Masallı rayonunda öz nəcib, xeyirxah əməlləri ilə daha çox tanınan, sevilən dəyərli insanlardan biri də Gülsürə Bağır qızı Bəşirovadır. Zəngin daxili aləmə malik, vicdanı saf, qəlbi təmiz olan bu Azərbaycan xanımı müqəddəs peşə sahibi - müəllimdir. Doğma Çayqıraq kənd məktəbində çalışır.
Savadı, mədəniyyəti, istedadı tanıyanları valeh edir. Sevdalı bir ömür yaşamaqla el-obaya da sevinc gətirir. Gülsürə müəllim 18 ildir ki, halallığa tapınmaqla dərslərini özünə xas olan tərzdə, ürəklə tədris edir, hər şagirdin xoş gələcəyi naminə sözün əsl mənasında can yandırır. Bu da ondan irəli gəlir ki, Gülsürə müəllimə sağlam düşüncə sahibi, xalqa bağlı ləyaqətli pedaqoqdur. O qədər peşəsinə könüldən bağlanıb ki, dünyanın özünü də elə onda görür.
İnsanlığın zinəti sayılan saf və munis dəyərləri parlaq xarakterində yaşatmaqla işıqlı tale yolu keçməkdə olan Gülsürə Bəşirova Azərbaycan Dövlət Dillər Universitetinin fransız dili fakültəsini bitirib. Müəllim kimi əmək fəaliyyətinə başladığı gündən dərin zəkası, yaradıcılıq istedadı, gözəl mənəvi keyfiyyətləri başladığı yolda məşələ dönür. Və dünyada ali istəyi, yeganə umacağı kamil, ləyaqətli vətəndaşlar yetişdirib xalqına, vətəninə xidmət etmək olur. Nə yaxış ki, günlərin, ayların səfində çalışdığı məqsəd naminə gərgin əməyi, mənəvi, ziyalılıq xüsusiyyətləri onun həyatına yeni mənalar qatır. Yaxşı ad da qoya bilir. Odur ki, rayonda gənc nəslin təlim-tərbiyəsində onun əməyi həqiqətən böyükdür. Şagirdlərin sorağı hazırda respublikanın ən gərəkli yerlərdən gəlir. Gülsürə müəllimənin istisinə qızınanlar, hikmət dünyasından qucaq-qucaq pay götürənlər ad-sanından, tutduğu mövqedən asılı olmayaraq heç zaman onu unutmur, adını əziz tuturlar. Bu doğrudan da sənətini sevən müəllim üçün ən böyük xoşbəxtlikdir.
Məktəbin direktoru Tahir Bağırov deyir:- Müəllimlik elə bir peşədir ki, gərək onu sevəsən, sənətinə məhəbbətlə yanaşasan. Gülsürə Bəşirovada bütün bu keyfiyyətlər görünür. Müəllim adını hər şeydən uca tutur, qəlbindəki sevgini xalq və dövlət yolunda təmənnasız xidmətə çevirməklə şərəfli peşəni ləyaqətlə daşıyır. Valideynlər, şagirdlər, müəllimlər sadəliyinə, təvazökarlığına, insanpərvərliyinə görə ona hörmət göstərirlər. Gənc olmasına baxmayaraq, məktəbdə hamı onun iş metoduna pərəstiş edir. O, peşəsini dərindən bilən, tədris etdiyi fransız dilinin bütün incəliyinə bələd olan, işinə yaradıcılıqla yanaşan yenilikçi pedaqoqdur. Nizam-intizam, işgüzarlıq, daim öz üzərində çalışmaq onun pedaqoji fəaliyyətində əsas göstəricidir. Ömrünün mənasını məktəblə, uşaqların təlim-tərbiyəsi ilə bağlayır. Təqribən dörd ilin söhbətidir. Rayon İcra Hakimiyyətin başçısı məktəbimizə qonaq gəlmişdi. Bir-neçə sinifdə oldu. Gülsürə müəllimənin keçdiyi dərs onu daha çox razı saldı. Həmin vaxtı məktəbimiz dağılmaq üzrə idi. İcra başçısı müəllimdən arzusunu soruşdu, o, yeni məktəb tikməyi xahiş etdi. İcra başçısı onu eşitdi və bizim üçün 180 şagird yerlik yaraşıqlı bir məktəb binası tikdirdi. Bu da onu göstərir ki, Gülsürə yaxşı müəllim olduğu tək, el üçün yanmağı bacarır. Nəcib həyat amalı, xeyirxah məqsədləri onun həqiqi vətənpərvər olduğunu bildirir. Onu da deyim Gelsürə müəllimin rəhbəri olduğu 9-cu sinifdə 14 şagird oxuyur, onların on nəfəri əlaçıdır.
Bənövşə Mahmudova Çayqıraq kənd məktəbində ibtidai sinif müəllimidir. O da nümunəvi fəaliyyəti ilə müəllim şərəfini, adını uca tutmaqla kollektivdə, el-obada özünə qarşı səmimi, xeyirxah hisslər oyada bilib. Gülsürə müəllimə haqqında isə qəribə bir doğmalıqla:- Sənətinə vurğun, onun müqəddəsliyini dərk edən az-az adam tapılar ki, Gülsürəyə tay olsun-deyir. Məktəbimizdə uşaqlar fransız dilinə böyük maraq göstərir. Çünki Gülsürə müəllimənin ünsiyyət bacarığı gözəldir. Yüksək biliyi, əsl müəllim əxlaqına xas keyfiyyətləri, mərifəti dərs dediyi şagirdləri bu fənnə daha çox daxili sevgi ilə həvəs göstərməyə sövq edir. Biz müəllimlər isə onunla çiyin-çiyin işləməklə zövq alırıq.
Məktəbin riyaziyyat müəllimi Zaur Əsədov isə həmkarı barədə ürək sözlərini belə bildirir:- Gülsürə müəllimə vətəninə, millətinə ürəkdən bağlandığı üçün çoxuna örnək ola biləcək şərəfli həyat yolu keçir. Öz işinə elə həvəslə, elə məhəbbətlə yanaşır ki, məktəbdə hamı ona həsəd aparır. Məhz onun istedadının mayası müəllimliyə marağı və sevgisindən tutulur. Mənim gözümdə indi Gülsürə müəllimə dünyanın ən nəcib, təmiz və xoşbəxt insanıdır. Onun gənc nəslin təlim-tərbiyəsində öz yeri vardır. Əməyi rəhbərlik tərəfindən Fəxri fərmanlara layiq görülüb. Gülsürə müəllimə isə şagirdlərdən gördüyü sevgini daha önəmli sayır.
Gülsürə Bəşirova həyatda yerini qəlbinin hərarətini verib başqalara işıq olmaqda tapıb. Belə yaşayıb, özündən sonra iz qoymaq isə hər bəşər övladının arzusudur.
Zəfər ORUCOĞLU Azərbaycan Jurnalistlər Birliyinin üzvü
