“Ona görə də hər bir kəs vətəndaşlıq mövqeyindən çıxış edərək belə hallara yol verməməlidir”
Sosial şəbəkələrdə bəzi şəxslər heç bir mənəviyyata, əxlaqa, vətəndaşlıq və dövlətçilik mövqeyinə sığmayan xoşagəlməz çağırışlar edirlər, həqiqətə uyğun olmayan məlumatlar yayırlar. Söhbət sosial şəbəkələrdə və “WhatsApp” messencerində naməlum şəxslər tərəfindən təxribat xarakterli məlumatların kütləvi şəkildə yayılmasından gedir. Bu minvalla, əhali arasında təşviş doğuran şayiələr yaymağa çalışırlar. Misal üçün, insanları guya çörək qıtlığı və ən başlıcası, “donuz qripi” epidemiyası ilə qorxudurlar. Öz sözlərinin sübutu kimi araqarışdıranlar KİV-də dövlət qurumlarının gücləndirilmiş iş rejiminə keçmələrini əsas gətirirlər. Heç bir ciddi əsas olmadan insanlar arasında təşviş, qorxu yaratmaq istəyirlər.
Aydın məsələdir ki, sosial şəbəkələrdə olanların heç də hamısı belələrinin təsiri altına düşmür. Xeyli sosial şəbəkə istifadəçisi var ki, milli və dövlətçilik maraqlarından çıxış edir, belə pozucu insanların təsiri altına düşmür. Zaman-zaman da məhz bu kontekstdən çıxış edərək ortaya mövqe qoyurlar. Onu da nəzərə almaq lazımdır ki, müasir dövrdə heç bir dövlət təbii fəlakətlərdən, qəzalardan sığortalanmayıb. İnkişaf səviyyəsindən, texnoloji imkanlarından asılı olmayaraq, istənilən dövlət belə hallarla üzləşə bilər. Məlum olduğu kimi, hava şəraitinin kəskin pisləşəcəyi ilə bağlı Azərbaycanın dövlət qurumları bir sıra qabaqlayıcı tədbirlər gördülər. Belə ki, ümumtəhsil məktəbləri və universitetlərdə dərslər dayandırıldı. Dənizdə neft buruqlarında çalışan fəhlələrin hamısı təxliyyə edildi. Adətən belə hava daha çox dənizdə çalışanların işini çətinləşdirir və risqləri artırır. Həmçinin, texniki xarakterli digər qabaqlayıcı tədbirlər görüldü. Eyni zamanda, bütün müvafiq qurumlar hava şəraiti ilə əlaqədar gücləndirilmiş iş rejiminə keçdilər. Sürücülər, şəhər sakinləri dönə-dönə xəbərdar edildi. Bütün bunları etməkdə məqsəd o idi ki, havanın pisləşməsi ciddi fəsadlara gətirib çıxarmasın. Buna görə ölkə vətəndaşları zərər çəkməsin. Nəzərə alsaq ki, təbiət hadisələrindən heç bir dövlət sığortalanmayıb, o zaman bu kimi tədbirlərin görülməsi tamamilə məntiqəuyğundur və bunda nəsə qeyri-adi bir şey axtarmaq doğru deyil.
Ancaq çox təəssüflər olsun ki, bəzi xəstə təxəyyülə, antimilli düşüncəyə malik olan şəxslər sosial şəbəkələrin imkanlarından sui-istifadə edərək təxribat xarakterli şayiələr yaydılar. İnsanları təşvişə, ümidsizliyə kökləməkdən ötrü ağlagəlməz çağırışlar səsləndirdilər. Bir anlıq fikirləşirsən ki, belələri sanki bu dövlətin vətəndaşı deyil, düşmən bir ölkənin nümayəndəsidirlər. Çünki damarlarında azərbaycanlı qanı axan, dövlətinə, millətinə sevgisi olan şəxs bunu etməz. Daha doğrusu, belə xəyanətə yol verməz. Bunu ancaq xəyanət kimi dəyərləndirmək mümkündür.
Maraqlıdır, bu cür xəyanətin kökündə nə dayanır?
Məsələyə münasibət bildirən şərqşünas Seyid Camal Əzimbəylinin sözlərinə görə, xəyanətin kökündə xəstə təfəkkür və hər şeyi qara görmək xisləti dayanır: “Ona görə də belələri ölkədə baş verən, həyata keçirilən bütün yaxşı işləri mənfi müstəvidə təqdim edirlər. Belələri o dərəcədə vətənpərvərlik, dövlətçilik hisslərini itiriblər ki, ölkədə istənilən inkişafı, tərəqqini qəbul etmirlər. O üzdən, istənilən bu kimi təxribat xarakterli dedi-qodulara həvəslə inanıb bunu yayırlar. Belə xoşagəlməz halların alətinə çevrilirlər. Hər vəchlə dövlətə, dövlətçiliyə ziyan vurmağa, insanların düşüncələrini, necə deyərlər, zəhərləməyə çalışırlar. Ona görə də hər bir kəs vətəndaşlıq mövqeyindən çıxış edərək belə hallara yol verməməlidir. Daha dəqiq desək, bu kimi təxribat, xəyanət xarakterli dedi-qodulara inanmamalıdır və bunu təbliğ etməməlidir. Bəzən görürsən ki, kimlərsə savadsızlığı ucbatından bu kimi həqiqətə uyğun olmayan fikirlərə inanır. Hesab edirəm ki, cəmiyyət özü belə hallara qarşı həssas davranmalı və bu cür məlumatların yayılmasına imkan verməməlidir. Təbii ki, dövlətinə, millətinə bağlı olanlar məhz bu mövqedən çıxış edəcəklər”.
Vidadi ORDAHALLI
