Telman Zeynalov: “Dövlətin əhalinin təhlükəsizliyi baxımından həyata keçirdiyi bütün təhlükəsizlik tədbirləri təqdirəlayiqdir”
Ölkə ərazisində güclü külək əsəcəyi, sulu qar və qar yağacağı barədə xəbərlərin yayılması əhalini bir qədər əndişələndirib. Bu hadisədən qorxanlar da var, onun heç bir fəsad törətməyəcəyini deyənlər də. İnsanları daha çox küləyin törədəcəyi bəlalar narahat edir. Dövlət qurumları isə əhalinin təhlükəsizliyinin tam nəzarətdə olduğunu bildirirlər.
Qeyd edək ki, Ekologiya və Təbii Sərvətlər Nazirliyinin Milli Hidrometeorologiya Departamenti yanvarın 17-si və 18-də respublika ərazisində kəskin hava şəraiti müşahidə olunacağı ilə bağlı ölkə əhalisinə xəbərdarlıq edib. Təhlükəli hidrometeoroloji hadisənin bir sıra fəsadlar törədə biləcəyini istisna etməyən nazirlik təmsilçiləri xəbərdarlıq edirlər ki, ən təhlükəli külək dənizdən gözlənir. Qurum Bakıda və Abşeron yarımadasında güclü külək əsəcəyi, sulu qar yağacağı, temperaturun 10 dərəcəyədək aşağı düşəcəyi barədə də məlumat verir. Qeyd edilir ki, temperaturun birdən-birə 10 dərəcəyədək aşağı düşməsi ciddi fəsadlara səbəb ola bilər. Rəsmi qurumlar əhalini gözlənilən kəskin havaya hazırlıqlı olmağa çağırır.
Əhalini gözləyən təhlükəli hava şəraiti ilə bağlı artıq Ekologiya və Təbii Sərvətlər Nazirliyində qərargah da yaradılıb. ETSN-in mətbuat xidmətinin rəhbəri İradə İbrahimova mətbuata “Yəni xəbərdarlıq ona görə tam təfsilatı və dəqiqliyi ilə verilib ki, əsasən dənizdə işləyənlər əvvəlcədən vəziyyətin ciddiliyindən xəbərdar olsun və bədbəxt hadisələr baş verməsin. Amma Bakıda və Abşeron yarımadasında da güclü külək əsəcəyi, sulu qar yağacağı, temperaturun 10 dərəcəyədək aşağı düşəcəyi gözlənir. Temperaturun birdən-birə 10 dərəcəyədək aşağı düşməsi də fəsadlara səbəb ola bilər. İşıq, qaz, kommunal təsərrüfatlar üçün bu bir hazırlıq xəbərdarlığıdır. Biz xəbəri yayırıq ki, əhali gözlənilən kəskin havaya hazırlıqlı olsun. Güclü küləyin olacağı məlumatı da dənizdə işləyənlərlə bərabər şəhərdə istehsalat zonalarında, tikintilərdə işləyənlərə xəbərdarlıqdır ki, qabaqlayıcı tədbirlər görülsün, hündür mərtəbələrdə iş aparılmasın, hündür kranların işi dayandırılsın. Elə vətəndaşların özləri də bilsinlər ki, belə küləkli hava şəraitində ağacların, dirəklərin aşması təhlükəsi yarana bilər, buna görə də ehtiyatlı olsunlar. Bir də vurğulayıram, belə ciddi hava xəbərdarlığı barədə məlumatı yaymaq vacibdir ki, insanlar, aidiyyəti qurumlar əvvəlcədən hazırlıqlı olsunlar. Amma eşidirik ki, nazirliyi belə həyəcanlı məlumatı yaymaqda qınayanlar da var. Məncə əsassızdır, çünki insanlar müəyyən təhlükələrdən əvvəlcədən xəbərdar olsa, güclü və çevik olar, gözlənilən təhlükədən özünü qoruya bilər. Yəqin dənizdə neftçilərin güclü külək nəticəsində faciə ilə üzləşməsi hamının yadındadır. Bütün bunların baş verməməsi və insanların işlərini havaya uyğun qurmaları üçün əvvəlcədən xəbərdarlığın verilməsi vacib və zəruridir” - deyə o qeyd edib.
