Məlum olduğu kimi, yanvarın 16-dan başlayaraq, Azərbaycanda hava şəraiti kəskin pisləşdi. Ölkədə temperatur 10 dərəcəyə qədər aşağı düşdü. Ən başlıcası isə, havanın kəskin şəkildə pisləşməsi güclü və şiddətli küləklərin əsməsi ilə müşayət olunub. Düzdür, ümumən Bakı küləklər şəhəri olsa da, son iki gündə əsən külək daha şiddətli idi. Belə ki, baş verən külək nəticəsində bəzi binaların, məktəblərin dam örtüyünə ziyan dəyib. Eyni zamanda, Bakıda 100-ə yaxın ağac aşıb, reklam lövhələrinə ziyan dəyib və s.
Diqqətçəkən məqamlardan biri də ondan ibarətdir ki, baş verən kəskin küləklərə rəğmən, istər Bakıda, istərsə də ölkənin digər şəhər və rayonlarında elektrik, qaz və su təchizatı ilə bağlı problem yaşanmayıb. Faktiki olaraq, sözügedən sahələrdə əhaliyə göstərilən xidmətdə fasilə yaşanmayıb. Əhali fasiləsiz olaraq qaz, işıq və su ilə təchiz olunub. Güclü küləyə görə “Azərenerji” Açıq Səhmdar Cəmiyyətinin stansiya, yarımstansiya və yüksək gərginlikli ötürmə xətlərində heç bir açılma və qəza halı baş verməyib. Əksinə, yanvarın 16-sı ilə müqayisədə 17-də elektrik istehsal və ixracı artıb. Hava şəraiti ilə əlaqədar olaraq 17 yanvar tarixində sözügedən qurumun mərkəzi aparatı və bütün müəssisələri enerji sistemində qəza hallarının baş verməməsi və yarana biləcək hər hansı qəza hallarının operativ aradan qaldırılması məqsədilə gücləndirilmiş iş rejimində fəaliyyətlərini davam etdiriblər. Temperaturun 10 dərəcə aşağı düşməsi ilə əlaqədar tələbat artdığından, daha çox elektrik enerjisi istehsal edilib və istehlakçılara ötürülüb.
Bütün bunlar onu göstərir ki, kommunal sahədə əhaliyə göstərilən xidmətin keyfiyyəti daha da artırılıb. Bu kimi hallarda qabaqlayıcı tədbirlər sistemli şəkildə görülüb.
Qeyd edək ki, 2017-ci ilin yay mövsümünün kəskin istilərlə müşayiət olunması elektrik enerjisinə olan tələbatın hədsiz dərəcədə artmasına səbəb oldu. Nəticədə Mingəçevirdə yerləşən elektrik stansiyasında qəza baş verdi. Bu da, öz növbəsində, ölkənin elektik təchizatında müəyyən ciddi problemlərə səbəb oldu. O zaman sözügedən məsələ müəyyən müzakirələrə səbəb oldu. Ancaq müvafiq qurumların araşdırmasından sonra elektrik təchizatında yaranan problemlər aradan qaldırıldı. Görülən tədbirlər nəticəsində bəzi elektrik stansiyaları, yarımstansiyalar əsaslı şəkildə modern texnologiyalara uyğun olaraq quruldu. Stansiyalar arasında əlaqələndirmə işləri müasir dövrün tələblərinə uyğun təşkil edildi. Sözügedən sahədə daha effektiv idarəetmə metodları işə salındı. Bu istiqamətdə görülən kompleks işlərin nəticəsi olaraq güclü külək elektrik təchizatında problem yarada bilmədi.
Eyni fikirləri başqa sosial infrastrukturlar barədə də demək olar. Nəticə etibarilə son iki ildə əhalinin işıq, qaz, su ilə təminatında çox etibarlı və əsaslı sistem yaradıldığı göz önündədir. Ölkənin sosial infrastrukturu kəskin istilərə, kəskin soyuğa və güclü qasırğalara dözümlü halda olduğunu sübut etdi.
Vidadi ORDAHALLI
