciddi dəyişikliklərə ehtiyac var: “Meyitdən orqan və toxumanın götürülməsi həmin qanun layihəsində öz əksini tapmayıb. Bu da transplantasiyanın əsasını təşkil edir. Hesab edirik ki, bununla bağlı yeni qanun olsa, daha yaxşı olar. Məsələ ilə əlaqədar bağlı işçi qrup yaradaq. Bu gün cəmiyyətin bu qanuna böyük ehtiyac var. Bu qanun orqan transplantasiyasına ehtiyacı olan insanların işlərini də rahatlaşdırar. Orqan transplantasiyasına ehtiyacı olan insanların çoxu növbə gözləyə-gözləyə həyatlarını itirirlər”.
Ə.Əmiraslanov qeyd edib ki, qaraciyər transplantasiyası ilə bağlı mühüm işlər görülür: “Ürək transplantasiyası işinə hazırlaşırlar, amma nə qədər ki, meyitdən orqan götürülməsinin hüquqi əsasları həll olunmayacaq, bu məsələlər düyün nöqtəsindən tərpənməyəcək”.
İclasda antibiotiklərlə də bağlı məsələ qaldırılıb. Belə ki, deputat Qənirə Paşayeva antibiotiklərdən istifadə ilə bağlı ciddi nəzarət mexanizmlərinin olmasına ehtiyac olduğunu bildirib. Q.Paşayevanın sözlərinə görə, Avropada və digər inkişaf etmiş ölkələrdə antibiotiklər sərbəst şəkildə satılmır: “Bəzən apteklərdə işləyən şəxslərin özləri də antibiotiklər barədə məlumata malik olmurlar, insanlara həmin dərmanları məsləhət görürlər. Azərbaycanda antibiotiklərin həkim təyinatı olmadan istifadəsi məsələsi bizi narahat edir. Bu dərmanlar sonradan eşitmə qabiliyyətinin zəifləməsi və digər ciddi problemlər yaradır. Bu sahədə nəzarət mexanizmlərinin artırılmasına ehtiyac var”.
Deputat əlavə edib ki, autizmli xəstəsi olan ailələr dövlətin dəstəyini istəyirlər.
Q.Paşayeva bunu da qeyd edib ki, hepatit C ilə bağlı müraciətlər çoxalıb.
Millət vəkilinin fikrincə, bunun səbəblərinin aydınlaşdırılması üçün parlamentdə hepatit C-nin sürətlə yayılması, onların qarşısının alınması istiqamətində dinləmələrin keçirilməsinə ehtiyac var.
Antibiotiklərlə bağlı məsələni komitə sədri Əhliman Əmiraslanov daha əsaslı şəkildə izah edib. Komitə sədri antibiotiklərin satışının Azərbaycandakı qədər sadə olduğu ikinci bir ölkə tanımadığını bildirib. Ə.Əmiraslanov qeyd edib ki, dünya ölkələrində antibiotiklərin reseptsiz satılması mümkün deyil:
“Antibiotikləri lazım oldu-olmadı istifadə etmək son dərəcə təhlükəlidir. Son elmi məqalələrdən də aydın görünür ki, onlar hətta insanların genetik mutasiyasına təsir edir. Antibiotikdən istifadə nəticəsində insanlarda müəyyən qüsurların yaranması barədə məlumatlar var. Antibiotiklərlə bağlı çox ciddi qanun-qayda yaradılmalıdır”.
Millt vəkili qeyd edib ki, reseptsiz antibiotik satılmamılı, bu dərman vasitələrinin keyfiyyətinə nəzarət artırılmalıdır: “Təəssüflər olsun ki, bəzən biz keyfiyyətsiz antibiotiklərə də rast gəlirik”.
