“İcbari tibbi sığorta sisteminin ölkə üzrə tətbiqi üçün aparılan işlər çərçivəsində xidmətlər zərfi yenidən hazırlanır”. Bunu media nümayəndələrinə Nazirlər Kabineti yanında İcbari Tibbi Sığorta üzrə Dövlət Agentliyinin sədri Zaur Əliyev deyib.
Z.Əliyev hesab edir ki, pilot layihə çərçivəsində təqdim edilən baza zərfinin təkmilləşdirilməsinə ehtiyac var: “Xidmətlər zərfinin yeni variantı yaxın bir neçə ay ərzində təsdiqlənmək üçün hazır olacaq. Xidmətlər zərfinin qiymətində də müəyyən təkmilləşdirmələrin aparılmasına ehtiyac var. Buna görə hazırlıq işləri çərçivəsində bu məsələyə də baxılır. Əsas məsələlərdən biri xəstəxanalarda hazırlıq işlərinin təşkilidir. Bu işlər xüsusilə informasiya texnologiyaları ilə bağlıdır. İcbari tibbi sığorta sistemini ölkədə tam tətbiq etmək üçün bizə sistemin tam avtomatlaşdırılması lazımdır. Bu halda məlumatlar xəstəxanadan bizə vaxtında daxil ola bilər və biz də xəstəxanalara ona uyğun ödənişlər həyata keçirə bilərik. Hesab edirəm ki, xəstəxanalarda həmin proqram təminatının qurulması və onların bizim sistemə inteqrasiyası əsas prioritet məsələlərdən biridir”.
Z.Əliyev qeyd edib ki, Azərbaycanda 2020-ci ildə icbari tibbi sığorta tam şəkildə həyata keçiriləcək. Bu il icbari tibbi sığortaya keçid üçün hazırlıq ili elan olunub.
Milli Məclisin Səhiyyə komitəsinin dünən keçirilən iclasında komitə sədri Əhliman Əmiraslanov çıxış edərək bildirib ki, icbari tibbi sığortanın tətbiqinə hazırlıq işləri başa çatmaq üzrədir: “Əhaliyə göstərilən tibbi yardımın səviyyəsinin yüksəldilməsinin yeganə yolu icbari tibbi sığortanın həyata keçirilməsidir. Bunun ikinci yolu yoxdur. Hansı ölkə tibbi yardımın keyfiyyətini yüksəldibsə, onlar buna yalnız icbari tibbi sığorta ilə nail olublar”.
Ə.Əmiraslanov da qeyd edib ki, 2020-ci ildə icbari tibbi sığorta tam həyata keçiriləcək.
Tibbi ekspert, professor Adil Qeybulla bizimlə söhbətində qeyd etdi ki, icbari tibbi sığortanın tətbiqi insanlara yalnız fayda verə bilər: “İcbari tibbi sığortanın real tətbiqinin 2020-ci ildə həyata keçirilməsi gözlənir. Ümid edirəm ki, o vaxta qədər bu sahədə bütün məsələlər araşdırılıb öz həllini tapar, qeyd olunan tarixdə də icbari tibbi sığorta tam şəkildə tətbiq olunar”.
Həmsöhbətimiz onu da vurğuladı ki, ölkənin bütün regionlarını əhatə edən, vətəndaşların səhiyyə xərclərini qarşılaya bilən, vətəndaşla səhiyyə arasında maliyyə əlaqəsini yarada biləcək yetkin sığorta şəbəkəsinin olması vacibdir.
Günel CƏLİLOVA