O, həmçinin, bildirib ki, nazirliyin aparatında yaradılan qərargah tərəfindən dövlət qurumları və nazirliyin regional idarələri arasında koordinasiyanın daha da gücləndirilməsi məqsədilə operativ faktiki hava məlumatları təqdim olunacaq.
Ölkəmizdə gözlənilən təhlükəli hava şəraitilə bağlı bütün qurumların gücləndirilmiş iş rejiminə keçdiyi məlumdur. Hava şəraitinin kəskin dəyişməsi ilə bağlı tibb müəssisələri gücləndirilmiş iş rejiminə keçəcəklər. Bundan başqa, təhsil naziri yanvarın 17 və 18-də orta məktəblərdə dərslərin dayandırılması barədə əmr imzalayıb, rəsmən iki gün uşaq bağçaları da işləməyəcək.
Respublika ərazisində hava şəraitinin kəskin pişləşməsi nəticəsində əhalini gözləyən təbii hadisələrlə bağlı dövlət tərəfindən həyata keçirilən qabaqlayıcı tədbirlər, eləcə də bununla əlaqədar əhaliyə xəbərdarlıq edilməsi ölkə əhalisinin təhlükəsizliyinin təmin edilməsi baxımından nə kimi əhəmiyyət daşıyır?
Tanınmış ekoloq Telman Zeynalovun sözlərinə görə, ölkəmizdə iki gün hava şəraiti hədsiz dərəcədə pis olacaq. O qeyd etdi ki, bununla bağlı əhaliyə dəqiq məlumat verilməsi və onları təhlükədən xəbərdar edilməsi çox müsbət haldır. T.Zeynalovun bildirdiyinə görə, əhalinin gözlənilən təbii fəsadlara əvvəlcədən özünü psixoloji cəhətdən hazırlaması çox vacibdir. “Hesab edirəm ki, əhalinin gözlənilən kəskin hava şəraitilə bağlı əvvəlcədən məlumatlandırılması elə onların təhlükəsizliyinin qorunması deməkdir. Azərbaycanda havalar qəfil soyuyacaq, güclü külək əsəcək, hətta qarın da yağacağı deyilir. Hidrometeoroloqlarımız hava haqqında çox dəqiqi məlumat veriblər. Əhalinin öncədən məlumatlandırılması çox yaxşı oldu ki, bu fəlakət insanları qəfil üstələməyəcək. Xəbərdarlıq edildiyi üçün insanlar daha tədbirli olacaq, evdən çölə çıxmayacaq, övladını məktəbə, bağçaya aparmayacaq, vacib işlərini təxirə salacaq. Güclü külək baş verəndə insanları bayırda yüz cür fəlakət yaxalaya bilər. Bu baxımdan, dövlətin əhalinin təhlükəsizliyi üçün həyata keçirdiyi bütün təhlükəsizlik tədbirləri təqdirəlayiqdir. Ayın 17-si və 18-i məktəblərdə dərs olmayacaq, usaqlar bağçaya getməyəcəklər. Artıq dənizdə işləyənlərin də təhlükəsizliyinin qorunması baxımından addımlar atılır. Bu da onların təhlükəsizliyinin dövlət tərəfindən təminatı deməkdir”.
O, həmçinin, vurğuladı ki, gözlənilən kəskin hava şəraitilə əlaqədar bütün dövlət qurumlarının gücləndirilmiş iş rejiminə keçməsi, eləcə də Ekologiya və Təbii Sərvətlər Nazirliyində xüsusi informasiya-məlumat qərargahının yaradılması, qurumların bir-birilə əlaqəli işləməsi və s. əhalinin təhlükəsizliyinin tam olaraq dövlətin nəzarətində, diqqətində olduğunu göstərir.
İradə SARIYEVA
