“Atəşgah” sığorta şirkəti - Elnur Zeynalov: “Baş vermiş güclü külək nəticəsində daşınmaz əmlaka dəymiş ziyanla bağlı şirkətə çoxsaylı müraciət daxil olub” “Kasko Butik” sığorta şirkəti: “Güclü küləyin fəsadı ilə bağlı şirkətə daxil olan müraciətlər çox olub” “AtaSığorta” - Fariz Hacızadə: “... dəymiş ziyanla bağlı şirkətə müraciət daxil olmayıb” Xəyal Məmmədxanlı: “Təbii fəlakət hadisəsi zamanı əmlaka dəymiş ziyan sığorta şirkəti tərəfindən qiymətləndirilir və həmin məbləğ ödənilir”
Əvvəlcədən aidiyyəti qurumların proqnozlaşdırdığı kimi, ölkə ərazisində hava şəraiti kəskin pisləşdi və baş verən güclü külək, tufan nəticəsində ətraf mühitə zərər dəydi. Eyni zamanda, nəqliyyat vasitələrinə, daşınmaz əmlaka da müəyyən dərəcədə ziyan vurdu.
Yanvarın 17-də başlayan güclü külək Bakıda bir sıra fəsadlar törədib. Paytaxt ərazisində müxtəlif yerlərdə küləyin təsiri ilə 10-a yaxın ağac qırılıb, reklam lövhələri aşıb, dayanacaq dağılıb, Bakı-Astara yolunda isə iki yük avtomobili aşıb.
Yeni Günəşli ərazisində isə minik avtomobilinin üzərinə su çəni düşüb. Nəticədə avtomobilə ciddi ziyan dəyib. Paytaxtın Hüseyn Cavid prospektində külək dayanacağı aşırıb. Eyni zamanda, güclü külək bəzi çoxmərtəbəli binaların dam örtüyünü qopararaq ətrafa töküb. Təbii fəlakət nəticəsində Bayıl qəsəbəsində hadisə baş verib. Belə ki, işıq dirəyi aşaraq hərəkətdə olan yük maşınının üzərinə düşüb. Maşının yük yeri hissəsi sınaraq sıradan çıxıb, idarəetməni itirən maşın solundakı avtomobilə çırpılıb. Kəskin hava şəraiti hətta bəzi yerlərdə yol qəzalarına da səbəb olub. Belə ki, nəqliyyat vasitələri idarəetmədən çıxaraq aşıb.
Son iki gündə qeydə alınan güclü külək nəticəsində ətrafa müəyyən ziyan dəyib. Təbii fəlakət nəticəsində dəymiş ziyanla bağlı insanlar sığorta şirkətlərinə müraciət ediblər.
Bu günlərdə qeydə alınan hadisələrlə bağlı sığorta şirkətlərinə edilən müraciətləri araşdırdıq.
Sığorta şirkətlərindən qəzetimizə verilən məlumata görə, külək nəticəsində həm avtomobillərə, həm də daşınmaz əmlaka zərər dəyib.
“Atəşgah” sığorta şirkətinin sığorta mütəxəssisi Elnur Zeynalov “Bakı-Xəbər”ə açıqlamasında qeyd etdi ki, baş vermiş güclü külək nəticəsində daşınmaz əmlaka dəymiş ziyanla bağlı şirkətə çoxsaylı müraciət daxil olub: “Əmlakla bağlı çox müraciət olmayıb, ancaq avtomobillərə dəyən ziyanla bağlı müraciət edən çox olub. Avtomobillərə hansısa ağır əşyanın düşməsi, ağacın qırılaraq yoldan keçən və ya dayanmış maşına zərər yetirməsi, binanın dam örtüyünün minik vasitələrinə çırpılması nəticəsində nəqliyyat vasitələrinə zərər dəyib. Hadisə ilə bağlı edilən müraciətlər əsasında maşına dəymiş zərərin qiyməti müəyyən olunub və şirkət həmin ziyanı ödəyib. Güclü külək nəticəsində maşınlara müxtəlif məbləğdə ziyan dəyib. Hansısa maşının üzərinə ağac aşıbsa, o zərər təxminən 2000-3000 manat dəyərində hesablanıb. Hündürlükdən avtomobilin üzərinə düşən ağır əşyanın vurduğu ziyan 500-600 manat dəyərində hesablanıb. Bu günlərdə müraciətlər çox olub və bir-birindən fərqlənir”.
“AtaSığorta” ASC icbari sığorta şöbəsinin müdiri Fariz Hacızadə bizimlə söhbətində bildirdi ki, ötən gün ərzində qəza ilə bağlı müraciət edən olub. Güclü küləyin törətdiyi fəsad nəticəsində dəymiş ziyanla bağlı şirkətə müraciət daxil olmayıb.
“Kasko Butik” sığorta şirkətindən qəzetimizə bildirildi ki, güclü küləyin fəsadı ilə bağlı şirkətə müraciətlər daxil olub: “Yanvarın 17-də şirkətə təbii fəlakət hadisəsi zamanı avtomobillərə dəymiş ziyanla bağlı bir neçə müraciət daxil olub. Belə ki, avtomobilin üzərində yük yerini (baqaj) güclü külək qoparıb. Başqa bir avtomobilin üzərinə ağır əşya düşdüyü üçün avtomobilə zərər dəyib. Ümumiyyətlə, baş vermiş təbiət hadisəsi zamanı minik vasitələrinə dəymiş ziyan araşdırılıb və onlara ödəniş ediləcək”.
Sığorta eksperti Xəyal Məmmədxanlı “Bakı-Xəbər”ə açıqlamasında qeyd etdi ki, insanlar hər hansı bir hadisədən sığortalanmaq üçün daşınmaz əmlakı sığortalamalıdırlar: “Təəssüf ki, insanlar əmlakın sığortasına ciddi yanaşmırlar. Bəllidir ki, 2011-ci ildə daşınmaz əmlakın icbari sığortası ilə bağlı qanun qəbul olunsa da, insanların əksəriyyəti hələ də evlərini sığortalamır. Nəzərinizə çatdırım ki, əmlakın sığortası üçün 50 manat ödəniş etmək lazımdır. Ancaq insanlar əmlakının sığortası üçün 50 manat ödəniş etməkdə maraqlı deyil. Təbii fəlakət hadisəsi zamanı əmlaka dəymiş ziyan sığorta şirkəti tərəfindən qiymətləndirilir və həmin məbləğ ödənilir”.
Günel CƏLİLOVA
